اولماز - حسین غفّاری اردبیلی

حضرت عبّاس
اشراره قرض اولدو مقابل شرف الناس
سعد اوغلونا اوز توتدو خطاب ائیله دی عباس
بو غائله دن سیزلره کسب ثمر اولماز
انسان بو قدر سیز کیمی کوته نظر اولماز
سرمایه ااسلامیزی تاراجه وئریبسیز
بوندان بشره بیلسؤز آغیر بیر ضرر اولماز
رهبر ائله دیز امته سگ باز شروری
مست ائیله مه سه اگر سحر اولماز
اسلامی سالیب پیچ و خمه فقر و فلاکت
رهبر بوقدر امته نادادگر اولماز
آیا بونو درک ائیله مییرسیز کی زناکار
اسلامه خیانت ائلین راهبر اولماز
بیر سر نهان حج ده وار رای جبرده
حجاج اونو بیلمسه حج معتبر اولماز
معناسی بودو دشمن دینی داشا باغلا
یوخسا ائله داشدان -  داشا جنگ جمل اولماز
آی نامه یازانلار هانی بس قول و قراریز
سیزلرده وفا یوخدی سؤزوزده اثر اولماز
ائو صاحیبینین ذره اگر غیرتی اولسا
مهمانلاری چؤللرده سوسوز دربدر اولماز
گهواره ده الان چابالیر تشنه دیر اصغر
بیر جرعه سو اولسا ننه سی خون جگر اولماز
من عترت زهرایه کمر بسته غلامم
سینم کیمی قارداشیما محکم سپر اولماز
هر قیمته اولسا آلارام نهر فراتی
مانع منه بو ایش ده اوتوز مین نفر اولماز
گلسین قاباغا کیمدی اگر واردی شجاعت
گؤرسون کی علی اوغلو بدون هنر اولماز
هر گردنه سر پنجه پر زوریم ایلیشسه
مین رهگذر اولسا اونا راه گذر اولماز
میدانده بیر نیزه اگر لشگره آتسام
مین سینه نی دللم، تیریم ده هدر اولماز

بیر کؤنول سیندیرمیشام - اسلام صفرلی

بیر کؤنول سیندیرمیشام
من اونو دان اولدوزو
نظم شفق ساناردیم
کیمه انانماسسام دا
بیر اونا ایناناردیم
*
آه... قباحتیم بؤیوک دور
ای ائللر، آی ائللر
دونن آخشام، دونن آخشام
بلبل کیمی بیر اورک
بیر کؤنول سیندیرمیشام
*
او بیر قارانقوش کیمی
قلبیمده یووا قوردو
آجی دیلیم قوروسون
دیلیم اونو اوچوردو
بلبل کیمی بیر اورک
بیر کؤنول سیندیرمیشام
*
ساچلارینین گول عطری
تیتره ین اووجومدا
انتظار باخیشلارین
آغلار یول آیریجیندا
*
آه... قباحتیم بؤیوک دور
ای ائللر، آی ائللر
دونن آخشام، دونن آخشام
بلبل کیمی بیر اورک
بیر کؤنول سیندیرمیشام
*

ایندی

ایندی - زلیم خان یعقوب
اؤلدوردوم اؤزومو اؤز ایچه ریمده
اؤزوم اؤز جانیما بیر قصدم ایندی
ندن دانیشیرام قیریلیر سؤزوم
ساغلام اولا – اولا شیکستم ایندی
*
گؤز وار اوندان اؤترو اوجاق اولموشام
گؤز وار اوندان اؤترو پیچاق اولموشام
چتین آغری لارا چالاق اولموشام
درمان سیز دردلره پیوستم ایندی
*
قانلی کفنیمی اؤزوم بیچمیشم
سؤالی صراطی چوخدان کئچمیشم
دردین شرابینی ائله ایچمیشم
شراب ایچنلردن چوخ مستم ایندی
*

یئتیشدی غیر عاشیقلر وصال یاره بیز قالدیق

علی آقا واحد

یئتیشدی غیر عاشیقلر وصال یاره بیز قالدیق

خلایق چاره تاپدی دردینه ، بیچاره بیز قالدیق

هامی اؤز سئودیگی معشوقه سیله شادکام اولدو

یانان پروانه لر تک روز و شب اودلاره بیز قالدیق

رقیب بی مروت لر فرحناک اولدو عالمده

سئویب جانانی حسرت طره طراره بیز قالدیق

کئچیرتدیک تیر نازین سینه دن هر ماه رخسارین

گئنه بی مهر چیخدی طعنه اغیاره بیز قالدیق

محبت گولشنینده بیر گول اکدیک زحمتین چکدیمک

صفاسین اؤزگه لر گؤردو ، جفای خاره بیز قالدیق

بوتون دیوانه لر واحد کمندیندن خلاص اولدو

گئنه او زولفه باغلی متصل آواره بیز قالدیق 

بیمارم - احمد شوقی تبریزی

بیمارم

طبیبا بیر نظر قیل حالیما گؤر نئجه بیمارم
داواسیز دردلره عالمده من تنھا گرفتارم
گریبانیم قوتارماز درد و غمدن چاره یوخ نئیلیم
چتین دیر دیرلکیم دُنیا ائوینده بیل کی ناچارم
ایچیب اھل جھان غفلت شرابین جمله سرخوشدور
دخی پیر مغان بزمینده کیم سؤیلر کی ھوشیارم
ایچرتمیش عشق جامیندان منه مئی ساقی کوثر
آییلماق؟ حشره دک مدهوش قاللام مست خمارم
جنونلوق داغی وار کؤکسومده، نقاش ازل چَکمیش
اونونچون وادی عشق ایچره مجنونه هوادارم    
ووراندا تیشه تک دیرناغیمی داغلارا ھر لحظه
قوپاررام یئرلی - یئردن کُوھنه جه من داخی وارم
توُکنده قانلی یاش گؤزدن، گول اوزلو یاردان آیری
چکنده ناله و افغان، گؤرن در بلبل زارم
گرک خوبلارا جان نقدین وئرم دهرین بازاریندا
بُودُور قصدیم کؤنولدن اها حوسنه من خریدارم
بوگون بیر دیلبرین لعل لبین مدح ائیله دیم دیلده

یقین بیل شوقیا صراف تک لعل گھربارم
*

بیر گؤزل کی، شیرین اولا بینادان

شاعر: ملا پناه واقف
*

بیر گؤزل کی، شیرین اولا بینادان
یۆز ایل گئتسه اونون دادی اکسیلمز
تزه ‌لیگی، کؤهنه ‌لیگی بیر اولور
گؤهر تک قیمتده آدی اکسیلمز
*
گؤزللیکدن دوشمز هئچ اصیل‌زادا
گۆن‌ به‌ گون قامتی دؤنر شیمشادا
مهر و محبّتی اولور زیادا
اعتیباری، اعتیقادی اکسیلمز
*
نه قدر کی، یۆزه یئتیرسه یاشی
تا کی، هئیدن دۆشه، تیتره ‌یه باشی
گئنه جان آلماغا گؤزیله قاشی
غمزه ‌سی‌نین هئچ جلّادی اکسیلمز
*
جؤوهری پاک اولور تزه جاواندان
هرگیز ال گؤتورمز شؤوکت و شاندان
مۆژگان خدنگلرین کئچیریر جاندان
پئیکانی‌نین هئچ پولادی اکسیلمز
*
واقیف، ایستر ایسن گؤره‌سن لذّت
گل سئو بیر درد بیلن، اهلی محبّت
نؤوجاوانلار سئون هئچ اولماز راحت
گئجه- گۆندوز هئچ فریادی اکسیلمز
*

آغلا گؤزوم، آیریلیرسان جاناندان - ملا پناه واقف

ملا پناه واقف
آغلا گؤزوم، آیریلیرسان جاناندان
هر کسی کی، گؤرسن، شیکایت ائیله
اؤلدون گئتدین، بلکه یاری گؤرمه‌دین
کعبه‌ی- کویینی زیارت ائیله
*
سن منیم جانانیم، روحی روانیم
لبلری شیرینیم، قونچه دهانیم
بیر ساعت گؤرمه‌ سم، طوطی زبانیم
قوپاجاق باشیما قیامت ائیله
*
واقیف بیر شئیدادیر، دولانیر باغی
خسته‌دیر، درمانی، دیلبر دوداغی
او آلما یاناغی، بۆللور بوخاغی
آللاه، بدنظردن سلامت ائیله
*

یار اگر مهر و وفانی دوشونن یار اولسا

شاعر: علی آقا واحد

یار اگر مهر و وفانی دوشونن یار اولسا

غم دئییل کی بوتون عالم بیزه اغیار اولسا

اهل دل ذوق و صفانی لب جاناندان آلیر

ظلم دور عاشیقه ، جانانی دل آزار اولسا

وار نه غم گؤزلرینین خسته سینه یوخذدور علاج

لب لرین چاره سین ائیلر ، نئجه بیمار اولسا

زولف و خالین او مهین گؤزیاشیم ائیلر روشن

گئجه آیدینلیق اولار ، ثابت و سیار اولسا

یار اگر عاشیقه غمخوارلیق ائتمزسه نه غم

 غم اودور اؤزگه یه معشوقه سی غمخوار اولسا

گؤزلرین شوق ایله قان تؤکمه گه چوخ راغیبدیر

مست دیر ، بونجا خطا ائیله مز هوشیار اولسا

وار اومیدیم منه واحد داها ظلم ائتمه یه جک

حال زاریمدان او مهپاره خبردار اولسا 

یارب ایتیرمیشم نئچه گوندور نگاریمی

شاعر: علی آقا واحد
یارب ایتیرمیشم نئچه گوندور نگاریمی
دئییرم سن یئتیر منیم او نازلی یاریمی
یوخدور گولوم نه اوزنه گئدیم سئیر گلشنه
بختیم بو ایل خزان ائلییبدیر باهاریمی
او لاله اوزدن منه هر کیم خبر وئره|
بالله سئویندیررمنیم بو دل زاریمی
نامرد رقیبین حیله سینه اویدو دلبریم
یاندیردی نار حسرتیله منیم قلب زاریمی
آی باشیم بلالی دیراؤلورم کیمسه بیلمیر
بیر قاره گؤزلو الدن آلیب اختیاریمی
واحد بو شعری یاز جانانه عؤمردن گئدیب
بیر واخت اولور کی خلق اوخویار بادگاریمی
*

بیر دیلبریم اولسا - علی آقا واحد

بیر دلبریم اولسا

اؤلمزدیم اگر سن کیمی بیر دلبریم اولسا

بیر آفت جان ، شوخ ملک منظریم اولسا

هر گون دولانیب باشینا ، قوربانین اولاردیم

پروانه صفت ، اوچماغا ، بال و پریم اولسا

منده سئویلردیم ، بوتون عاشقلر ایچینده

آهولرین مجنون ائلیه ن گؤزلریم اولسا

شوقیله نثار ائیله رم ، هر بیر قدمینده

دریا قدری الده ، دور و گوهریم اولسا 

کویوندا منه قوی نه بیلیر ائیله سین اغیار

البته جزاسین چکر ، آللاه کریم اولسا

بیگانیه من بیر بئله منت می ائده ردیم؟

کؤنلوم کیمی بیر یار وفا پروریم اولسا

واحد دئمه رم دردیمی من باشقا نیگارا

یاریم بیلیر عشقینده نه دردی سریم اولسا

* 

یانیندا دلبریمین اعتباریم اولماسادا - علی آقا واحد

شاعر: علی آقا واحد

یانیندا دلبریمین اعتباریم اولماسادا

یئنه غمین چکرم غمگساریم اولماسادا

بدنده یاری جانیم قالماییب گئدیب یاریم

گرک دؤزوم غم هیجرانه یاریم اولماسادا

گؤنوم کی تار اولوب او زولف الیندن ای تانری

ترنم ائیله سنی تانری تاریم اولماسادا

اوزون خیالی بسیمدیر بهشت کویوندا

یوز ایل خیالیمه گلمز بهاریم اولماسادا

لبینله مست گؤزون هر دوشنده خاطیریمه

شرابه رغبتیم آرتیر خوماریم اولماسادا

منیم بیر آهیم ایله شمعلر یانیر گئجه لر

توخونما شعله عشقم شراریم اولماسادا

کمند زولف ایله واحد اؤزوم شکار اولدوم

منیم او آهو باخیشلی شکاریم اولماسادا

* 

تکی سن سسله منی - علی آقا کورچایلی

تاکی سن سسله منی
هاردا اولسان گلریم
تاکی سن سسله منی
داردا اولسان گلرم
تاکی سن سسله منی
*
یاخین اولسون یا اوزاق
دره اولسون یادا داغ
منی کیم ساخلایاجاق
تاکی سن سسله منی
*
یارالار قوور ائدیر تزه دن
نییه کؤنول وئریردین اونا سن اوره ک
سئومیردی او سنی نییه سئوریدین 
سنی سئومیه نی نیه سئویردین
عشقینه من قربان دئدیم آی اوره ک
دئدی نئچه دفعه دئدیم آی اوره ک
سئومه ییریار سنی نیه سئویرسن
سنی سئومیه نی نیه سئویرسن
سؤزومه باخمادین ایندی یان اوره ک
یان یان ای منیم کیمی پشیمان اوره ک
سئومه دی یار سنی نیه سئویردین
سنی سئومیه نی نیه سئویردین آی اوره ک
یان یان آی اوره ک
*
عشقه یوردوسسیمه
قوجاغیما گلسن اگر
دؤنرم گئنج له شه رم
تاکی سن سسله منی
سن سن عشقیم امه ییم
گلسن بیرگون ده اؤلوم
وئرمه رم جان آی گولوم
تاکی سن سسله منی
اؤلمه رم بیل سئوگیلیم
تاکی سن سسله منی
*

بوراخما ای کؤنول او نازلی یاری اؤز باشینا - علی آقا واحد

بوراخما ای کؤنول او نازلی یاری اؤز باشینا

روا دئییل قالا ائللر نیگاری اؤز باشینا

گؤزیله کیپریگی بیرلیکده قان تؤکور گئجه لر

عجب قالیب گئنه دریا کناری اؤز باشینا

قراره گلدی رقیب ال گؤتورسون اول گولدن

نه اعتبار اونا ، دئسین قراری اؤز باشینا

او قاره گؤزلونو گؤزدن کناره قویما کؤنول

بوراخماز اووچی گؤزل بیر شیکاری اؤز باشینا

گول اوزلولر نه قدر وارسا باغبانی منم

نئجه قویوم بئله بیر گول عذاری اؤز باشینا

رقیبی یاره طرف قویمایین یاخین گلسین

کی گول سولار گؤره بیر بوته خاری اؤز باشینا

عمومه خدمت ائله واحد ، آرتیب اینسانلار

کی ، سانما ائل قازانیب اعتباری اؤز باشینا

* 

بیر گون گؤزلیم قبریمین اوستن اؤتوشرسن- علی آقا واحد

بیر گون گؤزلیم قبریمین اوستن اؤتوشرسن

دردیندن اؤلن عاشیقینی باشه دوشرسن

ائتمز ملک اولسا بو قدر ناز و کیریشمه

اینصافه یاخینلاش گؤزلیم سن ده بشر سن

نازیله گلرکن قدمین قوی گؤزوم اوسته

قویما قورو یئر اوستونه بیرده سوروشرسن

بیگانه ایله گزمه دئدیم قلبینه دیدی

جانان نه بیلیم سن بو قدر دیمه دوشرسن

بیر سالمادین اؤز عاشیقینی یادینا ظالیم

اغیاریله اما گئدیب هر گون اؤپوشرسن

ال چک منه ای دل دئمه زولفوندن او ماهین

بیر گون بو کمنده سن اؤزونده ایلیشرسن

رحم ائیله مه دین واحده ظالیم دیریلیکده

اؤلدوکده مزاریمله گئدرسن گؤروشرسن

* 

آنامین قبیر داشی اوچون - شهربانو - قایاقیزی

در رثای مادرم
دیندیرمیون قان آغلارام
آنام، مهربانیم گئدیب
بوینو بوکوک بیر بلبلم
گولوم گولوستانیم گئدیب
هجران اوتوندا یانیرام
روحوم، بوتون جانیم گئدیب
اوددا یاندی افغانیمدان
بیلدی کی جانانیم گئدیب
دیندیرمیون آغلیر کؤنول
جاندان شیرین جانیم گئدیب
*
شهربانو( قایاقیزی)
( 1401.11.04 / 2023.01.24 )

وورما اوقاره تئللرینه شانه سئوگیلیم

شاعر: علی آقا واحد
وورما اوقاره تئللرینه شانه سئوگیلیم
ائتمه منی بلاکش دیوانه سئوگیلیم
یاندیردی حسرتین منی، گؤستر جمالینی
کؤنلوم اولوب اول آتشه- پروانه سئوگیلیم
بیر دفعه ائیله دیمسه، تمنای وصلینی
یوز دفعه یاندیم- آتش هجرانه، سئوگیلیم
گزمه رقیبله منی غیرت هلاک ائدیر
سالما بلالی عاشقینی قانه سئوگیلیم
گؤسترمه قاره خالینی، کؤنلوم فغان ائدیر
قوش، ده ن، گؤرنده تئز گلیر افغانه سئوگیلیم
یوز لیلی گؤرسه حسنونی مجنون اولار سنین
عشقینده اوز قویاردی بیابانه سئوگیلیم
انصافی اولسا چرخ، بو بیچاره «واحدی»
حسرت قویارمی، سن کیمی جانانه سئوگیلیم؟
*

فکرینده می، بیر گون گؤزه لیم، بیز سیزه گلدیک؟

شاعر: علی آقا واحد
فکرینده می، بیر گون گؤزه لیم، بیز سیزه گلدیک؟
سیزدن قاییدیب، سونرا برابر بیزه گلدیک؟
گُولدوک و دانشدیق گئجه نی، صبح آچیلینجا
بیر غنچه گول اوستونده، سیزینله سؤزه گلدیک
کئف چکدیگیمیز خاطره لر، وارمی یادیندا؟
گولشنده بیر آیدین گئجه ده، اوز اوزه گلدیک
خیلی دولانوب سئیرائیله دیک گول لر ایچینده
بیر- بیریمیزه چوخ عشوه لی، چوخ بامزه گلدیک
بیزکی، گؤزه لیم، جان دئیه رک، جان ائشیدیردیک
بس ایندی نه اولدو بیزه، یوخسا گؤزه گلدیک!!
نه سنده وار اول مهر و محبت، نه ده منده
سوندوک ایشیق اولدوز کیمی، سون منزله گلدیک
واحد، او گئچه ن گونلری، بیر مرّه اوُنوتدوق
لیکن یئنی دنیایه، بیز ایندی تزه گلدیک
*

آی قیز - عاشیق شمشیر

شاعر: عاشیق شمشیر

نییه مندن گئن گزیرسن؟
دولانیرسان گئندن آی قیز؟
پریشان قلبیمه دیمه
کوسر کؤنلوم سندن آی قیز
*
مشتاقام قلم قاشینا
دوروم دولانیم باشینا
پروانه تک آتش لره
یاندیم ازل گوندن آی قیز
*
شمشیر اوچون ارمغان سان
هم گؤزل سن، هم جوان سان
سن کی سرو خرامان سان
نه دئدیلر مندن آی قیز؟
*
مشتاقام قلم قاشینا
دوروم دولانیم باشینا
پروانه تک آتش لره
یاندیم ازل گوندن آی قیز
*
حسرتینی چکدیم هر آن
دردین منی اَیدی پونهان
بیلمیرم کی سنه هر آن
نه دئدیلر مندن آی قیز
*
مشتاقام قلم قاشینا
دوروم دولانیم باشینا
پروانه تک آتش لره
یاندیم ازل گوندن آی قیز
*

سئوه یدین باری - حسین عارف

سئوه یدین باری
شاعر: حسین عارف
ایللرله من سنین اودونا یاندیم
باشقا بیریسینه میل سالمادیم
هر دیقه هر زامان آدینی آندیم
گؤزله دیم، گؤزله دیم
سندن من جواب آلمادیم
*
گؤزدن اوزاق اولوب، دوشمه دیم یادا
یالانچی محبت آلداتدی سنی
دؤزولمز آغیردیر، دوزو دنیادا
سن یاری سئوه سن، یار اؤزگه سینی
ندن دیر، ندن دیر، ندن دی
سئودین سن یار اؤزگه سینی
*
کیمدیر یانینداکی، تانی سن گؤزل
اونون نه عهدی وار نه اعتباری
ای منی به یه نیب، سئومه ین گؤزل
مندن یاخشی سینی سئوه یدین باری
سئوه یدین باری

اونودا بیلمیرم - نوروز گنجه لی

شاعر:  نوروز گنجه لی
آیری دوشدوک آیلار اولدو، ایل اولدو
عشقیم سن سیز بیر چاغلایان سئل اولدو
باغچا سالدیم، چیچک آچدی گول اولدو
نئیچون سنی بس اونودا بیلمیرم
*
مین رنگ وئریر باهار هر بیر چیچه یه
روح گتیریر هر قلبه هر اوره یه
من چاتیرام هر آرزویا دیله یه
نئیچون سنی بس اونودا بیلمیرم
*
دئییرلر کی یوخدور سئوگی محبت
بیر – بیرینه، قیز – اوغلان ائدیر عادت
دوغرودانسا، یوخدور اگر محبت
نئیچون سنی بس اونودا بیلمیرم
*