گمی چی - آکیف صمد

گمی چی
نه واخدیر کی ترک ائیله ییب
باهار منی، آی گمی چی
آیاز - شاختا دؤرد بیریانا
چاپار منی، آی گمی چی
*
قارشی ساحیل گوللو اولار
سؤیودلری تئللی اولار
بولاقلاری دیللی اولار
آپار منی آی گمی چی
*
قانان قاچیر من دلی دن
زَهَر ایچیم مرد الیندن
بو ساحل درد - غم الیندن
قوپار منی آی گمی چی
*
دانیشیرام بئکار – بئکار
… قاچماق می اولار؟
هاردا اولسام درد زهرمار
تاپار منی آی گمی چی
*
شاعر: آکیف صمد

چیخاق گئدک - آکیف صمد

چیخاق گئدک
کؤنول، بو دنیا ایشلری
بیزلیک دئییل چیخاق گئدک
سؤز قانان قحطه چیخیب
سؤزلوک دئییل چیخاق گئدک
*
آغاج ایچیندن یئییلیر
قایا دیبیندن یویولور
ایشلر آیتاردان اییلیر
اوزلوک دئییل چیخاق گئدک
*
شاها راضی لیق ائیله مک
یادا تازی لیق ائیله مک
قالیب قاضی لیق ائیله مک
دوزلوک دئییل چیخاق گئدک
*
قلمه، لوله دئدیلر
گولومه، گول له دئدیلر
سوروشدو دیل له، دئدیلر
سیزلیک دئییل چیخاق ئدک
*
شاعر: آکیف صمد

یاندی - عاشق حسین جوان

یاندی
خالیده جان آلان قارا قاشلارین
قلبیم ائله چالدی سانکی ایلاندی
قولاغیم ائشیتجک قوجا کلمه سین
جییریم اود توتدو، اوره ییم یاندی
*
سن جاوانسان قاداغا وئر دیلینه
بو کلمه یاراشماز سن تک گلینه
دوشه سن درد بیلن قوجا الینه
گؤره سن قوجالار نه مهریباندی
*
سنده واردی گوُزللیگین نیشانی
خزان سولدورماسین سن تک انسانی
منیم عزیز دوستوم، حسن کشانی
او مندن قوجادی یاشینی داندی
*
اون آلتینجی ایلده ساشلاریم آغدی
قوجالیق هامینین قلبینده داغدی
آزاد بیر آشیقام اوره ییم ساغدی
صوُحبتیمده، شؤهرتیمده جاواندی
*

قوشما - خسته قاسم

بیر نازنین سئودیم مکتب خانادا
حق کلامین دیل ازبردن اوخودو
الینه آلمیشدی عشقین کتابین
منیم درسیم بیل ازبردن اوخودو
*
من تانیرام اؤز یاریمی نفس دن
اول سبب دن کؤنول دوشمز هوس دن
طاووس کیمی صدا وئره رقفس دن
بلبل کیمی خوش دفتردن اوخودو
*
خسته قاسم کمک دیلر خودادان
ناز غمزه سی عاشق لری آلدادان
حیا ایله حجاب ایله مولادان
گاه یاواش دان گاه بتردن اوخودو
*
 

قوشما

ایران تورکوسو و آذربایجان ادبیاتیندا ان چوخ سئویلن شعر قورماسی قوشمادیر . اون بیر اؤلچولو اولان بو شعر نوعونون هر میصراعی ( 6 + 5 ) و یا ( 4+4+3 ) بؤلگولرینده قورولار . عمومیتله اوچ یا بئش بند اولار . هر بندده ایلک اوچ مصراع بیر قافیه ده و بوتون دؤردونجو مصراعلار ثابت قافیه ده اولار لار . یعنی قوشمالاردا قوشا بئیت فورماسیندا یازیلار . یعنی بیرینجی مصراع اوچونجو و ایکینجی مصراع ، دؤردونجو مصراع ایله هم قافیه اولار .
قوشما قوشما عاشیق ادبیاتی نین این یایغین شعر قورماسی دیر . بوتون عاشیقلار ، قوشما یازمیشلار . « شهریار » ین حیدرباباسی دا قوشما فورموندا یازیلمیشدیر .
منبع : دیوان ابوالقاسم نباتی
به کوشش : دکتر حسین محمد زاده صدیق
بیر قوشما سید ابوالقاسم نباتی دن
الله ! الله ! بو دلبر سیمبر
هانسی بخته ورین جانانه سی دیر ؟
داغیتدی باشیمدان عقل و هوشومو
بو هانسی دریانین دوردانه سی دیر ؟
..
هر کیم گؤرسه جمالینی آشکار
اختیاری گئدیب ، اولار بی قرار
گؤره سن می یارب ! هانسی دل فیگار
بو شمع رخسارین پروانه سی دیر ؟
..
اؤزو شیرین ، سؤزو شهد شکر ریز
عیشوه سی دلروبا ، غمزه سی خونریز
یاناغی برگ گول ، زولفو دیلاویز
دهانی مرواری خزانه سی دیر
..
خجیل ائتمیش اؤزو شمس خاوری
هیلال ائدیب قاشی بدر اانوری
نه یالقیز ائیله میش منی صرصری
چوخلار مجنون کیمی پروانه سی دیر
..
یولوم دوشسه خرابات خرابه
دئیه رم عرضیمی جام شرابه
نباتی یه نئیلر بو بیر قرابه
یئددی دریا اونون پیمانه سی دیر
.

آغلاییر - آیریلماز

آغلاییر
عجایب زماندی بیزیم زمانه
اینسانین حالینا حیوان آغلاییر
اینسان درد الیندن گلیب فغانه
تاپیلمیر دردینه درمان آغلاییر
*
باخیشلار اولوبدور قیش کیمی سویوخ
اینسانلار ائیلییر ثروته قوللوخ
بعضا بیر ایش گؤرور اشرف مخلوق
گلایه ائیلییب شیطان آغلاییر
*
زمانه ده ییشیب، زمانه دؤنور
اوغلانلار قیز کیمی باشلارین هؤرور
حکیم جلاد اولوب آدام اؤلدورور
قبیرده بیچاره لقمان آغلاییر
*
کیشی دول آختاریر آروادی اویناش
قضاوت ائیلییر اوغرویا اوباش
خیانت ائیلییر، قارداشا قارداش
غیرت ماتم توتوب، وجدان آغلاییر
*
سالیبلار زندانا، سؤز بیلن لری
شاللاقلار آلتیندا، سویولور دری
حقیقت تاپدانیب، اولندن بری
دوران گولومسویور، زامان آغلاییر
*
حاکم لر اونودوب ملتین غمین
یاغی لر آشکاراویریبلار کمین
هر کس تابیبدیر، ایشینین کمین
چاققال توتک چالیر، آسلان آغلاییر
*
آیریلماز دعاینان آچیلماز دویون
دویونلر پیتداشار، قالسا گون به گون
شاعر نظمه چکر باخیب گؤردویون
قلم سیزلاییر، یاران آغلاییر
*

بیه نمیر - آیریلماز

یارب نه دن اینسان گؤزل اینسانی بیه نمیر
میمون بزنیب داغداکی جئیرانی بیه نمیر 
عشقین آدینی چوخلاری میندارلیقا چکمیش
کامین آلیبان سئوگیلی جانانی بیه نمیر
بایقوش سسینه ذوقه گلیر چوخلاری آنجاق
بولبول کیمی گولشنده غزل خوانی بیه نمیر
عیلت نه اولوب مصنوعی گولزاری گزنلر
بیر گون دولانا گوللو گولوستانی بیه نمیر
باخ گؤر نئجه دوراندی گئدا اوغلو دیلنچی
شاهلار تاجینی قصر سلیمانی بیه نمیر
آیریلمازی آگاه ائله عیلت نه دی یا رب
تورکون بالاسی آذربایجانی بیه نمیر
*

بالجا مرضیم - رافیق اقدمی

شعر: رافیق اقدمی

آتانین بیردنه سی
آنانین گؤزگیله سی
سن ننه مین نوه سی
منیم بالاجا مرضیم
منیم بالاجا مرضیم
*
وئردیم سنه آدیمی
جانیمی حیاتیمی
سنله تاپدیم دادیمی
منیم بالاجا مرضیم
منیم بالاجا مرضیم
*
گئجه مین سن آیی سان
قلبیمین سسرایی سان
تانریمین گول پایی سان
منیم بالاجا مرضیم
منیم بالاجا مرضیم
*
داغیم، دوزوم، چمنیم
سمنیم، یاسمنیم
یئملیم سن، یئملیم
منیم بالاجا مرضیم
منیم بالاجا مرضیم
*
سنه حئیران اولارام
بؤیو قربان اولارام
تویونا دک قالارام
منیم بالاجا مرضیم
منیم بالاجا مرضیم
*
گوللو باهاریم منیم
باغیمدا باریم منیم
دولتیم واریم منیم
منیم بالاجا مرضیم
منیم بالاجا مرضیم
*
آرزومون سن آرزوسو
حیاتیمین روزوسو
سن ننه مین قوزوسو
منیم بالاجا مرضیم
منیم بالاجا مرضیم
*

داغیلیر - ائلشن عظیم

واخت اوچورکپنک کیمی
الیمه زری داغیلیر
ساری یارپاقلار اوستونده
زامانین تری داغیلیر
*
عکسی قالیر صدالارین
غمزه لرین – ادالارین
هرگون دلی سئودالارین
باشیمدان بیری داغیلیر
*
گولو سولو درمک اولمور
غنچه واختی گؤرمک اولمور
تا عؤمروده سورمک اولمور
گونده بیر یئری داغیلیر

آغلاما گولوم آغلاما - قنبر شمشیر

 
گؤزیاشینین آخیب گئدن گیله سی
اوره ییمدن قوپوب گئدیر ۀآغلاما
دیوانه اولارام غمین الیندن
قلبیمی آغی لار دیدیر آغلاما
*
آغلاما یاشین سئل اولدو
اوره ییم یاندی کول اولدو
حسرتین یاشی ایل اولدو
آغلاما گولوم، آغلاما
*
قاشلارینی هر چاتیلمیش گؤرنده
حیات عشقی یوخا چاتیر سینم ده
کیپلیکلرین نملی – نملی یئننده
حالیمی پریشان ائدیر آغلاما
*
آغلاما بیتر بو حسرت
وصال اولار بیزه قسمت
اونودولماز ایلک محبت
آغلاما گولوم آغلاما
*
بعضا اولور کوسلوک اولدو آرادا
زامان کئچر ساغالار بو یارادا
غملی کؤنلوم بیر گون دوشر تورادا
عشقیمیزی هجران گودور آغلاما
*
آغلاما یاخین گَل باری
عؤمروم گونوم اولوب یاری
اونوتما عهدی ایلقاری
آغلاما گولوم آغلاما
*

غوغای ستارگان

غوغای ستارگان
شاعر: کریم فکور
آهنگساز: همایون خرّم
امشب در سر شوری دارم
امشب در دل نوری دارم
باز امشب در اوج آسمانم
رازی باشد با ستارگانم
امشب یکسر شوق و شورم
از این عالم گویی دورم
*
از شادی پر گیرم که رسم به فلک
سرود هستی خوانم برِ حور و ملک
در آسمانها غوغا فکنم
سبو بریزم ساغر شکنم
*
با ماه و پروین سخنی گویم
از روی مه خود اثری جویم
جان یابم زین شبها
جان یابم زین شبها
ماه و زهره را به طرب آرم
از خود بی خبرم، ز شعف دارم
نغمه ای بر لبها
نغمه ای بر لبها
*
امشب یکسر شوق و شورم
از این عالم گویی دورم
*
اولدوزلار بزمینده
مترجم: صالح سجّادی
بو آخشام باشیم هاوالی
کؤنلوم ایشیق دان غوغالی
روحوم گؤیلر اوزونده اوینار
اولدوزلاردا پایلاشاندا اسرار
بو آخشام نور اولماقدایام
بو عالمدن اوزاقدایام
*
شادلیقدان روحوم اوچار گونشین اوزونه
ملک لرین بزمینده یئر آچار اؤزونه
گونش گؤلونده سرخوش اوزه رم
سبو آشیررام ساغر سوزه رم
کؤنلوم گؤیلرده اوچقاردا
بو عالم هاردا من هاردا
*
آی دان پروین دن خبر آختاررام
ایتگین آییمدان خبر آختاررام
جان آللام گئجه دن
زهره نی آیی سالارام رقصه
خبرسیز هامی دان دالارام رقصه
دوداغیمدا نغمه
دوداغیمدا نغمه
*
بو آخشام باشیم هاوالی
کؤنلوم ایشیق دان غوغالی
روحوم گؤیلر اوزونده اوینار
اولدوزلاردا پایلاشاندا اسرار
بو آخشام نور اولماقدایام
بو عالمدن اوزاقدایام
*

قانینا غلطان اولان اوغلوم حسین - کنیز

قانینا غلطان اولان اوغلوم حسین
امّته قربان اولان اوغلوم حسین
کیم سنی غرق ائتدی قیزیل قانینا
نیزه ده ییب سینۀ سوزانینا
فاطمه قربان یارالی جانینا
لب لری عطشان اولان اوغلوم حسین
قانینا غلطان اولان اوغلوم حسین
امّته قربان اولان اوغلوم حسین
*
برهم اولوب گئتدی اساسین سنین
اولمادی بیر کس توتا یاسین سنین
بس هانی اینینده لباسین سنین؟
سینه سی طوفان اوغلان اوغلوم حسین
قانینا غلطان اولان اوغلوم حسین
امّته قربان اولان اوغلوم حسین
*
تشنه لب اولدوردولر قارداشینی
فرقتی قان ائیله دی گؤزیاشینی
کیم دالدان کسدی سوسوز باشینی؟
خانه سی ویران اولان اوغلوم حسین
قانینا غلطان اولان اوغلوم حسین
امّته قربان اولان اوغلوم حسین
*
بسله میشیدیم سنی سینم ده من
گول بدنین قالدی یئر اوستونده سن
یوخ سنه بیر قبر قازان، دفن ائدن
پیکری عریان اولان اوغلوم حسین
قانینا غلطان اولان اوغلوم حسین
امّته قربان اولان اوغلوم حسین
*
گلدی آنان دور باشیبنین اوستونه
بس نه سالیم یارالارین اوستونه
شمر گئدیر خیمه لرین اوستونه
خیمه سی تالان اولان اوغلوم حسین
قانینا غلطان اولان اوغلوم حسین
امّته قربان اولان اوغلوم حسین
*
آغلامیشام صبح م مسا حالینا
قربان اولوم او یارالی حالینا
آلدین حسین، اکبریوی یانینا
اصغری عطشان اولان اوغلوم حسین
قانینا غلطان اولان اوغلوم حسین
امّته قربان اولان اوغلوم حسین
*
نئینه سین آخی بالا بو زینبین
بس نئجه گؤرسون یارالی پیکرین
کیم کی کسیب ظلم ایله بو اللرین
زینبی نالان اولان اوغلوم حسین
قانینا غلطان اولان اوغلوم حسین
امّته قربان اولان اوغلوم حسین
*
هانسی آنا من کیمی نالان اولوب
کرب و بلادا جگری قان اولوب
خیمه لری ظلم ایله تالان اولوب
خیمه یه مهمان اولان اوغلوم حسین
قانینا غلطان اولان اوغلوم حسین
امّته قربان اولان اوغلوم حسین
*
سن نئجه صبر ائتدین اوغول غملره
فرقت عبّاس و علی اکبره
اوخلارا، نیشانه علی اصغره
باغری قیزیل قان اولان اوغلوم حسن
قانینا غلطان اولان اوغلوم حسین
امّته قربان اولان اوغلوم حسین
*
سن کی امامیدین آخی امّته
نور هدایت بو یامان ملّته
سالدیلار آخر سنی مین ذلّته
خاک ایله یکسان اولان اوغلوم حسین
قانینا غلطان اولان اوغلوم حسین
امّته قربان اولان اوغلوم حسین
*
نوحه تمام اولدو« کنیز» آغلارام
باشیما ایندی من قرا باغلارام
اوغلون حسینه من عزا ساخلارام
یا زهرا
ای کفنی اولمویان اوغلوم حسن
قانینا غلطان اولان اوغلوم حسین
امّته قربان اولان اوغلوم حسین
*

