Sonntag, Dezember 01, 2013

اورمو گؤلو - وحید شکرزاده

اورمو گؤلو نه لر گلیب باشینا ؟
قورودورلار نییه بو آز یاشینا ؟
قوربان اولوم او دوزلو گؤز یاشینا
نییه سنین گؤزون یاشین سیلن یوخ ؟
آخی ندن سنی درمان ائدن یوخ ؟
اورمو گؤلوم ندیر سنین گوناهین ؟
یوخدور سنین بیزدن سونرا پناهین
آلمامیسان هئچ بیر اینسانین آهین
سنین سودا کی بیر نفر اؤلن یوخ
آخی ندن سنی درمان ائدن یوخ ؟
بیر زامانلار چیمردیک قوجاغیندا
قویلاناردیق شفالی تورپاغیندا
سوسوز قالیب دیر دیلین ، دوداغیندا
نییه چایلار باغلانیب دیر گلن یوخ ؟
آخی ندن سنی درمان ائدن یوخ ؟
اورمو گؤلوم اولدون بیزه سن آنا
اینصاف دئیل قویاق اوره یین یانا
اولماز ائولاد کی اؤز آناسین دانا
دوزلو دنیز سندن کیمسه کوسن یوخ
آخی ندن سنی درمان ائدن یوخ ؟
آذربایجان قلبی سنده دؤیونور
سن اولماسان یوردوم اؤلو گؤرونور
میللت سنسیز باشقا یئره کؤچونور 
نییه سنین دردینی هئچ بیلن یوخ ؟
ندن آخی سنی درمان ائدن یوخ ؟
دوز یئتدی گون یاتدیم اورمو گؤلونده
آلدیم سندن " دوزلو اوغلان " سؤزونده
اوخویورام سنین آغلار گؤزونده
آذربایجان گلینینی سئون یوخ ؟
آخی ندن منی درمان ائدن یوخ ؟
*

Keine Kommentare: