ایندی - انجمن

آیلار یورغونویام ایللر خسته سی
اودورکو کؤنلومه نار دوشوب ایندی
یایلاقدان کؤچونو چاتیب ائل اوبا
طرلانین یوردونا سار دوشوب ایندی
*
بو دنیا بیر یانا سن ده بیر یانا
یاندیریب کؤنلومو درندرمه قانا
بیزیم عشقیمیزدن آذربایجانا
اصلی کرم کیمی جار دوشوب ایندی
*
من کی باش ایمزدیم وزیره شاها
پناه وئر کؤلگه نده من بی پناها
سن گؤرن « انجمن» دئییلم داها
ائله بیل باشیما قار دوشوب ایندی
*
شاعر: انجمن

گئتدی - بهمن وطن اوغلو

هر عاشیق بیر ساز گؤتوردی
بیر هاوانی چالدی گئتدی
سؤیله گؤروم دنیا سنن
کیمی راضی قالدی گئتدی؟
*
کیمی گلدی آرا قتدی
کیمی کؤلگه لرده یاتدی
کیمکی خلق اوچون یاراتدی
اوره کلرده قالدی گئتدی
*
جئیران کیمین قاچانمادی
کهلیک کیمین اوچانمادی
چیچک کیمین آچانمادی
خزان ویردی سولدو گئتدی
*
وطن اوغلو بیر زامانلار
اوچولدو چوخ خانمانلار
قیلینجیننان قان دامانلار
اؤز پایینی آلدی گئتدی

تاپار منی - ایکرم علی اوف

مین نفره بیر درد اولسا
حکما گلیب تاپار منی
یئر اوزونده بیر ایت وارسا
گلیب تاپیب قاپار منی
آرزوم ایچیمده غریب دیر
سینه مده غم گؤیریبدیر
یوخوما ایلان گیریبدی
یقین چالار او مار منی
بیلینمیر هئچ اوزاق یاخین
چوخوم یوخدو آزا باخین
داماریمدا ناله آخیر
اؤلدوره ر بو دامار منی
سؤزدن سیردن اوسانمیشام
فیتنه گیردن اوسانمیشام
تانریم یئردن اوسانمیشام
اؤز یانینا آپار منی
خیاللاریم الک - فلک
یوخومدا مین فیتنه فلک
منیم منیم تک قالیب تک
اؤز – اؤزوندن اومار منی
بیلینمیر هئچ اوزاق یاخین
چوخوم یوخدو آزا باخین
داماریمدا ناله آخیر
اؤلدوره ر بو دامار منی

گلمز؟ - هوشنگ جعفری

فساد اولان یئره مین بیر بلا گلر، گلمز؟
همیشه زلزله، سیل و وبا گلر، گلمز؟
او یئر کی عالم اولا بی عمل فقط دانیشا
او یئرده بانکا نزول و ربا گلر، گلمز؟
او یئرده کی چاپاچاپ دوشدو چاپدیلار خلقی
او شهره خشم ائدر آللاه قضا گلر، گلمز؟
او یئر کی رحم اولونماز ناماز اولار الکی
گوناه ائدنلره البت جزا گلر، گلمز؟
من هئچ کیمه ناماز اوستونده مرگ بر دئمه رم
دئسم منیم ائلیمه کرونا گلر، گلمز؟
بو جان هاییندا، سن او احتکار ائدنلره باخ
گؤرن او اوزلره بیرده حیا گلر؟ گلمز
او یئرده کی ایشی خالقین فقط چپاول دور
اورا مرض ده گله بی صدا گلر، گلمز؟
او یئر کی خلقه حرام ائیلیر نه دور و بره
او شهره چینی گله مبتلا گلر، گلمز؟
منیم سؤزوم کرونادا دگیل، بلادی بلا
بلا بلانی گؤره آشنا گلر، گلمز؟
او یئرده کی بؤلونر اؤز ایچینده بیت المال
او قومون ای گونو گوندن قرا گلر، گلمز؟
او یئر کی فکر اولا فرعونو ظلم ائده خلقه
اورا عصا یئرینه اژدها گلر، گلمر؟