گؤر - شاهی اردبیلی

گؤر

عالم عشقه گل بشر، معجزه خدانی گؤر
قله ده خیمه لر ووران، یوخسولو بینوانی گؤر
دامجی دا تاپ دنیز گوجون، ذره ده کهکشانی گور
هر توک اوجوندا نطقه باخ نغمه یه باخ نوانی گؤر
هر طرفینده هر زمان مروه نی گؤر صفانی گؤر
*
تا گؤره سن حقیقتی گؤیلر اولوب یاریخ یاریخ
سن ده بو سینه اؤرتوگون عشق ایله سوی قابیخ قابیخ
گؤز یاشی توک قدح قدح حکمتی ایچ قاشیق قاشیق
داغلا او داغلی قلبیوی دیلبره وئر یانیخ یانیخ
دیلدن او حالتیله دوش حضرت دلبرانی گؤر
*
گل سر کوی یاریده، توپراغا دوش حصیر تک
باشدا بویوندا تا سنه، یئر وئره لر حریر تک
قوللاری باغلی عؤمرووی، ویر باشا بیر اسیر تک
لیک ال آشما مردمه، زور دئمه امیرتک
قصرلری قبور ائدن، ناجی آسمانی گؤر
*
سون نفسینده بیر نفر، سؤیله دی آشنا سینه
یاز کفنیم ده بیر دعا، اوچ منی حقر ذاتینه
خلقیوی سویدون اللی، ایل مردمی زر هواسینه
ایندی سنی پیامبرین، بوکسه اگر عباسینا
یانمالیسان ائشیت بونو، ائیله دیگون خطانی گؤر
*
ساپ ایکی قات اولان زمان، ایینه دن ائیله مز گذر
سن ده وار اللی قات هوس، کؤرپوده ایینه دن بئتر
باشدا وئریب هوایه یئر، عقلی آتیبسان ای بشر
ایسی دوشوبدو چوللره قصرده ایله شیب دی خار
هم اؤزووه هم اؤزگویه ائیله دیگین جفانی گؤر
*
باشدان اوکی هوالرین، لنگرائدیب چکیب آتار
غیب تاجین قویوب باشا، باشلار ایچینده باش قاتار
آیلا گونی آلیب اله، آلما کیمین آتیب توتار
بیر بالا کهنه دخمه ده، یئدی گؤیو آلیب ساتار
سینه دلگشانی گؤر
*
لهو و لعب دی یاوه دی، قوشماسا وحیه شعر اؤزون
قوشماسا وحیه شعر اؤزون، ویر سؤزووه فنا کوزون
اووماسا شیطانین گؤزون، آت چؤله شاهینین سؤزون
آت چؤله حرف ناحقی، حقی ده اعتلانی گؤر
*
شاهی بویورما بیلمه ییر، مرثیه انسجامینی
شیوه شعر نوحه نین، گؤزله میرر نظامینی
مرکز قتلگه ده گؤر، پیر مغان قیامینی
اوغلو اؤلوب ولی گئنه، ترک ائیله میر پیامینی
حجتینی تمام ائدن، حجت هل اتانی گؤر
*

