بیر گؤزل کی، شیرین اولا بینادان

شاعر: ملا پناه واقف
*

بیر گؤزل کی، شیرین اولا بینادان
یۆز ایل گئتسه اونون دادی اکسیلمز
تزه ‌لیگی، کؤهنه ‌لیگی بیر اولور
گؤهر تک قیمتده آدی اکسیلمز
*
گؤزللیکدن دوشمز هئچ اصیل‌زادا
گۆن‌ به‌ گون قامتی دؤنر شیمشادا
مهر و محبّتی اولور زیادا
اعتیباری، اعتیقادی اکسیلمز
*
نه قدر کی، یۆزه یئتیرسه یاشی
تا کی، هئیدن دۆشه، تیتره ‌یه باشی
گئنه جان آلماغا گؤزیله قاشی
غمزه ‌سی‌نین هئچ جلّادی اکسیلمز
*
جؤوهری پاک اولور تزه جاواندان
هرگیز ال گؤتورمز شؤوکت و شاندان
مۆژگان خدنگلرین کئچیریر جاندان
پئیکانی‌نین هئچ پولادی اکسیلمز
*
واقیف، ایستر ایسن گؤره‌سن لذّت
گل سئو بیر درد بیلن، اهلی محبّت
نؤوجاوانلار سئون هئچ اولماز راحت
گئجه- گۆندوز هئچ فریادی اکسیلمز
*

آغلا گؤزوم، آیریلیرسان جاناندان - ملا پناه واقف

ملا پناه واقف
آغلا گؤزوم، آیریلیرسان جاناندان
هر کسی کی، گؤرسن، شیکایت ائیله
اؤلدون گئتدین، بلکه یاری گؤرمه‌دین
کعبه‌ی- کویینی زیارت ائیله
*
سن منیم جانانیم، روحی روانیم
لبلری شیرینیم، قونچه دهانیم
بیر ساعت گؤرمه‌ سم، طوطی زبانیم
قوپاجاق باشیما قیامت ائیله
*
واقیف بیر شئیدادیر، دولانیر باغی
خسته‌دیر، درمانی، دیلبر دوداغی
او آلما یاناغی، بۆللور بوخاغی
آللاه، بدنظردن سلامت ائیله
*

یار اگر مهر و وفانی دوشونن یار اولسا

شاعر: علی آقا واحد

یار اگر مهر و وفانی دوشونن یار اولسا

غم دئییل کی بوتون عالم بیزه اغیار اولسا

اهل دل ذوق و صفانی لب جاناندان آلیر

ظلم دور عاشیقه ، جانانی دل آزار اولسا

وار نه غم گؤزلرینین خسته سینه یوخذدور علاج

لب لرین چاره سین ائیلر ، نئجه بیمار اولسا

زولف و خالین او مهین گؤزیاشیم ائیلر روشن

گئجه آیدینلیق اولار ، ثابت و سیار اولسا

یار اگر عاشیقه غمخوارلیق ائتمزسه نه غم

 غم اودور اؤزگه یه معشوقه سی غمخوار اولسا

گؤزلرین شوق ایله قان تؤکمه گه چوخ راغیبدیر

مست دیر ، بونجا خطا ائیله مز هوشیار اولسا

وار اومیدیم منه واحد داها ظلم ائتمه یه جک

حال زاریمدان او مهپاره خبردار اولسا 

یارب ایتیرمیشم نئچه گوندور نگاریمی

شاعر: علی آقا واحد
یارب ایتیرمیشم نئچه گوندور نگاریمی
دئییرم سن یئتیر منیم او نازلی یاریمی
یوخدور گولوم نه اوزنه گئدیم سئیر گلشنه
بختیم بو ایل خزان ائلییبدیر باهاریمی
او لاله اوزدن منه هر کیم خبر وئره|
بالله سئویندیررمنیم بو دل زاریمی
نامرد رقیبین حیله سینه اویدو دلبریم
یاندیردی نار حسرتیله منیم قلب زاریمی
آی باشیم بلالی دیراؤلورم کیمسه بیلمیر
بیر قاره گؤزلو الدن آلیب اختیاریمی
واحد بو شعری یاز جانانه عؤمردن گئدیب
بیر واخت اولور کی خلق اوخویار بادگاریمی
*

بیر دیلبریم اولسا - علی آقا واحد

بیر دلبریم اولسا

اؤلمزدیم اگر سن کیمی بیر دلبریم اولسا

بیر آفت جان ، شوخ ملک منظریم اولسا

هر گون دولانیب باشینا ، قوربانین اولاردیم

پروانه صفت ، اوچماغا ، بال و پریم اولسا

منده سئویلردیم ، بوتون عاشقلر ایچینده

آهولرین مجنون ائلیه ن گؤزلریم اولسا

شوقیله نثار ائیله رم ، هر بیر قدمینده

دریا قدری الده ، دور و گوهریم اولسا 

کویوندا منه قوی نه بیلیر ائیله سین اغیار

البته جزاسین چکر ، آللاه کریم اولسا

بیگانیه من بیر بئله منت می ائده ردیم؟

کؤنلوم کیمی بیر یار وفا پروریم اولسا

واحد دئمه رم دردیمی من باشقا نیگارا

یاریم بیلیر عشقینده نه دردی سریم اولسا

* 

یانیندا دلبریمین اعتباریم اولماسادا - علی آقا واحد

شاعر: علی آقا واحد

یانیندا دلبریمین اعتباریم اولماسادا

یئنه غمین چکرم غمگساریم اولماسادا

بدنده یاری جانیم قالماییب گئدیب یاریم

گرک دؤزوم غم هیجرانه یاریم اولماسادا

گؤنوم کی تار اولوب او زولف الیندن ای تانری

ترنم ائیله سنی تانری تاریم اولماسادا

اوزون خیالی بسیمدیر بهشت کویوندا

یوز ایل خیالیمه گلمز بهاریم اولماسادا

لبینله مست گؤزون هر دوشنده خاطیریمه

شرابه رغبتیم آرتیر خوماریم اولماسادا

منیم بیر آهیم ایله شمعلر یانیر گئجه لر

توخونما شعله عشقم شراریم اولماسادا

کمند زولف ایله واحد اؤزوم شکار اولدوم

منیم او آهو باخیشلی شکاریم اولماسادا

* 

تکی سن سسله منی - علی آقا کورچایلی

تاکی سن سسله منی
هاردا اولسان گلریم
تاکی سن سسله منی
داردا اولسان گلرم
تاکی سن سسله منی
*
یاخین اولسون یا اوزاق
دره اولسون یادا داغ
منی کیم ساخلایاجاق
تاکی سن سسله منی
*
یارالار قوور ائدیر تزه دن
نییه کؤنول وئریردین اونا سن اوره ک
سئومیردی او سنی نییه سئوریدین 
سنی سئومیه نی نیه سئویردین
عشقینه من قربان دئدیم آی اوره ک
دئدی نئچه دفعه دئدیم آی اوره ک
سئومه ییریار سنی نیه سئویرسن
سنی سئومیه نی نیه سئویرسن
سؤزومه باخمادین ایندی یان اوره ک
یان یان ای منیم کیمی پشیمان اوره ک
سئومه دی یار سنی نیه سئویردین
سنی سئومیه نی نیه سئویردین آی اوره ک
یان یان آی اوره ک
*
عشقه یوردوسسیمه
قوجاغیما گلسن اگر
دؤنرم گئنج له شه رم
تاکی سن سسله منی
سن سن عشقیم امه ییم
گلسن بیرگون ده اؤلوم
وئرمه رم جان آی گولوم
تاکی سن سسله منی
اؤلمه رم بیل سئوگیلیم
تاکی سن سسله منی
*

بوراخما ای کؤنول او نازلی یاری اؤز باشینا - علی آقا واحد

بوراخما ای کؤنول او نازلی یاری اؤز باشینا

روا دئییل قالا ائللر نیگاری اؤز باشینا

گؤزیله کیپریگی بیرلیکده قان تؤکور گئجه لر

عجب قالیب گئنه دریا کناری اؤز باشینا

قراره گلدی رقیب ال گؤتورسون اول گولدن

نه اعتبار اونا ، دئسین قراری اؤز باشینا

او قاره گؤزلونو گؤزدن کناره قویما کؤنول

بوراخماز اووچی گؤزل بیر شیکاری اؤز باشینا

گول اوزلولر نه قدر وارسا باغبانی منم

نئجه قویوم بئله بیر گول عذاری اؤز باشینا

رقیبی یاره طرف قویمایین یاخین گلسین

کی گول سولار گؤره بیر بوته خاری اؤز باشینا

عمومه خدمت ائله واحد ، آرتیب اینسانلار

کی ، سانما ائل قازانیب اعتباری اؤز باشینا

* 

بیر گون گؤزلیم قبریمین اوستن اؤتوشرسن- علی آقا واحد

بیر گون گؤزلیم قبریمین اوستن اؤتوشرسن

دردیندن اؤلن عاشیقینی باشه دوشرسن

ائتمز ملک اولسا بو قدر ناز و کیریشمه

اینصافه یاخینلاش گؤزلیم سن ده بشر سن

نازیله گلرکن قدمین قوی گؤزوم اوسته

قویما قورو یئر اوستونه بیرده سوروشرسن

بیگانه ایله گزمه دئدیم قلبینه دیدی

جانان نه بیلیم سن بو قدر دیمه دوشرسن

بیر سالمادین اؤز عاشیقینی یادینا ظالیم

اغیاریله اما گئدیب هر گون اؤپوشرسن

ال چک منه ای دل دئمه زولفوندن او ماهین

بیر گون بو کمنده سن اؤزونده ایلیشرسن

رحم ائیله مه دین واحده ظالیم دیریلیکده

اؤلدوکده مزاریمله گئدرسن گؤروشرسن

* 

آنامین قبیر داشی اوچون - شهربانو - قایاقیزی

در رثای مادرم
دیندیرمیون قان آغلارام
آنام، مهربانیم گئدیب
بوینو بوکوک بیر بلبلم
گولوم گولوستانیم گئدیب
هجران اوتوندا یانیرام
روحوم، بوتون جانیم گئدیب
اوددا یاندی افغانیمدان
بیلدی کی جانانیم گئدیب
دیندیرمیون آغلیر کؤنول
جاندان شیرین جانیم گئدیب
*
شهربانو( قایاقیزی)
( 1401.11.04 / 2023.01.24 )

وورما اوقاره تئللرینه شانه سئوگیلیم

شاعر: علی آقا واحد
وورما اوقاره تئللرینه شانه سئوگیلیم
ائتمه منی بلاکش دیوانه سئوگیلیم
یاندیردی حسرتین منی، گؤستر جمالینی
کؤنلوم اولوب اول آتشه- پروانه سئوگیلیم
بیر دفعه ائیله دیمسه، تمنای وصلینی
یوز دفعه یاندیم- آتش هجرانه، سئوگیلیم
گزمه رقیبله منی غیرت هلاک ائدیر
سالما بلالی عاشقینی قانه سئوگیلیم
گؤسترمه قاره خالینی، کؤنلوم فغان ائدیر
قوش، ده ن، گؤرنده تئز گلیر افغانه سئوگیلیم
یوز لیلی گؤرسه حسنونی مجنون اولار سنین
عشقینده اوز قویاردی بیابانه سئوگیلیم
انصافی اولسا چرخ، بو بیچاره «واحدی»
حسرت قویارمی، سن کیمی جانانه سئوگیلیم؟
*

فکرینده می، بیر گون گؤزه لیم، بیز سیزه گلدیک؟

شاعر: علی آقا واحد
فکرینده می، بیر گون گؤزه لیم، بیز سیزه گلدیک؟
سیزدن قاییدیب، سونرا برابر بیزه گلدیک؟
گُولدوک و دانشدیق گئجه نی، صبح آچیلینجا
بیر غنچه گول اوستونده، سیزینله سؤزه گلدیک
کئف چکدیگیمیز خاطره لر، وارمی یادیندا؟
گولشنده بیر آیدین گئجه ده، اوز اوزه گلدیک
خیلی دولانوب سئیرائیله دیک گول لر ایچینده
بیر- بیریمیزه چوخ عشوه لی، چوخ بامزه گلدیک
بیزکی، گؤزه لیم، جان دئیه رک، جان ائشیدیردیک
بس ایندی نه اولدو بیزه، یوخسا گؤزه گلدیک!!
نه سنده وار اول مهر و محبت، نه ده منده
سوندوک ایشیق اولدوز کیمی، سون منزله گلدیک
واحد، او گئچه ن گونلری، بیر مرّه اوُنوتدوق
لیکن یئنی دنیایه، بیز ایندی تزه گلدیک
*

آی قیز - عاشیق شمشیر

شاعر: عاشیق شمشیر

نییه مندن گئن گزیرسن؟
دولانیرسان گئندن آی قیز؟
پریشان قلبیمه دیمه
کوسر کؤنلوم سندن آی قیز
*
مشتاقام قلم قاشینا
دوروم دولانیم باشینا
پروانه تک آتش لره
یاندیم ازل گوندن آی قیز
*
شمشیر اوچون ارمغان سان
هم گؤزل سن، هم جوان سان
سن کی سرو خرامان سان
نه دئدیلر مندن آی قیز؟
*
مشتاقام قلم قاشینا
دوروم دولانیم باشینا
پروانه تک آتش لره
یاندیم ازل گوندن آی قیز
*
حسرتینی چکدیم هر آن
دردین منی اَیدی پونهان
بیلمیرم کی سنه هر آن
نه دئدیلر مندن آی قیز
*
مشتاقام قلم قاشینا
دوروم دولانیم باشینا
پروانه تک آتش لره
یاندیم ازل گوندن آی قیز
*

سئوه یدین باری - حسین عارف

سئوه یدین باری
شاعر: حسین عارف
ایللرله من سنین اودونا یاندیم
باشقا بیریسینه میل سالمادیم
هر دیقه هر زامان آدینی آندیم
گؤزله دیم، گؤزله دیم
سندن من جواب آلمادیم
*
گؤزدن اوزاق اولوب، دوشمه دیم یادا
یالانچی محبت آلداتدی سنی
دؤزولمز آغیردیر، دوزو دنیادا
سن یاری سئوه سن، یار اؤزگه سینی
ندن دیر، ندن دیر، ندن دی
سئودین سن یار اؤزگه سینی
*
کیمدیر یانینداکی، تانی سن گؤزل
اونون نه عهدی وار نه اعتباری
ای منی به یه نیب، سئومه ین گؤزل
مندن یاخشی سینی سئوه یدین باری
سئوه یدین باری

اونودا بیلمیرم - نوروز گنجه لی

شاعر:  نوروز گنجه لی
آیری دوشدوک آیلار اولدو، ایل اولدو
عشقیم سن سیز بیر چاغلایان سئل اولدو
باغچا سالدیم، چیچک آچدی گول اولدو
نئیچون سنی بس اونودا بیلمیرم
*
مین رنگ وئریر باهار هر بیر چیچه یه
روح گتیریر هر قلبه هر اوره یه
من چاتیرام هر آرزویا دیله یه
نئیچون سنی بس اونودا بیلمیرم
*
دئییرلر کی یوخدور سئوگی محبت
بیر – بیرینه، قیز – اوغلان ائدیر عادت
دوغرودانسا، یوخدور اگر محبت
نئیچون سنی بس اونودا بیلمیرم
*

دوبیتی - نظمی تبریزی

یوخدی شادلیقدان اثر، هر یاره اوز دؤنده ریرم
غمدی باشدان - باشا، دنیای محبت بوایمیش؟
قرن لردن سونرا هر یئرده زلیخانین آدی
هله دللرده دی، غوغای محبت بوایمیش؟
*

دوبیتی - شاه اسماعیل ختایی

منه درد و بلالر یاخشی گلدی
سنه ذوق و صفالر یاخشی گلدی
سنه خوش اولدی یارین یار اولدی
منه شول آشنالر یاخشی گلدی
*

بختیارام من

بختیارام من – شاعر: بختیار وهابزاده
عؤمرومون پاییزیندا، سئودیم، سئویلدیم
ائله بیلیرم کی، ایلک باهارام من
آرخاندا سورونن، کؤلگنم سنین
هاردا قرار توتسان، اوردا وارام من
*
اؤزون بیر عالَم سن، عشقین بیر عالَم
سن اولان کؤنولده، نه کدر نه غم
سن سیز بو دنیانین، ان بدبختی یم
سنین له دنیادا، بختورم من
*
می اولسان یانییندا، بیر قدح اوللام
گول اولسان چترینی، اؤپن مئه اوللام
اوت اولسان بیر آن دا، دؤنوب شئه اوللام
داغ اولسان زیروه ده، یاغان قار اوللام
*
سئوگییه حد قویماق، دوزو گناهدیر
جاهیلین هر ایشی، سؤزو گناهدیر
عشقی گناه سایماق، اؤزو گناهدیر
کیم دئییر عشقیمده، گناهکارام من
*

یومول بنفشم - نصرت کسمنلی

شاعر: نصرت کسمنلی
نه یامان سازاقدی
گونش سندن اوزاقدی
بیر آج قوزو مه له ییب
سنه بویلانیب باخدی یومول بنفشم یومول
*
چمنلره ایز دوشر
بیر دئییل کی یوز دوشر
نیه سنین پاییزین
هرچیچک دن تئز دوشر
یومول بنفشم یومول
*
قالارسان باخا – باخا
کاغاذ گول سندن باها
آری یامان چوخالیر
گولوده سانجیر داها
یومول بنفشم یومول
*