سنی اونوتماق اوچون گلمه میشم دنیایه - گولایه شینیخلی

بیر غملی بلبلم دنیا دار قفس

عشقین نغمه سی دی بو ناله بو سس

اولماسان کسیلر آلدیغیم نفس

اونوت منی داها اونوت دئییرسن

سنی اونوتماق اوچون سئومه میشم من

دوران خاطیریمه دیه یدی آغلادیم

عؤمور یئلکه نیمی ایدی آغلادیم

ال غمین باش منیم دؤیدو آغلادیم

تور قوروب گؤزونده گؤرورسم می من

سنی اونوتماق اوچون سئومه میشم من

گؤرنلر سوروشدو گؤرن نه ایزمیش

دئمه رم سینه می ستم لر ازمیش

حسرتین ده اؤزون قدر عزیزمیش

اوغروندا آغاردیب ساچیمی دن دن

سنی اونوتماق اوچون سئومه میشم من

گول چیچک آچمادی سن سیز باهاریم

سنین وارلیغین دی دنیادا واریم

سن سیز عؤمور دئییل یاشادیخلایم

او گونون او آنین اولوب عؤمرو کن

سنی اونوتماق اوچون سئومه میشم من

حاق دی کؤنوللرده محبت آندی

بو یولدا اصلی ده کرم ده یاندی

مقدس هر عشقین قربانی جان دی

منه خوش دو اؤلوم دئمه رم نه غم

سنی اونوتماق اوچون سئومه میشم من

ایستی اوجاغیندا کؤزون ابدی

گؤزومه کؤچوبدو گؤزون ابدی

اؤزونده عزیزیم اؤزون ابدی

ایستر یاخیندا اول یاد اولان گن من

سنی اونوتماق اوچون سئومه میشم من

گولایه قولون دو سن عشق آللاهیم

آیاغین ده ین یئر زیارتگاهیم

ای کؤنول سلطانیم ای کؤنول شاهیم

منه مندن یاخین بو عالم ده سن

سنی اونوتماق اوچون سئومه میشم من

*

وفاسیز فلک - غفّار حسین نژاد " رافغ "

وفا سیز فلک 
قان قـوساسان گـوروم ، وفاسیز فلک
هیچ قـویمـادیـن منـی قـاداسیـز فلک

یاندیـردی باغـریمی قانلی نیسکیل لر
جوشغون دردلـر اولدی ،ساناسیزفلک
مین دردی دولدوردین ،یالقوزکونلومه
دردین گوروم اولسون ، داواسیز فلک
آنـا محبّتیـن هیـچ نـه ، گـورمـه دیـم
اوشـاق کـن ائیلـه دیـن ، آنـاسیـز فلک
چولقـاتدین کـونلومـی ، درده ، مـاتمـه
گـونـلری قـویمـادیـن ، عـزاسیـز فلک
مجنون ائتدین سـالدین داغـا داشلارا
نه ده ن قـویدون منی ، لیلا سیز فلک
هاچاندیـر آختاریـر ، گوزوم داغلاری
جیران نه جوردوزسون ،قایاسیز فلک
بالیق تک چکمیشدیم ده نیز حسرتین
دنیـا می ائلـه دیـن ، دریـا سیـز فلک
گـوز یاشلاریم اولـدی ، آراز گئجـه لـر
هانسی گونوم اولـدی ، قـاراسیز فلک
یتیـم لیـق دردینـی سـالـدین جـانیمـا
اوغلون گوروم اولسون ، آتا سیز فلک
دیلک لـر سونـدی لـر ، حسرتلر بیتدی
درد لـریم اولــدولار ، داوا سیـز فلک
من جـوان اولار کـن قـوجاتدین منـی
"رافغی " اولـدوردین ، صداسیزفلک
غفّار حسین نژاد " رافغ "