شب چله - کریمی مراغه ای

ای سنت دیرینه ی ایران شب چله
قارپیز کسرم آدیوا قربان شب چله
آیدین دی بو شیرین گئجه عؤمرون سحرینن
اینسانلارا عبرت دی زمانین گذرینن
گئل آشدی سارالدی تؤکولوب ساقه لرینن
بلبل چیخادانمیر باشینی زیر پرینن
یوخدور داهی گلشن ده غزلخوان شب چله
سن خاطره لر دفتری سن ای شب یلدا
شیرین یوخولار سنده وار ای هیکلی رویا
تاریخ ائلییب سنده نه افسانه لر انشا
ایران قدیمین ائدن آدابینی احیا
یوخدور او گؤزل رسملر ایندی شب چله
سابق بو گئجه کرسی لر ائوده قورولاردی
بیر گردکان هر پایه سی اوسته اُوولاردی
قاقّیلتی دوشوب قئیله قولاقی بورولاردی
شادلیق چوخالیب پاسلی اورکلر دورولاردی
ائو اهلی بوتون خرّم و خندان شب چله
سککیز باش او بیر کورسونون آلتیندا یاتاردی
قارداش باجی آرواد کیشی باش باشه چاتاردی
افسوس او وحدت او محبت ده قوتاردی
گل بیرده دییاخ جان ائشیداخ جان شب چله
قار کوچه ده دامدان اوجا ، کوچه باجا بوزلیق
ملّت هامیسی کئفده نه آجلوق نه سوسوزلیق
سو قیمتینه هر نمنه بوللوخ اوجوزلیق
شیرین ناغیلا کرسی باشیندا یوخوسوزلیق
یاغ تک یاییلاردی جانا آی جان شب چله
آماده ائده ردوخ شام اوچون  یاغلی یاواننان
دولما کله جوش ریشته پیلو یاخشی یاماننان
قارپیز کی قالیر پامبیق ایچینده نه زاماننان
شوق ایله چیخاردی اون ایچینن یا ساماننان
ائل طایفا گلردی بیزه مهمان شب چله
داش بارداقین حوضیک ده کی پقیلداماقیندان
کرسی اوسته کومور سمَاوری تُقیلداماقیندان
تازه گلینون سوز باشی پقّیلداماقیندان
شیرین ننه نین هر گئجه نیقَیلداماقیندان
وار سس قولاقیمدا هله پنهان شب چله
یئل دربه چیه پنره ییه توققا ووراردی
طوفانلی کولک قارلاری اون تک سووراردی
ساژ تندیرین اوسته آنا قوورقا قووراردی
شیرین یاشاییشلار مگر اینسانی یوراردی
یاشلار یوزه دوخسان یوزو دوخسان شب چله
اما بو گئجه قارپیز اولوب افضل اعمال
قارپیز کسنه یوز چوورَر شانسیلا اقبال
قوچ قیمتینه قارپیز آلا بول سن اگر آل
گئت وام گوتی آل کفلته تلخ اولماسین احوال
قارپیزسیز اولا صبح یوخ امکان شب چله
قارپیز نئجه قارپیز دیه سن قرمزی قاندی
یوخ قان دئمه قارپیز بابا قانداندا گراندی
بیچاره کاسیب باخما کناردان گئچ آماندی
هم طبعی سویوخ همده وباسیره زیاندی
آت منکذیرادمله قولونجان شب چله
قیش گلدی قیلیش تک کسه طوفاندی سویوخدو
بیر عده یه وار اولسادا بیر عده یه یوخدو
پول یوخ گلیر آز کلفت آغیر خرجی ده چوخدو
بیر کیلو یاغ اوسته باس آ باسدی
بیر جمعه اولوب شان غریبان شب چله
اولموش بیزه بیر دشمن چانی باها چله
آلمیش هامی دان تاب و توانی شب چله
قورتادیلا خون ضعفانی شب چله
زنجیره چکیب پیر و جوانی باها چله
آللاه ائله سین عدلیله دیوان شب چله
دستی لباسین اون مینه وار کیمده بو قدرت
آز چوخ تاناکورا ائلییب ملتی راحت
تویدا کراوات باغلیری کند ده مشه نعمت
اوش یوز تومنه بیر کت آلیب کبلا هدایت
هم پارچاسی اعلادی هم ارزان شب چله
بئش یوز تومنه بیر دون آلیبدی ماما زیور
وئرمز اونی بئش مین تومنه ایندی بوتیک لر
گؤر نه تازا بیگ تک بئزه نیبدی مشه یاور
بیر پالتو آلیب آستاری مخمردی سراسر
قیش دا آدی پالتو اؤزو یورقان شب چله
بولمم او صفا و او صداقت هارا گئتدی
افسوس او وفا و او محبت هارا گئتدی
ائولرده او بوللوق او ضیافت هارا گئتدی
هر زاد صلواتئیدی او قیمت هارا گئتدی
پاسلاندی او اوش آلقالی باتمان شب چله
پوللار یوزودو اللی نه میلیارد نه میلیون
صحبت عاشق عباس کرم اصلیدی نه قانون
نه رادیو نه ویدیو واریدی نه تلویزیون
ایندی بو وسایل هامی خسته هامی یورغون
دائم ایشیمیز ناله دی افغان شب چله
آد قالدی او شادلیق یارادان منظره لرده
پخله یئمیش ایده بورانی شب چره لردن
صبجانیه شور لور خاما قئیماق کره لردن
غم سیل تک آشیب داشدی بوتون بند بره لردن
سالدی باهالیخ عالمه طوفان شب چله
ایندی گئجه صحبت لر اولوم جمله سیاسی
شاهنامه یئرین قابشادی قانون اساسی
سیندیردی کوراوغلو سازینی ییغدی پالاسی
درندو دبیمیز اؤلکه میزین گئتدی صفاسی
ائتدیخ او گؤزل نعمته کفران شب چله
آشپازخانامیز مطبخیدی قاره سوواخلی
تندیرده کومور کؤلمه ییمیز ساخسی دووارلی
پالتارلاریمیز ساده یا تازه یا یاماخلی
مدبازلیغیمیز کله نمیزی قویدو چوماخلی
شیرین سویو ائتمیش بیزه قطران شب چله
اوشدو برکت قالدی آغیزلار دادا حسرت
گلدی باهالیق قالدی هامی هرزاده حسرت
دوس دوستا قوهوملار قوهوما یاد یادا حسرت
درد اولدو توکنمز کیشی یه آروادا حسرت
ارلدوردو بیزی حسرت و حرمان شب چله
بیر ده او قناعت او فراغت اله گلمز
دیلشادلیغیمیز ارخئیین اولما گله گلمز
دار گؤزلره بیرده او گنیش حوصله گلمز
میراث نیاکان اله دوشمز هله گلمز
سن ده ده ییشیلدی قوساسان قان شب چله
تشریفات آغیرلاشدی بورونلار هاوالاندی
ایندی هامینین ظاهری ساز وضعی یاماندی
هی سکته فشاردی سرطاندی یرقاندی
از بس کی مریض چوخدو ویزیت ده باهالاندی
هئش دردریمزه یوخ داوا درمان شب چله
وابسته لیغین داشینی آتساخ آغالیخدان
گؤز یومساخ اگر شرقیله غربه گدالیخدان
باش ساخلییابیلساق باشاباش خودکفالیخدان
آزاد اولاریخ قحط و قلادن شب چله
دونیامیز اولار روضه رضوان شب چله
آرواد داخا دور قارپیزی فاللا سؤز اوزاندی
غم اوئیله مه غم رشته افکاری پوزاندی
هرکس غمی آتدی دمی توتدو او قازاندی
دور قارپیزی قاشلا گئجه قورتولدو اذاندی
طولانیِ شب های زمستان شب چله
بوننان سورا آختارما کریمی ده کرامت
نه روز سعادت گؤره سن نه شب رحمت
قار تک یاغاچاخ باشیمیزا فقر و فلاکت
راضی اولاخ آللاه وئره نه اهل قناعت
شاید بیزه اولسون شب غفران شب چله
*

تئله باخ آللاه تئله باخ - زلیم خان یعقوب

تئله باخ آللاه تئله باخ

سازدی بو ، اولسون دو بو

تئله باخ آللاه تئله باخ

پرده اوسته دالغالانان

کوله باخ آللاه کوله باخ

بیر دلی سوو آتدی گئنه

چاققی چاتا چاتدی گئنه

یئری گؤیه قاتدی گئنه

زیله باخ آللاه زیله باخ

اوچان بندیم قارام اولدو

یانان ، داغیم دره م اولدو

ماحمود دؤندو کرم اولدو

کوله باخ آللاه کوله باخ

نفسی تر ، نغمه سی تر

خان اصلی نین دویمه سی تر

آچیلیبدی گوموش کمر

بئله باخ آللاه بئله باخ

داغدا قیامت قوپاران

دؤشده سینه سی قاباران

سارانی چکیب آپاران

سئله باخ آللاه سئله باخ

اوره ییمی قان ائیله ین

باغریمی شان – شان ائیله ین

منی زلیم خان ائیله ین

ائله باخ آللاه ائله باخ

زمانه - عاشق حیدر

زمانه

آی آقالار بیر زمانه گلیبدی / ای آقایان زمانه ای رسیده

ائو صاحابی دای مهمانی به یه نمیر / صاحبخانه مهمان را نمی پسندد

اوشاقلار بؤیویوب جاوان اولوبدور / بچه ها بزرگ و جوان شده اند

باج اوغلولار دای خالانی به یه نمیر / خواهرزاده ، خاله را نمی پسندد

قدیمین دب لری ایستیر ییغیشا /  آداب و روسوم قدیمی دارند از بین می روند

عقلیمه گلمیین لر گلیر باشا / آنچه به عقلم نمی رسید دارد به سرم می آید

ایندی حوققا قویور قارداش – قارداشا / حالا کلک می زند برادر به برادر

دئییر حقم ، حق اولانی به یه نمیر / می گوید حقم و حق را نمی پسندد

بایرامدا بیر دفه یئییردیک دویو / یک باردر عید  برنج می خوردیم

قئینردی قازاندا جیزلیغین پی یی / توی دیگ چربی جغوربغور می جوشید

ایندی بورونلارا ده یه نده آبگوشون ایی / حالا وقتی بوی آبگوشت به بینی می رسد

پیتزا آختاریر دای شوربانی به یه نمیر / پیتزا می خواهد و شوربا را نمی پسندد

یازیرام بو سؤزو من یانا – یانا / می نویسم با جگری پرسوز

منی باغیشلاسین او مهربان آنا / مرا ببخشند مادران مهربان

ائله بیر ایش گؤردو خانیم قئین آنا / کاری کرده مادرشوهر با عروس

دای گلین لر قئین آنانی به یه نمیر / دیگر عروس ها مادرشوهرها را نمی پسندند

عاشق حیدر چوخلو دالی قالیبدی / عاشق حیدر خیلی عقب مانده

یامان اؤزون دردسره سالیبدی / خودش را عجب توی دردسر انداخته

بئش گون گئدیب نخجوان دا قالیبدی / پنج روزی در « نخجوان »  مانده

قئییدیب گلیب دای دویجانی به یه نمیر / برگشته دیگر « دویجان » را نمی پسندد
 عاشق ممد فرزانه نین سسینن قولاق آسین

کیم اگر توبه ائدرسه - ائلشن خزر

کیم اگر توبه ائدرسه
اوزو آللاها گئدرسه
اونا جنت اولاجاق دائما قیسمت
بودور اصلینده سعادت ابدیت
ییغدیغین مال قیسسا مدتچاتاجاق کاریوا قارداش
بونو درک دئیلیه سن کاش ، قوجالیرسان دای ، اؤتور یاش
گله جک واخت ، قویاجاخلار سینه وین اوستونه بیر داش
قالاجاقسان ائله چاش -  باش
او زامان درک ائده جکسن، نه اوغول وار نه ده یولداش
نه ده کی گلمه یه جک دادیوا اوگون ائوده کی داش – قاش
گله جک خیلی وطن داش وطنیندن
توتاجاقلار کفنیندن
دیده جکلر بدنیندن اتیوی هیسسه به هیسسه
بودور غصه ، بودور وحشت،  بودور دهشت

و جهنم ده اولان ایستی حرارت، سنی آلاجاق دائما آغوشینه
سن دؤزه جکسن می بونا؟ یوخ
سببی واردی چیلیزسان و ضعیف سن، اؤزووی ساتما حیف سن
چوخو آزنان ده ییشیرسن نه حیف سن
آرادا باشیوی قالدیر گؤیه بیر ائیله نظر
یاتما بشر، گؤرنه قدر کوره سماده دوزولوب دور اله ییر
کیم بولارا امر ائله ییر، گؤر بو بش فیکر ائله ییرکی
بیری توققوشسا بیرینن داغیلار کولو و عالم ، یاشاماز بیر نفر آدم
دئملی بوردا نظام وار یارادان وار
آچ اوخو ائوده قرآن وار و نیشان وار
گؤره جکسن کی ، یاغیشی کیمدی سپن یئر اوزونه
هم بولودو پرده کیمی کیمدی چکن یئر اوزونه
بو قدر بیتکی لری کیمدی اکن یئر اوزونه
اطرافیوا باخ نه قدر نوع دا چیچک وار
هره سینده اؤزونه مخصوص اولان رنگ و بزک وار
او چیچکدن اؤزونه روزو تاپان قورد و بؤجک وار
کپنک وار، بیری ایستهسال ائلیر بال، او بیری قورددا ایپک وار
هامیسین گؤز گؤرور آشکار، بولاری خلق ائلین وار
نه ائدیبدور سنی وادار، ائده سن آللاهی انکار
سببی واردی جهالتدی، یعنی غفلت
نیه سن آلمادین عبرت، او گئدنلر نه آپاردی؟
بو حیات سانکی قطاردی
سنی ده میندیره جکلر، ائلییب سورقو و سوال دیندیره جکلر
دئیه جکلر جوابین، بو قدر مال کی ییغیبسان
حسابین وئر، کیتابین وئر
قالاجاقسان او زامان لال
ووراجاقلار او یئکه بوینووا قاندال
قوراجاقلار یئکه تونقال یاناجاخسان
نه قدر مال کی ییغیبسان داناجاخسان
نه قدر حقه گیریبسن هامیینی آختاراجاخسان
ییخیلیب یالواراجاخسان، اؤپه جکسن اولارین ال آیاغیندان
توتاجاخسان بالاغیندان دئیه جکسن کی ایلاهی
بو گوناهی ائله ین من، بونو اینسان ائله مزدی
نه ده حیوان ائله مزدی، نیه کی من ائله دیم ملته شیطان ائله مزدی
چکرک اه، دئیه جکسن منی قایتار گئری آللاه
ائله ییم نفسیمی اصلاح، دئیه جکلر: داها گئجدی بو عؤمور مدتی کئچدی
بونو دونیادا ائده یددین، ابدی نورا گئده یدین
توتاجاخلار او یالانچی که کولوندن ائله محکم
سورویوب آتشه دوغرو آتاجاخلار، چکسن غم
دئیه جکلر: سنه دور دائمی مسکن ، بو جهنم بنی آدم
بونو یازدیم « شعرا» سوره سینین حقین ادا ائتمه ک اوچون منی
دوشونن، درک ائده سن سن، جمعیت له برابر اولاسان تن
رسول الله دا قیامت ده ، بویورسون حاجی ائلشن سنه احسن
بورادیر حقی دئین بنده لره دائمی مسکن
بویورون جنت اعلایه بو بو اوزدن