Sonntag, Januar 01, 2012

منی ده آپار یانیندا

یادیما گلیر کی اوشاقلیقدا ، آنام چادراسینی باشینا اؤرتوب ائودن ائشیه چیخاندا ، خیرداجانا اللریمنن اونون چادراسینین قیراغیندان یاپیشیب دالیسی جان گئده ردیم. هردن بیر الیمی دالی چکیب دئیه ردی : اوزور یئرینه گئدیرم. اوزور یئرینه اوشاقلاری آپارمازلار. اوره گیم تیتره ردی .اوره کدن و اوره گیمده یالواراردیم کی منی دا یانیندا آپار.
بویونلریم تلفوندا دانیشیریدق. دئدی : ساباحلاریم داش ماکی یا گئدیریخ. آخی بی بی مین جاوان اوغلونون ایلی دی .
دئدیم : اوره کدن چوخ ایستیرم کیچادراوین اوجوندان یاپیشیب دالینجا دوشه م .
گولومسه ییب دئدی : آپارمازدیم. آخی اوزور یئرینه اوشاقلاری آپارمازلار.
بیلیردی کی آپارماق ایسته سه ده یول اوزاق دی آیاقلاریم قیسسا. خیرداجا قیز بؤیویوب آما اللری او قدیر قیسسالیب کی آناسینین چادراسینا چاتمیر. دای نه ائیله مک . چاره دن اوزولموش لر کیمی اؤز اؤزومه شعر یازدیم ها بئله سی:

آنا گئدیرسن ماکویا
منی ده آپار یانیندا
الین یاپیشیب گئده رم
خیاوانی آتلایاندا
...
آنا جان واللاه باللاهی
سه س ائله مه رم ، دینمرم
خورما دوتسالار یئمرم
چوخ قندیلن چای ایچمرم
...
دیزیم اوسته اوتورارام
واللاهی سؤزه باخارام
اوتاغا بؤیوک گیرنده
آیاقلارینا قالخارام
...
بیر آزجا ایجازه وئرسه ن
انجمنه باش وورارام
منی ائوده قویوب گئتسن
دولوب اوره گیم آغلارام
...
واللاهی سؤزه باخارام
آپارسان منی یانیندا
شولوخ ائیله مه رم اوردا
منی ده آپار یانیندا
...
شهربانو – قایاقیزی - سه شنبه 26/2/1385

*

Keine Kommentare: