قان آخیر دنیادان

قان آخیر دنیادان – رقیه عبدلی ( سازاق )

تک اولان او آللاه هانیسان هانی
یوخسا دهییشمیسن سن ده دونیانی
بیر هیم دئ، بیر دانیش، قورتار دعوانی
اومود تک آللاهسان سن ده آتیبسان
قان آخیر دونیاندان هاردا یاتیبسان
*
آل یازیق یاخامی یئر آللاهیندان
یا گؤستر اؤزونو یا دونیانی دان
باجارسان اؤزون ده یئنیدن یاران
باشقا دونیالارا ایرم آتیبسان
قان آخیر دونیاندان هاردا یاتیبسان
*
دوشوب بیر- بیرینین جانینا بشر
سنه اییلنده قارداشین دئشر
سانیردیم ایری ال گؤزوندن دوشر
دوز یول گئدنلری هاچان ساتیبسان
قان آخیر دونیاندان هاردا یاتیبسان
*
اته یینین اوجون گزیرم توتوم
آجیمدان داها یوخ اینجاریم، قوتوم
گؤیلردن یئنیبسن اولوبسان بوتوم
دئیهسن دونیانی اؤزون قاتیبسان،
قان آخیر دونیاندان هاردا یاتیبسان
*
بیری آللاهلیقدا چاپماقدا جیلیر
بیر آللاه سن یازان عؤمورو سیلیر
بیری ده ائتمکده هرنه وار بیلیر
آللاهلار ایچینده ایتیب باتیبسان
قان آخیر دونیاندان هاردا یاتیبسان
*
اوشودوم سازاقدان آل قوللارینا
بیر باشقا گونش وئر دوز یوللارینا
طوفان سال یوللارین ساغ سوللارینا
اولمویا یورولوب سونا چاتیبسان
دیلیم لال سن ناحاق قانا باتمازسان
تک اولان آللاهسان امین یاتمازسان
*

باجارمالیسان

شاعر: زلیم خان یعقوب
صونا تک بویلانیب، گؤزل تک باخیب
گلین تک گزمه یی باجارمالایسان
اوچوب الیمیزدن گئدن ایللری
نظاما دوزمه یی باجارمالیسان
*
دوز دره یه دؤنسه، دره دوز اولسا
جوشان دالغالارین سایی یوز اولسا
آیریلیق ساحیل سیز بیر دئنیز اولسا
قول آتیب اوزمه یی باجارمالیسان
*
قوی زایا گئتمه سین چکدیین امک
دوستوم مین اولسادا، سن ده دیر کمک
نه لازیم هر سؤزو دیل آچیب دئمک
باخیشدان سزمه یی باجارمالیسان
*
چوخدو زلیم خانین دوغماسی یادی
چالیش ائل ایچینده ائنمه سین آدی
اونسوز دا وصالین شیرین دیر دادی
حسرته دؤزمه یی باجارمالیسان
*

پاییزلا من

پاییزلا من – سحر خیاوی
منیم ده ساچلاریم بویالی سن تک
منیم ده شاخامدان قارانقوش کؤچوب
من ده سنین کیمی خَزَل‌لنمیشم
منیم ده قوشلاریم باشیمدان اوچوب
*
توتولور هاوام دا یامان دال‌بادال
بورویور چَن، دومان اوره‌ییم گؤیون
پیرتلاشیق کَلَف تک هئی قیوریلیرام
مین بارماق آچانمیر حالیمدان دویون
*
ایندی من قالمیشام، سویوق پنجره‌
تؤکولور خزل‌لر، سولور چیچک‌لر
داها بوش سوفره‌لی کیچیک باغچاما
قوناق گلمه‌ییرلر ناز کَپه‌نک‌لر
*
قدم قوی بو گئجه یالقیز اوداما
صوبحه‌دک دردلشک، چوخلو چایلاشاق
دئییرلر: بؤلوشسن دردی یونگولر
اوندا گل سنین‌له دردی پایلاشاق
*
قویوم قاباغینا آلما، قوز، اوزوم
بویاقلی ساچینا اینجی‌لر دوزوم
دئییم خوش گلمیسن آی منیم اؤزوم
گل گولوم سنین‌له ائکیزتایلاشا!
*
اوز- گؤزون غملی‌دیر، اللرین یالین
سازاقدان گئیمیسن اَینینی قالین
نه یاخشی بیلیرسن دوستلوغون یولون
قوینونا آل منی بیر قوجاقلاشاق
*
صاباح دا گئده‌ریک خیاوچایینا
باخاریق طبیعت قیزی بویونا
قوشوللوق ائلیمین شنلیک، تویونا
ال-اله، قول- قولا گَل سیجاقلاشاق
*
یئریییب خزلده سئودالی، مَلَنگ
باغلاریق چؤللرین گولوندن چَلَنگ
ییغیشسین دونیادان هر نه توپ، توفنگ
غریبسن؟ عئیبی یوخ، یالقوزاقلاشاق
*
منبع: سایت ایشیق

توی گونودور

شاعر: زلیم خان یعقوب
توی گونودور بو مجلیسین به یینه باخ
چال – چاغیرا، کامانینا، نی ایینه باخ
طبیعتین یئرینه باخ، گؤیونه باخ
عؤمروم چاتیب بیر شوهرته، شانا بوردا
*
بو دونیانین هر غمیندن اوزاق اولور
سئوینجیندن، آشیب – داشیب، اوشاق اولور
اؤز – اؤزونه بیر چاغلایان بولاق اولور
قلبی اولان چکیلرمی یانا بوردا؟
*
باش اؤرپه کلی، یاخا قیزیل دویمه لی دیر
قاپی لار وار، الچی الی دؤیمه لی دیر
کیمه باخسان بیر – بیریندن اؤیمه لی دیر
سئون اوغلان، گؤزل لری سانا بوردا
*
گونش دوغوب بو وارلیغا، بو حیاتا
گلیشینده داغ ووقارلی، گولور آتا
بیر هاوانین لای لا سینا یاتا – یاتا
قوللارینی گنیش آچیر آنا بوردا
*
بیر جان اولسون یئرین سسی، گؤیون سسی
کسیلمه سین قولاقلاردان نی یین سسی
تویچو قارداش، ائله چال کی، تویون سسی
قوی ایشله سینلاپ ایلییه، قانا بوردا
*
یؤز سینه دن آخسین گوموش چای لار کیمی
شیرین اولسون دوسدان گلن پای کیمی
آنین عؤمروقوی اوزانسین ای لار کیمی
گونون عؤمرو هئچ چاتماسین سونا بوردا
*

من اوره یی اورک کیمی ساخلامادیم

شاعر: زلیم خان یعقوب

من بیلمه دیم، سینا بیلیر، یانا بیلیر
من اوره یی اورک کیمی ساخلامادیم
نه بیلئیدیم بوز باخیشدان، دونا بیلیر
من اوره یی اورک کیمی ساخلامادیم
*
قوهوم گلدی، قونششو ییغدی، یاد آپاردی
غم لی گلن، قیسمتینی شاد آپاردی
اودو سؤنن اوره ییمدن، اود آپاردی
من اوره یی اورک کیمی ساخلامادیم
*
خیره – شره، تویا – یاسا، بویور دئدیم
طالعیمه « یارالانمیش چویور»  دئدیم
« اؤزون قیزدیر، هاردا کیم اوشویور» دئدیم
من اوره یی اورک کیمی ساخلامادیم
*
درد داغینی کولونگ چالان فرهادییام
توسدوسویم، دومانی یام، فریادی یام
اؤز قلبیمین قان ایچه نی، جلادی یام
من اوره یی اورک کیمی ساخلامادیم
*
یئری گؤیه، گؤیو یئره، باغلا دئدیم
آلیش دئدیم، توتوش دئدیم،چاغلا دئدیم
باس گؤره نده، هونکور – هونکور، آغلا دئدیم
من اوره یی اورک کیمی ساخلامادیم
*
دئولت یوکو،ملّت یوکو، شوهرت یوکو
بو ملّتین ایچینده کی ، ذلّت یوکو
بو یوکلرین آلتینداکی زحمت یوکو
من اوره یی اورک کیمی ساخلامادیم
*
من اوره یی چیچک کیمی ساخلامادیم
یاغ ایچینده بؤیرک کیمی ساخلامادیم
هئی اریتدیم، هئی چوروتدوم، هئی قاناتدیم
من اوره یی اورک کیمی ساخلامادیم
*
هونکورن داغ دؤشوندن قایا قوپدو
آغلایاندا بوش بوشونا آغلامادیم
من اوره یی اورک کیمی ساخلامادیم
ساخلامادیم، ساخلامادیم، ساخلامادیم
*

دلی اولماغیما بیر آددیم قالیر

شاعر: زلیم خان یعقوب
بیلمیرم هئچ نه یی ، هله، بیلمیرم
من کیمم، نه چی یم، هله بیلمیرم
گئتمیشم، اؤزومه گله بیلمیرم
دلی اولماغیما بیر آددیم قالیر
*
عؤمرومون بو یاشدا ناغیلینا باخ
ناغیل دی، آی آللاه ناغیل، اونا باخ
عاغیل سیز عشقیمین عاغیلینا باخ
دلی اولماغیما بیر آددیم قالیر
*
ال آچار سئوگیمین الی اوتانماز
خیرمنی ایش گؤره ر، ولی اوتانماز
یییه سی اوتانار، دلی اوتانماز
دلی اولماغیما بیر آددیم قالیر
*
بیلمیرم ، هیچ نئچه یاشیندایام من
عشقین ایشتاهیندا، آشیندایام من
اوچرومون، یارغانین قاشیندایام من
دلی اولماغیما بیر آددیم قالیر
*
اشارا ییخاجاق، هیم آپاراجاق
الیمی ساز یئییب سیم آپاراجاق
منی ائویمیزه کیم آپاراجاق
دلی اولماغیما بیر آددیم قالیر
*
مجنون درس اوخویوب کتابی لیلی
مجنون سرخوش اولوب، شرابی لیلی
مجنون درده دوشوب، عذابی لیلی
دلی اولماغیما بیر آددیم قالیر
*
گولمه سین منی بو حالدا گؤره نلر
تر چیچک نه دیرسه، بیلیر درنلر
آیلیلن ای منه عاغیل وئره نلر
دلی اولماغیما بیر آددیم قالیر
*
گؤروش سئوینجیندیر، حسرت آهین دی
سئونلر سئوگیلی بیر درگاهین دیر
زلیم خان، من کیمم، حکم آلاهین دیر
دلی اولماغیما بیر آددیم قالیر
*

بئله دنیا - زلیم خان یعقوب

بئله دنیا
آ بستانچی، بستانیینا گووه نمه
دنیا اؤزو بستان اکن دنیادی
آغلار قویوب آناسینی توپراغین
برکتین گؤیه چکن دنیادی
*
ایری سی ده ، دوغروسودا، یالاندی
یولو کسیب بختی الدن آلاندی
ایلان کیمی قیوریلاندی، چالاندی
لئیلک کیمی تئز – تئز سکن دنیادی
*
سن گئئه نمه اؤز چکسین دردینی
شِش وئرسه ده، گل اویناتما مردینی
یاشاتمادی نسیمی تک مردینی
باش آپاران زهله تؤکن دنیادی
*
سوراغ ایتر، سیرّ گیزله نر، سؤز باتار
گونش دوغار، عزیزله نر، تئز باتار
آی زلیم خان دیش تؤکولر، اوز باتار
قوردوغونو بیر – بیر سؤکن دنیادی
*
شاعر: زلیم خان یعقوب

 

محبّت - میکائیل مشفق

شاعر: میکائیل مشفق
من کی بیلمزیدیم محبّت ندیر
بو سرّی سن منه آنلاتمادین می؟
دنیایا سیغمایان شاعر کؤنلومو
کؤکسومدن چیخاردیب اویناتمادین می؟
*
من کی نغمه دئییب بنؤوشه لردن
پئشم ذوق آلماقدیر بیر شوخ دلبردن
مندن اوزاق گزیب دولانیب هردن
قلبینی سیخماغا جان آتمادین می؟
*
مین هیجران کؤنلومو آلاندا ائله
ذرّه جه حالیما یانمادین بئله
مشفقون قلبینی تئز آلیب اله
اونو رویالاردان اویاتمادین می؟
*

گَرَک - ملا پناه واقف

گَرَگ ( بولود زولفولو، آی قاباقلی گؤزلیم)

*

بولود اوزلو آی قاباقلی گؤزلیم
دوروبان باشینا دولانماق گرک
بیر ائوده کی بئله گؤزل اولمایا
او ائو برباد اولوب تالانماق گرک
*
اندامی آغ گرک سینه سی مرمر
سیاه زولفو قامتینه برابر
قوینو ایچی قویا مشک له عنبر
باسدیغی تورپاغا یالانماق گرک
*
چیخا سرایندان جانلار آلان تک
خیشمه گله گه – گه قهری اولان تک
شاهماز زولفو دال گردنه ایلان تک
هردن ترپننده بولانماق گرک
*
واقیف سنین ایشین مدام آه اولسون
سگ رقیبین عؤمرو قوی کوتاه اولسون
همدم سیز کیمسه نه اگر شاه اولسون
گدادیر او کیمسه دیلنمک گرک
*

بایاتیلار

بایاتیلار - سلینا بالانین اینستاگرامیندان

*

گؤیده اولدوز سولماسین
چؤرک دوزسوز اولماسن
اوغلانلار اؤز یئرینده
آنا قیزسیز اولماسین
*
آغیز آشما نامرده
اوره یینده درد یاشا
سن اینسان ساز، اییلمه
یوخسول یاشا، مرد یاشا
*
داغ دا اکین اولماز
اکین اولسا بیچین اولماز
دنیادا مین گؤزل اولسا
بیری سن تکین اولماز
*
عزیزیم سن چیچه ییم سن
آرزوم سان دیله ییم سن
من دن اوزاق اولسان دا
چیرپینان اوره ییم سن
*
چایلار سوسوز قالانماز
بدن روح سوز قالانماز
اوره ک بیرین ایسته سه
اوندان ایری قالانماز
*
گؤیده اولدوز ناشی  شی
باجیمین گؤز یاشی دی
قارداشا جانیم قربان
باجی اوره ک باشی دیر
*
گؤزل سؤز یازانام
پاییز آنام، یاز آنام
تانری سایاق، مهربان
قلم فقط یاز، آنام
*
آغلایارلار گولرلر
گؤز یاشینی سیلرلر
کئچن گونون قدرینی
گلن گونده بیلرلر
*
داغا باخیب قهرلنمه
داغین دا داغ دردی اولار
هر بیر شئی دن لکه لنر
آقین دا آق دردی اولار
*
داشین دا داش بختی وار
داشین دا خوشبختی وار
داش وار اوزویه قاشدی
داش وار مزارا داش دی
*
داغلارین لالاسینا
گؤزلرین آلاسینا
خالالار قربان اولسون
باجینین بالاسینا
*
عزیزیم ناچار داریخما
گون گلر کئچر داریخما
بیر قاپینی باغلایان کیشی
مین قاپینی آچار داریخما
*
عزیزیم باج آلماز
دوست دوستوندان باج آلماز
ائولاد وفالی اولسا
آتا – آنا قوجالماز
*
بیر قوش گلیر داغ داشدان
خبر وئریر قارداشدان
قارداش باجی دان دویسا
باجی دویماز قارداشدان
*
بو یئرده گولن اولسا
تریوی سیلن اولسا
قارداشلیق گؤزل شئی دیر
قدرینی بیلن اولسا
*
گمیم گلر یان گئدر
ایچینده بیر جان گئدر
قارداش گلن یوللارا
باجیلار قربان گئدر
*
عزیزیم اولمایایدی
قوجالیق اولمایایدی
قوجالاندا انسانلار
کاش محتاج اولمایایدی
*
عزیزیم ساغلیغیمدا
گؤزللیک ساغلیغیمدا
اولدوکدن نیه لازیم
قیمت وئر ساغلیغیمدا
*
عزیزیم یامان آغلار
اوره کدن یانان آغلار
زامان ائله اولوب کی
داش آتدا سامان آغلار
*
اورمو گؤلو یاتما دور
دردی غمه آتما دور
جور جفادان قیزاردین
سن بو ائلی آتما دور
*
یئل گلدی گول آپاردی
سوسن سنبل آپاردی
ائل لر گلین یاردیما
مغانی سئل آپاردی
*
چمن قورور داش قالار
گؤز یومولور یاش قالار
هامی گلیب گئدن دیر
یولداشا یولداش قالار
*
اوخور آغاجدا بلبل
گؤزل دی یایدا سنبل
دنیا اؤلوم – ایتیمدی
وار نقدر عؤمور گول
*
قیز اولماسا دوز اولماز
گؤیلرده اولدوز اولماز
چوخ آنالار قیز دوغار
تورک قیزینا تای اولماز
*
لال سؤزونو آندیرار
ایشینی یوللاندیرار
پیس گونلرده یاخشی دوست
دوستونا جان یاندیرار
*

آی عؤمروم گونوم - جیغاتئل عیسی قیزی

آی اوغرون – اوغرون باخان
منی یاندیریب یاخان
سن کی بختیمه چیخان
گول سن آی عؤمروم گونوم

*
گؤردوم وورولدوم سنه
گؤزل گؤروندوم سنه
بو قدر دوغما منه
کیمسن آی عؤمروم گونوم
*
چیچه ییم سن گؤزومده
نور سپن سن اوزومده
کؤره ننده گؤزومده
نم سن آی عؤمروم گونوم
*
گولوستانیمدا گول سن
یازدان آچان بنؤوشم
بیر – بیر ساچیما دوشن
دن سن آی عؤمروم گونوم
*
جیغا تئلم سن دئییم
سنه من یار سئودییم
دنیادا تک سئودیغیم
سن سن آی عؤمروم گونوم
*

ایسته مه - شاعر: عمادالدین نسیمی

ایستمه
سن سانا گر یارین وار، ای کؤنول یار ایسته مه
یارو دیلدار اول سانا، سن یار و دیلدار ایسته مه
بی وفادور چون بو عالم، کیمدن ایسترسن وفا؟
بی وفا عالمده سن یار وفادار ایسته مه
گول بولونماز بو دیکانلی دنیانین باغریندا چون
ابسم اول، بیهوده گول سوز یئرده گولزار ایسته مه
معرفت دیر خالص آلتون، سکّه سی فضل و هنر
آلتونو تانی، زغل دن عاری دینار ایسته مه
حقّه منکردیر فقیه، اینانما اول شیطانا کیم
یوخدور اول جن خلقنیم ذاتیندا اقرار، ایسته مه
عاری گفتار، ای کؤنول،گرچک لرین نطقی دورور
هر دیلی ایری ده یوخدورعاری گفتار، ایسته مه
جیفه دور دنیا،آنین طالیبلری عادی کیلاب
اولما کلب آنین کیم، اولدو عادی مردار، ایسته مه
شربتی آغولودور فانی جهانین، سان آنین
شربتیندن نوش دارو اومما، زینهار ایسته مه
دنیانین سئوگی سی آغیر یوک ایمیش، مندن ائشیت
نفسینی یوخ ائتمه آنا،ای سبک بار ایسته مه
بیر امین محرم بولونماز، ای نسیمی، چون بو گون
خلقه فاش ائتمه بو رمزی، کشف اسرار ایسته مه

حیدر بابا - محمّد حسین شهریار

کیم قالدی کی بیزه بوغون بورمادی
آتدان - آتدان بیزه کلک قورمادی
بیر مرد اوغول بیزه هاوار دورمادی
شیطانلاری قوجاقلییب گزدیز سیز
انسانلاری آیاقلییب ازدیز سیز
*
اوّل باشی مندن استقبال ائتدیز
سوندان چؤنوب ایشیمده اخلال ائتدیز
اؤز ظندیزجه استادی اغفال ائتدیز
عیبی ی.خدور، کئچر، گئدر، عؤموردور
قیش دا چیخار اوزو قاراکؤموردور
*
حیدربابا گیلئیلیکدن نه چیخار
ظولمون ائوین صبر و تحمّل ییخار
درویش اولان صبرین الین برک سیخار
گل قاییداق، چیخاق آقا  دوزونه
کئچه ک گئنه محبّتین سؤزونه
*
حیدربابا آلچاقلارین کؤشک اولسون
بیزدن سورا قالانلارا عشق اولسون
کئچمیشلردن گلنلره مشق اولسون
اولادیمیز مذهبینی دانماسین
هر ایچی بوش سؤزلره آللانماسین
*

پریشان اولماسن - نصرت کسمنلی

ائله یاشا عؤمرونو سن

ایلین پریشان اولماسین

هر گؤزله گول گؤندرمه

گولون پریشان اولماسین

*

یول گئدنده ایزینی بیل

یورولاندا دؤزومو بیل

سؤز دئیه نده سؤزونو بیل

دیلین پریشان اولماسین

*

تئز بوشالما دولاندا دا

حقیقت گه ز یلاندا دا

ائله یان کی یاناندا دا

کولون پریشان اولماسین

*

درده کؤنول باغلایاندا

گیزلی اغلا آغلایاندا

گؤزونده غم چاغلایاندا

سئلین پریشان الماسین

*

پریشان نشود

چنان زندگی کن

که سالت پریشان نشود

به هر زیبائی دل نبند

تا گلت پریشان نشود

*

وقتی راه می روی ، ردت را بدان

وقتی خسته می شوی تحمل را بدان

وقتی حرف می زنی حرفت را بفهم

تا زبانت پریشان نشود

*

به هیچ کس دروغ نگو

تا بعد از دروغ به غم و درد نیفتی

به هر اجاقی دست درازی نکن

تا دستت پریشان نشود

*

زود دلت را خالی ننک وقتی دلگیری

با حقیقت زندگی کن ، حتی در بین دروغ

چنان بسوز که هنگام سوختنت نیز

خاکسترت پریشان نشود

*

وقتی به درد دل می بندی

چنان گریه کن که هنگام گریه ات

وقتی غم در چشمانت زیادمی شود

سیلت پریشان نشود  

*

الهی - میرزا علی اکبر صابر

الهی
داش فلب لی اینسانلاری نئینیردین الهی ؟
بیزده ک بو سویوق قانلاری نئینیردین الهی ؟
آرتدیقجا حیاسیزلیق ، اولور ائل متحمل
هر ظلمه دؤزه ن جان لاری نئینیردین الهی ؟
بیر دؤرده کی ، صیدق و صفا قالمییاجاقمیش
بیلمه م بئله دورانلاری نئینیردین الهی ؟
مظلوملارین گؤزیاشی دریا اولاجاقمیش
دریالاری ، عمانلاری نئینیردین الهی ؟
صیاد جفاکاردا رحم اولمویاجاقمیش
آهولاری ، جئیرانلاری ، نئینیردین الهی ؟
باغین ، اکینین خئیرینی به گلر گؤره جه کمیش
توخم اکمه گه دهقانلاری نئینیردین الهی ؟
ایش رنجبرین ، گوج اوگوزن بیر اوزونون کو
به گ زاده لری ، خنلاری نئینیردین الهی ؟
حکم ائیلیه جه کمیش ، بوتون عالمده جهالت
دلداده عرفانلاری نئینیردین الهی ؟
سیرتوق ، مسلمانلاری تکفیره چکن بو
دوشگون مسلمانلاری نئینیردین الهی ؟
یا خود بولارین بونجا نفوذی اولاجاقمیش
بئش ، اوچ بو سخندانلاری نئینیردین الهی ؟
غئیرتلو دانوشبازلاریمیز ایش باشارارکن
تنبل دلی شئیطانلاری نئینیردین الهی ؟
ارلر هره بیر قیزکیمی اوغلان سئوه جه کمیش
ائولرده کی نیسوانلاری نئینیردین الهی ؟
تاجرلریمیز ( سونیا ) لارا بند اولاجاقمیش
بدبخت ( تکذبان) لاری نئینیردین الهی ؟
سبحانک ، سبحانک ، سبحانک ، یارب
باخدیقجا بو حکمتلره حئیران اولورو هپ
*
ترجمه فارسی
الهی
انسانهای سنگدل را برای چه آفریدی الهی ؟ ( منظور چرا آفریدی )
خونسردهائی مثل ما را برای چی آفریدی الهی ؟
هر قدربر بی حیائی افزوده می شود : ملت تحمل می کند
جانهای متحمل به هر ستمی را ، برای چه آفریدی الهی ؟
اگر قرار بود در این زمان صدق و صفا نماند
نمی دانم این دوران را برای چه آفریدی الهی ؟
اگر قرار بود اشک مظلومان دریا شود
دریاها و عمانها را برای چه آفریدی الهی ؟
اگر قرار بود صیاد جفاکار رحم نداشته باشد
آهوان و گوزنها را برای چه آفریدی الهی ؟
اگر قرار بود بهره باغها و مزارع را خانها ببرند
برای کاشتن تخم ، دهقان را برای چه آفریدی الهی ؟
اگر قرار بود بار کار و تلاش بردوش رنجبر باشد
خان زاده ها و خان ها را برای چه آفریدی الهی ؟
اگر قرار بود جهل در جهان حکومت کند
دلداده ها و عرفا را برای چه آفریدی الهی ؟
پرروئی که موجب کفر مسلمانان می شود
پس این مسلمانان را برای چه آفریدی الهی ؟
یا اگر قرار بود نفوذ اینها تا این اندازه باشد
سه چهار سخندان را برای چه آفریدی الهی ؟
در حالی که دانشمندان باغیرت ما اردان هستند
شیطانهای دیوانه و تنبل را برای چه آفریدی الهی ؟
اگر قرار بود مردان ، هر کدام پسرهائی را به جای دختر ( بعنوان سوگلی ) بخواهند
زنانی را که در خانه اند برای چه آفریدی الهی ؟
اگر قرار بود تاجرهای ما شیفته ( زنان … ) بشوند
زنان ( توی خانه ) بدبخت را برای چه آفریدی الهی ؟
*
سبحانک ، سبحانک ، سبحانک ، یا رب
وقتی این حکمتهایت را می بینم حیرت زده می شوم
*

