Montag, Juni 17, 2013

بهجت آباد خاطره سی - شهریار

اولدوز سایاراق گؤزله میشم هر گئجه یاری

گئج گلمده دیر یار، یئنه اولموش گئجه، یاری

گؤزلر آسیلی ، یوخ نه قارالتی ، نه ده بیر سس

باتمیش قولاغیم ، گؤر نه دؤشورمکده دی داری

بیر قوش آییغام سویلیه رک ، گاهدان اییلده ر

گاهدان اونودا یئل دئیه لای - لای هوش آپاری

یاتمیش هامی ، بیر آللاه اویاقدیر، داها بیر من

مندن آشاغی کیمسه یوخ ، اوندان دا یوخاری

قوخوم بودی یار گلمه یه ، بیردن یاریلا صبح

باغریم یاریلار، صوبحوم آچیلما، سنی تاری!

دان اولدوزی ایسته ر چیخا، گؤز یالواری چیخما

او چیخماسادا اولدوزومون یوخدی چیخار

گلمز تانیرام بختیمی، ایندی آغارار صبح

قاش بئیله آغاردیقجا داها باش دا آغاری

عشقین کی قراریندا وفا اولمیا جاقمیش

بیلمم که طبیعت نیه قویموش بو قراری

سانکی خوروزون سون بانی خنجردی سوخولدی

سینه مده اورک وارسا کسیب قیردی داماری

ریشخندله قیرجاندی سحر سؤیله دی دورما

جان قورخوسو وار عشقین اوتوزدون بو قماری

اولدوم قره گون آیریلالی او ساری تئلدن

بونجا قره گونلردی ائدن رنگیمی ساری

گؤز یاشلاری هر یئردن آخارسا منی توشلار

دریایه باخار بللی دی چایلارین آخاری

از بس منی یاپراخ کیمی هیجران لا سارالدیب

باخسان اوزونه سانکی قیزیل گولدی قیزاری

محراب شفقده اؤزومی سجده ده گوردوم

قان ایچره غمیم یوخ،اوزوم اولسون سنه ساری

عشقی واریدی شهریارین گللی -  چیچکلی

افسوس، قارا یئل اسدی خزان اولدو بهاری

Keine Kommentare: