اورمو گؤلونون دیلیندن- صالح سجادی

ایللر بویو حیاتیما قوردون کمین، گونش!
یولداشچی لیق یولو بویوموش؟ آفرین گونش!

سن هرنه سوزلادین او قدر من دایازلادیم
آی ییرتیجی باخیش لاری مندن درین گونش

ایللر اولار کی آخمادی بیر چای بو دوزلاغا
مندن آلان بولود لاری بس نیله دین گونش؟

اولما بوراخدین اونلاری یئللر قاچیرتد یلار
یا آزدیریب، آلاخلارا وئردین کبین،گونش!

قارشیندا بوغلایان سولاریمدان اوتانمادین
بیرده آخان دامارلاریمی پی له دین، گونش!

بیرقیسا بوی لی دالغانی دا قالدیرانمیرام
یئللر اسنده قیوریلیرام چین به چین، گونش!

آخ قارقیمیش!گؤروم سنی سؤنسون آلوو لارین
گؤیده دؤنوب داشا اولاسان بیر سرین گونش

آی ییرتیجی باخیشلاری مندن نفس آلان
سؤیله منیم بولودلاریمی نئله دین گونش؟

دوست بی پروا - ملا محمد فضولی

دوست بی پروا ، فلک بی رحم ، دوران بی سکون
درد چوخ ، همدرد یوخ ، دشمن قوی ، طالع زبون
سایه امید زائل ، آفتاب شوق گرم
رتبه ادبار عالی ، پایه تدبیر دون
عقل دون همت ، صدای طعنه یئر - یئردن بلند
بخت کم شفقت ، بلای عشق گون - گون دن فزون
من غریب ملک ، راه وصل پر تشویش و مکر
من حریف ساده لوح و دهر پر نقش فسون
هر سهی قد جلوه سی بیر سیل طوفان بلا
هر هلال ابر وقاشی ، بیر سر خط مشق جنون
یئل ده برگ لاله تک ، تمکین دانش بی ثبات
سودا عکس سرو تک ، تاثیر دولت واژگون
سر حد مطلوب پر محنت طریق امتحان
منزل مقصود پر آسیب راه آزمون
شاهد مقصد نوای چنگ تک پرده نشین
ساغر عشرت ، حباب صاف صهباتک نگون
تفرقه حاصل ، طریق ملک جمعیت مخوف
آه بیلمم نیله ییم ؟ یوخ بیر موافق رهنمون
چهره زردین فضولی نین ، توتب دور اشک آل
گؤر اونا ، نه رنگ لر چکمیش سپهر نیلگون
*
ملا محمد فضولی

عاشق اولدوم - ملا محمد فضولی

عاشق اولدوم یئنه بیر تازه گول رعنایه
کی سالیر آل ایله هردم منی یوز غوغایه
مشت اوروب قالب فرسوده می که حبس قیلیر
که سراسیمه و. عریان ، بوراخیر صحرایه
گؤزومون قانی ایله سینه می ال ائتدیم کی
آلت صنعت اولا ، او بت بی پروایه
بو نه ایش دیر کی منی اینه کیمی اینجه لدیب
سالیر ایپلیک کیمی هر دم ، بیر اوزون سئودایه
ایاغین باغلامیش آواره لرین ، صنعت ایله
یوخ نهایت ، سر کویون دا گزه ن شئیدایه
لخت – لخت اولموش ایکن ، غمزه درفشینی چکیب
چاره ساز اولمادی بیردم من غم فرسایه
یاخا چک ائدنی ، باشماق کیمی سالیر ایاغا
ای فضولی باخ اونون ائتدیگی استغنایه

پریشان خلق عالم آه و افغان ائتدییمدن دیر

پریشان خلق عالم ُ آه و افغان ائتدییگم دن دیر
پریشان اولدوغوم ُ خلقی پریشان ائتدیگیم دن دیر
دل زاریمده درد عشق گون - گون دن فزون اولماق
یئتن بی درده تدبیر ایله درمان ائتدیگیم دن دیر
گؤزوم کیم باغریمین قانین تؤکر پرکاله - پرکاله
دمادم آرزوی لعل جانان ائتدیگیم دن دیر
دئیل بیهوده گر یاغسا فلکدن باشیما داشلار
بناسین تیشه آهیم لا ، ویران ائتدیگیم دن دیر
قاچان رسوا اولاردیم قان اودوب صبر ائده بیلسیدیم؟
ملامت چکدیگیم بیهوده افغان ائتدیگیم دن دیر
خطاسین دان دئییل جسمیم اوخون دان بی نصیب اولماق
حباب اشک گلگون ایچره پنهان ائتدیگیم دن دیر
فضولی اختلاط مردم عالم دن اکراهم
پریوش لر خیالین ، مونس جان ائتدیگیم دن دیر 

ملا محمد فضولی

یارب - ملا محمد فضولی

یارب همیشه لطونو ائت رهنما منه
گؤسترمه اول طریقی کی یئتمز سنه ، منه
فطع ائیله آشنالیغیم اوندان کی غیردیر
آنجاق اؤز آشنالرین ائت آشنا منه
بیر یئرده ثابت ائت قدم اعتباریمی
کیم رهبر شریعت اولا مقتدا منه
یوخ منده بیر عمل سنه شایسته ، آه اگر
اعمالیمه گؤره وئره عدلین جزا منه
خوف خطرده وضطربم ، وار امید کیم
لطفون وئره بشارت عفو و عطا منه
من بیلمه رم گرکن سن حکیم سن
منع ائیله وئرمه هر نه گرکمز سنه ، منه
اول دور منه مراد کی ، اول دور سنه مراد
حاشا کی سن دن اؤزگه اولا مدعا منه
حبس هواده قویما فضولی صفت اسیر
یارب هدایت ائیله طریق فنا منه

جذر قیل - ملا محمد فضولی

حذر قیل آه اودوندان ، جورونو عشاقه آز ائیله
خس و خاشاکی یاخما ، شعله سین دن احتراز ائیله
صنملر سجده سی دیر بیزده طاعت تانری چون ، زاهد
کیمی گؤرسن سن اؤز دینین ده تکلیف نماز ائیله
حقیقت حرفینی یازماق دیلرسن لوح ذاتین ده ؟
خطین گلرخ لرین منظور توت ، مشق مجاز ائیله
صنم لر سنگ دل لردیر، ائشیتمزلر سؤزو زاهد
یئتر بیهوده من تک اونلارا عرض نیاز ائیله
سنین نازین گؤرنده ، عقل قالماز حسبته للله
آمان وئر عاشق دیداره بیر دم ترک ناز ائیله
یولوندا انتیظار مقدمین له خاک اولان چوخدور
خرام ائت بیرقدم ، من خاکساری سرفراز ائیله
فضولی جانه تاپشیریدن خیلین ، ایندی رسواسن
سنه کیم دئییرکی هر نامحرمه ، افشای راز ائیله

هئیچ نه ایسته میرم - داغلی عیواض

من بير قايا اولوم، من بير داغ اولوم

سن سينه م اوستوندن اؤتن دومان، چن

من مئشه قوينوندا بير بولاق اولوم

سنسه منيم حزين، شيرين زمزمه م

بيليرسن او دمده نه ايسته ييرم...

بير من اولوم، بير سن

بيزه باشقا كيم لازيمدي گؤره سن
*
من بير ياماج اولوم، بير دوزن اولوم

سن دوزن ايچينده آچان آل لاله م

من گئجه سنينچين يانان شمع اولوم

سنسه اطرافيمدا سوزن پروانه م

بيليرسن او دمده نه ايسته ييرم...

بير من اولوم، بير سن

بيزه باشقا كيم لازيمدي گؤره سن
*
من بير آغاج اولوم، بير بوداق اولوم

بيل كي، آيريلمارام هئچ واخت كؤكومدن

من بوداق اوستونده بير يارپاق اولوم

قورخورام، پاييزدي، گلن خزلدن

بيليرسن آي گؤزل نه ايسته ييرم...

بير من اولوم، بير سن

بيزه باشقا كيم لازيمدي گؤره سن
*
من بير دنيز اولوم، بير عومّان اولوم

سن دنيز ايچينده اوزن تك گميم

من بير اوميد اولوم، بير گومان اولوم

قويمارام پوچ اولسون او اوميدلريم

گل منيم له نه اولار اولگينان همدم

بيليرسن آي گؤزل نه ايسته ييرم...

بير من اولوم، بير سن

بيزه باشقا كيم لازيمدي گؤرهسن
*
بير من اولوم، بير سن

بير ده گؤيده آي...

بير ده گوللو چمن، ساكت آخان چاي

حزين نغمه دئسين بولبول، توراغاي

هئچ نه ايسته ميرم آللاه دان داها
*
يئرين اولسون منيم گؤزومون اوسته

شاعرم دورارام سؤزومون اوسته

نه اولار باشيمي قويوم ديزيوين اوسته

هئچ نه ايسته ميرم آللاهدان داها
*
آتيب بير كنارا فكيري، غمي

خياللا سئير ائدك گؤزل عالمي

دئييم  ، گولوم سنله، سحره كيمي

هئچ نه ايسته ميرم آللاهدان داها
*
داغلاري دومانسيز چنسيز اولماسين

زمي ده سونبولسوز دنسيز اولماسين

عيواضين بير گونو سنسيز اولماسين

هئچ نه ايسته ميرم آللاهدان داها

* 

داغلی عیواض ( یئتیم عیواض ) 

*

ترکی شعرلر - فیس بوک دا

ترکو شعرلرین آدرسی
 فیس بوک دا

آی گؤزل - اسماعیل جمیلی

یاز گلمه میش غنچه لنیب دوداقلار
گوله دؤنوب یاناقلارین آی گؤزل
دالغا دالغا بولوت تئیلن وور یانا
قارانلیقدان چیخسین اوزه آی گؤزل
سورمه له نیب آلا گؤزون اؤزوندن
بال سوزولور گول قوخولو سؤزوندن
گؤزله گؤزون گؤز وورانلار گؤزوندن
گؤزه للیگین تانریداند یر پای گؤزل
عومور قیسسا گون سایئلی آرزی بول
درده غمه فلک باخمیر چکیر قول
یاخینلاشیر آیریلیقیا گئدن یول
گئده نلره یوخدور گلن تای گؤزل
سئو سئویلسن توکنمزدیر بو دولت
قووسان اگر قاپی دؤیمز سعادت
اوزون گولمز پارلاتماسا محبّت
سئویلمه سن بو دنیایا وای گؤزل

چاغیر - سلیمان رستم

سنه اؤز وئرسه کدر ، مجلیسه جانانی چاغیر
لبلری غونچه نی ، اول گؤزلری جیرانی چاغیر

عشقیدیر هیجریدیر عالمده ویصالدیر معنا
وارسا شوبهه ن بونا ، ایثباتینا دؤنیانی چاغیر

سؤندؤره بیلمیه جکسن ینه عشقین اودونو
ایسته ییرسن کؤمگه چایلاری ، دریانی چاغیر

ساغالار منجه وصال ایله بو هیجران یاراسی
چکمه زحمت نه طبیبی نه ده لقمانی چاغیر

سنی غملر دنیزی بوغماغا ایلرسه هؤجوم
ئوزگه بیر کیمسه نی یوخ،اوندا سؤلیمانی چاغیر

گؤره سن کیمدی خطاکار - عاصم اردبیلی

فلکین قانلی الیندن بیر آتیلمیش یئره اندی،
بیر فلاکت آنانین جان شیره سیندن سودون امدی،
بوللو نیسگیل شله سین چیگنینه آلدی
تای توشوندان دالی قالدی،
ساری گول مثلی سارالدی
گونو تک باغری قارالدی
خان چوبانسیز سئله تاپشیرسین اوزون،
یوردوموزا بیر سارا گلدی
بیر وفاسیز یار الیندن یارا گلمز سانا گلدی
بیر یازیق قیز، جان الیندن جانا گلمز جانا گلدی
کئچه جکده الموت دامنه سیندن بورایا درمانا گلدی
بیرآدامسیز سوری آدلی، الی باغلی، دیلی باغلی!
سوری کیم دیر؟
سوری بیر گول دی جهنمده بیتیبدیر
سوری بیر دامجی دی، گوزدن آخاراق اوزده ایتیبدیر
سوری یول- یولچوسودور، ایری ده یوخ، دوزده ایتیبدیر
سوری، بیر مرثیه دیر اوخشایاراق سوزده ایتیبدیر
او کونول لرده کی ایتمیش دی ازلدن، اودو گوزدن ده ایتیبدیر
سوری بیر گوزلری باغلی، اوزو داغلی سوزوداغلی،
اولوب هاردان هارا باغلی!
بوشلاییب دوغما دیارین، اوموب البته یاریندان
ال اوزوب هر نه واریندان
قورخماییب، شهریمیزین قیشدا آمانسیز بورانیندان، نه قاریندان
گزیر آواره تاپا، یاندیریجی دردینه چاره، تاپابیلمیر
چوخ سئویر عشقی باشیندان آتا، آمما آتا بیلمیر
اووا باخ آووچی دالینجا قاچیر، آمما چاتا بیلمیر
ایش دونوب، لیلی توشوب چوللره مجنون سوراغیندا
شیرین الده تئشه، داغ پارچالاییر فرهاد اوتورموش اوتاغیندا
تشنه لب قو نئچه گور جان وئری دریا قیراغیندا
گوزده حسرت یئرینی خوشله ییب ابهام دوداغیندا
وارلیغین سون اثری آز قالیر ایتسین یاناغیندا
سانکی بیر کوزدی بورونموش کوله وارلیق اوجاغیندا
کوزه ریر پیلته کیمین، یاغ توکه نیب دیر چراغیندا
بوی آتیر رنج باغیندا؛ قوجالیر گنج چاغیندا،
بیر آدامسیز، سوری آدلی، الی باغلی، دیلی باغلی!
سوری جان!
اومما فلکدن، فلکین یوخدو وفاسی،
نه قدر یوخدو وفاسی، او قدر چوخدو جفاسی،
کوهنه رقاصه کیمین، هر کسه بیر جوردی اداسی،
او آیاقدان دوشه نی، ایستیر آیاقدان سالان اولسون
او تالانمیش لاری ایستیر گونو- گوندن تالان اولسون
او آتیلمیشلاری ایستیر هامیدان چوخ آتان اولسون
او ساتیلمیشلاری ایستیر قول ائدرکن ساتان اولسون
نئیله مک قورقو بوجوردور
فلکین نظمی ازلدن اولوب اضدادینه باغلی
قاراسیز آغلار اولانماز،
دره سیز داغلار اولانماز
اولو سوز ساغلار اولانماز
گره ک هر بیر گوزه له بیر دانا چیرکین ده یارانسین،
بیری انسین یئره گوکدن، بیری عرشه اوجالانسین
بیری چالسین ال آیاق غم دنیزینده،
بیری ساحیلده سئوینج ایله دایانسین
بیری ذلت پالازین باشه چکیب یاتسادا آنجاق،
بیری نین بختی اویانسین
بیری قویلانسادا نعمت لره یئرسیز،
بیری ده قانه بویانسین
آی آدامسیز سوری آدلی، ساچلاریندان دارا باغلی!
نئیله مک ایش بئله گلمیش. چور گلنده گوله گلمیش
فلکین ایری کمانینده اولان اوخ آتیلاندا دوزه دگمیش،
دیلسیزین باغرینی ده لمیش
ایری قالمیش، دوزو اگمیش
اونو خوشلار بو فلک،
ائل ساراسین سئللر آپارسین،
بولبول حسرت چکه رک گول ثمرین یئللر آپارسین
قیسی چوللرده قویوب
لیلی نی محمللر آپارسین،
خسرووی شیرین ایلن ال اله وئرسین، کئفه دولسون،
سوری لار سولسادا سولسون،
بیری باش یولسادا یولسون،
سیقسا بیر اولدوز اگر اولماسا اولدوزلار ایچینده،
بو سماء ظولمته باتماز
داش آتان، کول باشی قویموش،
داشینی اوزگه یه آتماز
سن یئتیش سون هدفه،
اوندا فلک مقصده چاتماز،
داها افسانه یاراتماز
سوری، ای باشی بلالی، زامانین قانلی غزالی
سوری بیر قوش دی خزان آیری سالیبدیر یوواسیندان،
ال اوزوبدور آتاسیندان،
جوجه دیر حیف اولا سود گورمه ییب اصلا آناسیندان
او زلیخا کیمی یوسف ایی ین آلمیر لباسیندان
بونا قانع دی تنفس ائله ییر یار هاواسیندا
درد وئرن درده سالیب آمما خبر یوخ داواسیندان
آغلاییب سیتقایاراق بهره آپارمیر دوعاسیندان
او بیر آئینه دی رسسام چکیب اوستونه زنگار،
اوندا یوخ قدرت گفتار،
اوزو چیرکین، دیلی بیمار،
گنج وقتینده دل آزار،
گوره سن کیم دی خطاکار،
گوره سن کیم دی خطاکار!

ساده بیلیردیم - نصیر پایه گذار

ساده بیلیردیم

منده باخ ساده لیگه،عشقی یامان ساده بیلیردیم
گؤزلرین ساغرینی بس کی دولو باده بیلیردیم
قوپاریب قورخولو طوفان اوره ییمدن یارین عشقین
ساویریب توپراغیمیوئرمه یینی باده بیلیردیم
گؤزلری دام بلا اولماغینی هر گئجه گؤردوم
شیرینین عشقی نه لر ائیله دی فرهاده بیلیردیم
چوخ درین چوخدا قارانلیق قویودور عشق بلاسی
عشقی من جیلوه لی آیدین بیر اوزون جاده بیلیردیم
عشق سیز زندانا وار اوخشاری دنیاده حیاتین
عاشیقه عشقی شعادت قوشو دنیاده بیلیردیم
عشق عقلیله سویو هئچ ده بیر آرخا گئده بیلمز
عشقی حاق جیلوه لری، عاشیقی آزاده بیلیردیم
اولسا فرزانه بیری، اولماسا  عاشیق نیه لازیم
گلمه یین عشق ده فرزانه ده، فریاده بیلیردیم
یاشاما عقل ایله، عشق ایله یاشا سن ده نصیر آ
سالماغین نازلی نیگارین سنی ده یاده بیلیردیم

سن سیز - لاچین نجف قولو

آیلی گئجه لری سن سیز گزیرم

خزان یارپاقلاری سن سیز ازیرم 

یولونو گؤزله ییب درده دؤزورم

سؤنموش اوجاغیما دؤنورم سن سیز

وئردیین حسرتین داملا – داملادی

آه و دومان اولور اؤرتور یوللاری

آختاریر گؤزلریم وفاسیز یاری

گؤی ده اولدوزلاری گؤرمورم سن سیز

گزدیین یوللاری خزل توتوبدو

سرین بولاقلارین سویو دونوبدو

یاشیل چمن ینه شیدا قولودور

داها او یئرلره گئتمیرم سن سیز

آغلاییر یارپاقلار اسیر بوداقلار

ایسلانمیش اوزومده دونوب یاناقلار

اوزومده غم کدر قلبیم قان آغلار

نئینه ییم من گوله بیلمیرم سن سیز

شاعر : لاچین نجف قولو

فریاده گلین - هوشنگ جعفری زنگانلی

فریاده گلین نازلی نیگاریم گئدیر الده ن

همد م اولوب اغیاریله یاریم گئدیر الده ن

رفتاری گوزل نوطقی گوزل باخماسی گویچک

آهو کیمی باخدیقجا قراریم گئدیر الده ن

حسرتله قالار گوزلریم آخیر دالئسیجا

هجران یئلی اسدیکجه باهاریم گئدیر الده ن

ناز ایله سه نازین چه که ره م ئول دیسه ئوللم

یوخ چاره یولوم شعر و شعاریم گئدیر الده ن

آواره قالان من غمی عشقینده یانان من

آخیر نه دئییم دار و نه داریم گئدیر الده ن

زلفین توکوب اطرافه گیوب جامه ی زرین

آماده اولوب گئتمگه یاریم گئدیر الده ن

یاشیل سئل - اسماعیل جمیلی

یوز ایللرین اسگی قیسیر قانونلاری پوزولماسا
گله نک لر ایلمک ایلمک سؤکولمه سه
اؤسه له نیب آرینماسا
بولانلیقلار دورولماسا
آدیم آدیم یئنی دوران قورولماسا
قاریش قاریش آنا وطن گوللنمه سه
اؤلکه بویدا دوستاق اولان پاسلی قفس قیریلماسا
آزاد ائللر دیللنمه سه
جهالتین جسارتی مزارینا تیخیلماسا
پالان اولان یالانلارین قوتساللیغی ییخیلماسا
نسگیل اولان اؤزگورلویون ماهنیلاری دوداق دوداق اوخونماسا
یاشام آدلی گؤزه للییین شن خالیسی ناخیش ناخیش توخونماسا
اولوب قالان اسگی حامام اسگی تاسدیر
قارا گوندور قارا یاسدیر
داملا داملا اریمک دیر
گئریلییه سورونمک دیر
گؤز اؤنونده قوتسالاشان
استبدادین قفسینده چورومک دیر
بو قورقودا بو قفسده بو دوستاقدا
یایقین اولان حماقته
عادی لاشان قباحته
گونلوک اولان جنایته
قیرخ حرامی قولدورلارین قورقوسونا
قودوز قودورقان دولته
ظالیمین ظولمون یاتاغی حکومته
ائل اینانجین ظولمه اویونجاق ائیله ین
عدالته آغیز ایین یالان یالان اوسته دئیین
فیتنه فسادین اوداغی ولایت وقاحته
باش ایمه ین سینه گره ن
یاشیل سئلین باغیردیغی آزادلیغا آلقیش آلقیش
آیدینلیغا یئنی لییه آبادلیغا آلقیش القیش
یاشیل سئلین قارشیسینی قیش آلانماز
دالغالانان دورو دنیز دای دایانماز بولانماز
گله جه یه آخمادادیر
دالغا دالغا استبدادین چؤر چؤپونو یومادادیر
قولدورلارین قورقوسونو یاخمادادیر
بو یاشیل سئل آزادلیغین اولدوزلارین
قارانلیغین کور کؤزونه سوخمادادیر
بو یاشیل سئل آیدینلیغا اؤزگورلویه اؤزون توتوب باخمادادیر
  

قاراداغا یاز گله جک - امین حبیبی

دؤزون پاییز قیش سووشسون

قاراداغا یاز گله جک .

قارتال لار مسکن سالاجاق

گؤل لرینه قاز گله جک .

خوش گونلریمیز چاتاجاق

زلزله طوفان یاتاجاق

آشیق ولی ال آتاجاق

چالا چالا ساز گله جک .

تر چیچک لر بویلاناندا

بولبول اوستونه قوناندا

جه جه ووروب دولاناندا

هر یاندان آواز گله جک .

سسله نه جک یانیق کرم

اورکلردن سیله جک غم

امین سئوینجیدن او دم

یازماغا سؤز آز گله جک .
*
وبلاک امین حبیبی
*

die uhrzeit

Die UhrzeitDie Zeit hat niemals für sich Zeit,
denn sie läuft ständig weiter.
Sie trägt ein graues Arbeitskleid
Und ist zum Ausruhen nie bereit,
sie macht auch nicht gescheiter,
weil sie ganz einfach, tik, tak, tik,
nur vorwärts schreitet, nie zurück,
mit jedem Uhrschlag bestimmt
ein Leben gibt, ein Leben nimmt.
..
Sekundenschnell kostet ihr schlagen
So manchen von uns Kopf und Kragen.
Wenn Politik die Zeit verdreht,
diese sehr bald im Abseits steht.
..
Ihr Ablauf drängt uns in die Pflicht,
denn Zeitverspätung kennt sie nicht-
doch hält sie Glückliches bereit,
vergisst man einfach mal die Zeit.
Geert-Ulrich Mutzenbecher…….

زمان
زمان هرگز برای خودش وقت ندارد
زیرا او مدام در حرکت است
او لباس کار خاکستری می پوشد
و هرگز برای استراحت آماده نیست
او همچنین زرنگی نمی کند
زیرا او خیلی ساده با تیک ، تاک ، تیک
به جلو گام برمی دارد
و هرگز به عقب برنمی گردد
با هر ضربه اش ، فرمان می دهد
به تمام شدن یک زندگی و آغاز زندگی دیگر
..
حتی زمانی که
سیاست زمان را به گونه ای تغییر می دهد
باز او با ضربات سریع
وبا سر و جان به جلو می رود
..
گذر زمان ما را به جلو هل می دهد
زیرا او تاخیر نمی شناسد
همچنین اگر خوشبختی دوام داشته باشد
آدمی گذر زمان را فراموش می کند

باغیشلادا - وحید شکرزاده

 

گر کی من گــــــــــوزلریوین حــــــــــــــیرانییام باغیشلادا

ایجازه سیز گــــول اوزوون قوربانییام باغیشلادا

قاچیتمیشام عشقیده ســــــولطان گیبی اُو رقیبلــــــــری

ایندی اگر عشقیوین ته سولطانییام باغیشلادا

یالقیز کی گوردوم سنی من چوخلی سنی سئودیم گوزل

ایندی اگر ته لیغیوین درمــــــــانییام باغیشلادا

گـــــــــــوزل خانیم سن گول اولاندا سنی من یئکتمیشم

ایندی اگر گـــــــولزاریوین باغبانییام باغیشلادا

من نینییم میلیونا یاخین دنه قـــــــــــــــــــیز سئویر منی

ایندی اگر دورانیمین جــــــــیرانییام باغیشلادا

سن دن ده چوخ ایستییرم اُوز دیــــــــــــلیمی ایندی اگر

حلال زادا یوردومون بیر اُوغــلانییام باغیشلادا

*

شاعیر : وحید شکرزاده

*

قیزلار ایستییر منی - وحید شکرزاده

 

نه اُولـوب نه لر چُونوب ، قیزلار ایسـتییر منی

بـــیری گؤز وورور منه ، بـیری سسلییر منی

بـیری ناز ائیلییری ، بـــــیری ایسته دیر اُوزون

بـــیری غمزیله باخیر ، بـــــیری یاندیریر منی

بـیری تیلفونون وئریر ، دییر زنگ اِئت منه سن

بــیری گول وئریر منه ، بــــیری دیندیریر منی

بــــیری شعر دییر منه ، بــیری نامه گُونده ریر

بـــیری اس ام اس وورور ، یازیر گؤزلییر منی

بئله بیر گول اُوغلانی ، نیه سن ایسته میسن

بیلمیرم هانسی یئتیم ، سنه پیسلییر منی

مجنونا هامّی بــــــــوگون ، گوزلرینده یئر وئریر

قالمیشام لیلا نـــیه ، گئنه ایسته میر منی

شاعیر : وحید شکرزاده

الهام غزل - رند ماکو

 

اوکی شاعیرلیگیمی وقت ازل وئردی منه

ساچینین قوخسونو الهام غزل وئردی منه

**

 بیرغریب قوخسو٫قریب حیس بورودو دنیانی

جانیما دولدو -و-شاعیرلیگیم  ال وئردی منه   

**

 سسله دی٫آلدی منی قوینونا ساقی صوندان

دالبادال باده نی دولدوردو-گوزه ل-وئردی منه

**

 یوزیقین ٫منده سئچیب -آزدا اولا- استعداد

 سئوگیمی قورماغاسهمانلی تمل وئردی منه

**

تورکو سویله ر دیل ایلن لاپ دوزو قاتمیش قنده

او ٫شکر ٫بال دوداغی طعم عسل وئردی منه  

**

 "رندی"بوندان بئله  قدرین بیله رم سئوگیلیمین

یئنی ده ن مهلت او سلطان غزل وئردی منه

*

رند ماکو 

*