بیلمم نئیچون منی آتمیش اونودموش
عهد و پیمانینا قوربان اولدوغوم
یوخسا اؤزگه سینه اوزونو توتموش
یئنی سئوداسینا قوربان اولدوغوم
من دلبری سوردوم گلیب گئدن دن
دئدیلر کوسموشدور باریشماز سندن
من امتناع ائتدیم
او قاچدی من دن
قاچقین اداسینا قوربان اولدوغوم
او منیم سئوگیلیم او منیم سونام
اوندان آیری دوشمز آچیلماز آینام
بیلمه م هاردا قالدی او نازلی دورنام
او خوش صداسینا قوربان اولدوغوم
آیریلیق اودونا کؤنول دایانماز
عشق اودونا یانان بیرداها یانماز
چکدیغیم ناله دن نئیچون اویانماز
شیرین رویاسینا قوربان اولدوغوم
هیجرانی قلبیمی یاندیرار یاخار
گؤزلریم یوللارا باخار هی باخار
مشفق سنه یانار سن سیز اودلانار
ایتمیش خیالینا قوربان اولدوغوم
*
Keine Kommentare:
Kommentar veröffentlichen