شاهی اردبیلی

شرع دن ای دئین قوشون، من شرف شریعتم
روح نمازه زینتم، منجی آدمیتم 
معنی معنویتم طنطنه هدایتم
کوکبه نهایتم فلسفه شفاعتم
هلهله قیامتم درد منم دوا منم جود منم عطا منم
خلقت اولاندا ابتدا من هله نور نابیدیم
پرده نشین عالم خلوت و احتجابیدیم
آدم اولاندا آب و گل من گولودوم گولابیدیم
ایندی ده کل عالمه سرور و مقتدا منم
آینه خدا منم مظهر کبریا منم سرور اطبیا منم
مفخر انبیا منم دلبر اولیا منم
شمس منم قمر منم نخل منم شجر منم
درّ منم گهر منم علم منم هنر منم
درد منم دوا منم اول و انتها منم
شمر گؤرون هارالیدی من گل باغ حیدرم
خارجی سعدین اوغلودور من نوه پیامبرم
ابطحی ام حجازی ام هاشمی یم دلاورم
شهپر جبرئیل ده، عرشه گئدن بالا منم

سن دئین اولسون - فیکرت قوجا

سن دئین اولسون
اته ییندن تؤک داشی
کوسمه هر آددیم باشی
آی جانیم یاخشی، یاخشی
یاخشی، سن دئین اولسون
*
گل قوشا قوللو اولاق
عؤمرون قوشا یولو اولاق
ائلین قیزی، اوغلو اولاق
جان دئیک جان ائشیدک
*
گل منیمله ائیینمه
آلوودان دون گئینمه
اؤز- اؤزونه دئیینمه
یاخشی سن دئین اولسون
*
آدام یاری دانلاماز
سئومه ین سؤز آنلاماز
سئونلر سیغاللاماز
یاخشی سن دئین اولسون
*

دئییلم - ایّوب کلبجرلی

عؤمروم بویو تاماشادان دویمادیم
بیلیرسن کی سنن دؤنن دئییلم
عشقین ائله بیر اود سالیب جانیما
عرمورلوک یاناجام سؤنن دئییلم
*
یوللارینا باخیب گرک لنیرم
ایلقارینی گؤروب اوره کله نیرم
عشقینله اؤیونوب فرحله نیرم
نیه دئیرسن کی من او دئییلم
*
سئودییم ساچیندان تئل قییما یادا
ایوب جا کیم سئور سنی دونیادا
محبت قوجالمیر ساچ آغارسادا
بیر ارزگه عنوانا گئده بیلمیرم
*

اولمایایدی بئله سفره چیخماق - ملا پناه واقف

اولمایایدی بئله سفره چیخماق
بیز یار ایله دانیشمادیق، آیریلدیق
حالاللاشیب، هۆمّت له شیب دوست ایلن
تمننشیب گؤروشمه‌دیک، آیریلدیق
*
بیلمم، کیمه دئییم دردیم نئچه‌سی
یارین تر ممه‌سی، سینه هاچاسی
یوخو منی آلدی گلن گئجه‌سی
گۆل اۆزوندن اؤپوشمه‌دیک، آیریلدیق
*
بیز دویمادیق یارین شیرین دیلیندن
شکر پارچاسیندان، لبِ بالیندان
مینا گردنیندن، اینجه بئلیندن
حاییف اولدو، ساریشمادیق، آیریلدیق
 *
واقیفم، اۆستومه گلمز خاص الی
سیلینمه‌دی هئچ کؤنلومون پاس الی
نه ممدّت دیر، جانان بیزدن کۆسه‌لی
کؤنلون آلیب باریشمادیق، آیریلدیق