میرزا علی اکبر صابر

ار دئدی : آغلایورام بسکی اوزوم چیرکین دیر

ایلده بیر گؤرسه م اگر آینه ده صورتیمی

عورت عرض ائیله دی : یاهو سنی هر گون گؤرورم

نه قدیر آغلایورم شیمدی دوشین حالتیمی

*

جنت ده کی حوری لری ، قلمانلاری آللاه

قاودیم دییه بیر وحی ایله ائتسه سنی افهام

زاهد ، من اولوم گیزله مه آچ صدقینی سویله

سن بیرده ائده رسن می نماز امرینه اقدام؟

*

هپ کیچیکلر کیچیک ایکن بؤیویور

او نه دیر کی بؤیوک ایکن کیچیلیر؟

بو کیچیلمک فقط مسلمانین

بوینونا هر بیر امرده بیچیلیر؟

*

غافل یاشاماقدان سا گؤزل کار دیر اؤلمک

هر چند که غفلتله دخی هار دیر اؤلمک

زنجیر جهالتده بو آلچاق یاشاییشدان

جاهل ، سنه دار اوزره سزاواردیر اؤلمک

*

من اوگون باشلادیم انسان اولماغا - حاتم احمدی

سلام تانری
من اوگون باشلادیم آدام اولماغا
تانرینین گؤز یاشین بیری سیلمیردی
قاپی دا قالمیشدی پولسوز بیر کیشی
اوتانیب ائوینه گئده بیلمیردی
*
من او گون باشلادیم انسان اولماغا
گئرچکلر اوره یین بندین قیریردی
بئش اوغول بؤیودن قهرمان آنا
قوجالار ائوینده جان تاپشیریردی
*
بیر او گون باشلادیم انسان اولماغا
قارداش ییخیلمیشدی قارداش یانیندا
بویا چاتمیش اوغول اؤز آتاسینین
اوزونه قاییتدی یولداش یانیندا
*
من اوگون باشلادیم انسان اولماغا
آنلادیم بو دنیا پاسلی دمیردی
غملی سویقونوندا بیر کؤرپه اوشاق
اؤلن آناسینین دؤشون امیردی
*
من او گون باشلادیم انسان اولماغا
اولمایان مئشه یه آغاج اکدیلر
دیبیندن کسدیلر یاشیل آغاجی
کاغاذلار اوستونه شکیل چکدیلر
*
من اوگون باشلادیم آدام اولماغا
ملت ظلم ائده نه قارشی دوروردو
همان اعتراض دا غملی بیر پلیس
آغلایا – آغلایا اوغلون ووروردو
*
من اوگون باشلادیم آدام اولماغا
قیشدا یوخسوللارا دنیا دار اولدو
تانری باخدی – باخدی بیردن آغلادی
شاخدادان گؤز یاشی آخدی قار اولدو
*
من اوگون باشلادیم انسان اولماغا
بیرجه کؤک قویونو بیریان یئدیلر
بیر وئدره آیران دا ایچدیلر آمما
ائوین صاحبینه چوبان دئدیلر
*

بایاتیلار

دئدیم شیرین اول دیلیم
بیر آز حلیم اول دیلیم
سن کی کوسدوردون یاری
دیلیم - دیلیم اول دیلیم

*
قرنفولم دسته یم
بولبولم قفس ده یم
خبر وئرین یاریما
حسرتیندن خسته یم

*

گؤی ده اولدوز اللی دیر
اللی سی ده بللی دیر
سئویله جک گؤزلین
گؤزلریندن بللی دیر
*
عزیزیم نازلی یاریم
باشیمین تاجی یاریم
اوزونده گؤز ایزی وار
سنه کیم باخدی یاریم

*

لئچه یی دوشوب باشدان
کئچمه رم قارا قاشدان
سنین آلا گؤزلرین
چیخاردیب منی باشدان

*

بو داغلار قالا داغی
بورویوب لالا داغی
هر داغ اولسا چه کیلر
چه کیلمز بالا داغی
*

سو گلدی دولدو بنده
آخدی تؤکولدو کنده
اوره ییمه اود دوشدو
یار بوینونو بوکه نده

*

صیاد داغدا توز قورماز

قوروب بوینونو بورماز

سینیق قابا پینج قویسان

گئنه گئده ر سو ، دورماز

*

سئل گلر دوزه باخماز

قونور گؤز گؤزه باخماز

یاری اوره کدن سئون

هر دئیه ن سؤزه باخماز

*

فلکین بیر گولو وار

سینه مده دوگونو وار

سن بو گونه شکر ائیله

بوندان بئتر گونو وار

*

بو داغلار قوشا داغلار

وئریب باش - باشا داغلار

یاریم سن ده گزیب دیر

سنی یوز یاشا داغلار

*

بولاق اوسته داش اولایدیم

سو ووردوقجا یاش اولایدیم

یار بولاغا گلن زامان

اونونلا یولداش اولایدیم

*

بولاغ اوسته دوران گؤزل

قولتوغوندا قرآن گؤزل

قرآن سنه غنیم اولسون

اؤز عهدینی دانان گؤزل

*

دره دیبی داغ اولسون

اتکلری باغ اولسون

اؤزگه دن هارای اولماز

منه یانان ساغ اولسون

*

منی جانیم یاندیریر

قاینار قانیم یاندیریر

عالمی اود یاندیرار

منی خانیم یاندیریر

*

صیاد الده کماندیر

اوخون آتما آماندیر

یاری انتظار قویان

یار دئییل پیس زاماندیر

*

قلبی قارا قازاندیر

دیلیم عرضه یازاندیر

فلکه بئل باغلاما

فلک پرگار پوزاندیر

*

منی ووردو بوز ایلان

گؤزوم دولدو توزیلان

منیم کیمی وارمی هئچ

بوستانی گؤی پوزولان؟

*

گؤرونور اذان یئری

قبرینی قازان یئری

گؤه سن بیرده گؤرم

گول آتام گزن یئری؟

*

قوشا باخ ها قوشا باخ

قانادی سینمیشا باخ

عالمه یاغیش یاغدی

بیزه یاغان داشا باخ

*

 

بایاتیلار - تبریز

تبریز اوستو میانا

گول سونبوله دایانا

اوخو بلبلوم اوخو

یاتمیش بختیم اویانا

*

تبریز اوستو مراغا

تئلیم گلمیر داراغا

منیم یاریم اوشاقدیر

اؤرگتمیون عاراغا

*

تبریز اوستو گونئیدی

شوشه لر دولو مئی دی

یاردان بیر کاغاذ گلدی

بوتون عرضی گیلئیدی

هارا گئدیرسن

هارا گئدیرسن - حاتم احمدی
دوشوبسن یوللارا هارا گئدیرسن
آرخانجا سورونور بیر یانان اورک
غم – کدر داغیلیر آددیملاریندان
ندن دیر گئدیرسن من بیلیم گرک
منه سؤز وئرمیشدین گؤروشن زامان
آیریلیق آدیندان نفرتین گله
نه من آیریلانام نه سن آیریلان
سنی بو امیدنن گتیردیم اله
هر نه یین حدّی وار انصافین اولسون
سنه محبتیم آرالماییبدیر
سئوگیله دوروبدور اوره ییم منیم
آیریلیق دردینه یئر قالماییبدیر
نه اولدوبدور سنه اؤز اوره ییندن
گؤزوندن گؤرونمور سئوگیدن اثر
هئچ نه غم دن باشقا قالماییر منه
*