بیر گؤزل شعرمشهدی گنجوی دن

جمالین کعبه تک مکان دیر منه
چمنین قوروسو زندان دیر منه
او ظالیم زولفونون قیورمیلاری یار
چوخدان دیر مانع ایمان دیر منه
ساچلارین اطرافا خوش عطیر ساچار
سحر یئلی اونو ووروب داغیدار
قولومو بوینوندا گؤرسه بیر زاهید
هئچ اولا بیلرمی او بیرده دین دار؟
گوله منظور اولموش گئنه ده چمن
کؤینه یی ییرتیلمیش تا اته ییندن
دئدیم کیم ییرتمیشدیر صبیر اردمین
قالخیب سحر یئلی سویله دی کی من
قورودو دوداغیم قورودو گؤزوم
او ظالیم اوتونا من نئجه دؤزوم
عشقین اوتوندا دا سو تک اریدیم
سورا اؤز سویومدا غرق اولوب اوزدوم
منی کام آلماغا قویمادی زامان
گوجو چاتان قدر ائله دی دیوان
دییه سن قهر ائتمیش دولاندیردیغی
منی ده اؤزیله اله سنی دووران
دئدیم مصلحت دیر بیزه ای فلک
شیرین میوه ایچک آجی دان ایچک ؟
دئدی آجی دان ایچ یوخسا شیرینه
وورغون دئییرسن کی سن ده فرهاد تک
ای عاغیللی قوجا دئییرسن ناشی
تورپاق اله یه نین جاوان دیر یاشی
دئی یاواش اله سین چونکی بو تورپاق
پرویزین بدنی دیر کئیقباد باشی
شام باشیندان یانار گؤز یاشی تؤکر
گلدیغی قاپی دان او چیخیب گئده ر
باشیندان اؤیونمه شاما دققت ائت
محو اولار باشیندان ایاغا قدر
خرابات یئری دیر ایگیت ارله رین
بودا یئری یوخدور بد گوهرلرین
حرمتله قدر اولار اونا چونکو
یئری دئییر بوردا حیله گرلرین
سن ای عشوه سیله گؤزل گؤرونن
ایله ش آجیخلانما ال چک فتنه دن
ایری دیر وعده ن ده ساچلارین کیمی
ایسه ن ده بو جامی گل داغیتما سن
گؤزلریمدن قان یاش آخیتدین دونن
گؤیلره سووردوم تورپاقلاری من
کیمین دعاسی دیر بیلمیرم ای دوست
کی اؤلمدیم سنین دریا غمیندن
او دریا قدین له بحثه گیره رک
ایسته سن دالغالیق اتمه سین فلک
یوز کرم قئیدی وور ساقیا
سنین پیاله وی دولدورسون تک تک
اوره گیم دولودور عشقینله نه غم
بیر سؤزله بو حالی دئیه بیلمرم
سیخیلیر اوره گیم یوخ طاقت ساقی
بیر قوشلوق داها خوش دئییلدی بو دم
زولفون جمالینا بیر یاراشیق دیر
خرابات اهلینه نور دور ایشیق دیر
ای شرق گونشین نور وو خوش گلدین
گؤزللر شاهینا قاپی آچیق دیر

مشهدی گنجوی

*

وطن - ارکانی تبریزی

بولبول شیدا منم، سن لاله زاریمسان وطن
کؤنلومون ذوق و صفاسی، نوباهاریمسان وطن
سن ده چوخلار جان قویوب، جور و جفالار چکدیلر
اول گئچن لردن قالان، خوش یادگاریمسان وطن
*

مختوم قلی ترکمنی

ثروتمندان از لذّت خسته می شوند، فقیران از حُبِّ وطن
« کمینه» شاعرِ نامدارِ ترکمن
*
در کنارِ مردان، مردِ میدان خواهی شد
«مختوم قلی ترکمنی»
*
میراثِ پدران ماست، به ما رسیده این دردها
از شعر مشهور بو دردی« مختوم قلی »
*
قله های مغرور به زانو درمی آیند
سنگ ها و صخره ها ذوب می شوند
چرا که این درد را تحمل نمی توانند کرد
آه از این درد، وای از این درد
« مختوم قلی»
*