دیلینده دیر

شاعر: زلیم خان یعقوب

قیزینجی اوجاغین باغریندان قوپار

اودون محبتی کؤز دیلینده دیر

اینجی ، کیپریک چالما ، اشاره ، ایهام

باخیش دیلینده دیر گؤز دیلینده دیر

کهلیکینن داش دانیشیر داش

غمین اثری دیر گؤزونده کی یاش

بیزیم دیلیمزده نه وار کی قارداش

نه وارسا تانری نین اؤز دیلینده دیر

گؤزل لر دانیشار ملک دیلینده

ملک لر دانیشار فلک دیلینده

یازین طراوتی چیچک دیلینده

قیشین سویوخلوغو بوز دیلینده دیر

یورولماز کؤهری بودره مز آتی

تورپاقدی ، اوجاقدی عؤمرو حیاتی

زلیم خان نه یازسا قوشما بایاتی

زلیم خان نه دئسه ساز دیلینده دی

*

بیر سن بیل بیرده من بیلیم

شاعر: زلیم خان یعقوب

سن آللاه کنارا چیخماسین بو سؤز 

بو سیرری بیر سن بیل بیرده من بیلیم

کیمسه نین ائوینی ییخماسین بو سؤز

بو سیرری بیر سن بیل بیرده من بیلیم

سئوگی بیر عؤمورلوقدو بیر جان دئییل

سن سیز بیر جان سیزام ، جانیم جان دئییل

آللاهین اؤزوده سیرر آچان دئییل

بو سیرری بیر سن بیل بیرده من بیلیم

سن یانار اولدوزسان من دوغار آیام

سن آخار چشمه سن من دلی چایام

کیملره سئوقه تم کیملره پایام

بو سیرری بیر سن بیل بیرده من بیلیم

سن شاهلیق ایسته دین فرمانین اولدوم

سن علاج ایسته دین درمانین اولدوم

زلیم خان نئچه یول قربانین اولدو

بو سیرری بیر سن بیل بیرده من بیلیم

*

یاغ ای یاغیش

شاعر: یتیم عئیواض

یاغ آی یاغیش، یاغگینان سن

سنه احسن، سنه آلقیش، یاغ آی یاغیش

یاغگینان سن، بو چؤللره چمنلره، یاغگینان سن

سوسوزلوقدان خزان اولان بو چؤللره، یاغگینان سن

یاغگینان سن، آرزولارا دیلک لره، یاغگینان سن

محبت دن آلاولانان اورکلره، یاغگینان سن

یاغگینان سن، یاغا – یاغا، ایسلاتگینان پالتاریمی

قایتار منه قدیمده کی اؤز عهدیمی ایلقاریمی

ائیله یاغ کی قوی ایسلانسین الیمده کی قلم واراق

یادیمدادی نئجه یاغدین، دوز اوتوز ایل بوندان قاباق

ائله گؤزل یاغمیشدین کی، ایسلانمیشدی اوز گؤزوموز

اوتورموشدوق قالا آلتیندا، بیرآغاجین آلتیندا بیز

سن یاغیردین دامجیلارین سپیلیردی اوزوموزه

ایکی میزده ایستمیردیک، دوروب گئدک ائویمیزه

قورخوردوخ کی دوروب گئتسه ک خلل گله سئوگیمیزه

سن بیر شعر سن کی ، سن بیر نغمه سن کی

آغزین یوخدو دیلین یوخدو ، نئجه دئییم بیله سن کی

سن یاغاندا یاماجلارا دوزه نلره جان وئریرسن

زمی لره سنبل لرین دامارینا قان وئریرسن

آغ آی یاغیش قوربان اولوم، سحره جان یاغگینان سن

دایانمادان قالا آلتیندان شهره جک یاغگینان سن

یاغگینان کی گؤی تپه ده، تپه لرده چیچک آچسین

بو اولکه دن، بو دیاردان، غصه کدر اوزاقلاشسین

یاغ آی یاغیش نه اولار کی، خبر آپار سئوگیلیمه

آمان گوندو بو حالیمی بو گونومو، اونا دئمه

دؤیه – دؤیه پنجره سین، دئگینن کی گلیبدی یار

قالا آلتیندا علی نن بئش بئش ویریر، گلیبدی یار

*

ببار ای باران

احسن بر تو ، آفرین بر تو

ببار ای باران

ببار بر این دشت و چمنزارش

ببار ای باران

ببار بر دشتهائی که از عطش خشک شده اند

ببار باران

ببار بر آرزوها و امیدهایمان

ببار باران

ببار بر دلهائی که از آتش عشق شعله کشیده اند

ببار باران

ببار و با بارش خود لباسهایم را خیس کن

عهد و پیمان گذشته ام را به من باز گردان

چنان ببار که قلم و کاغذ در دستم خیس شود

به خاطر دارم  سی سال پیش که باریدی

سر و صورتمان را خیس کرده بودی

من و دلدار زیر درختی ، پائین قلعه نشسته بودیم

می باریدی و قطره هایت را

به سر و صورتمان می پاشیدی

هر دو مان نمی خواستیم به خانه برگردیم

می ترسیدیم این رفتنمان خللی به عشقمان وارد کند

تو چنان شعر و نغمه بی زبانی که

چگونه بگویم بدانی

وقتی می باری ، بر دشت و دمن جان می بخشی

به جان سنبلهای دشت خون تازه می بخشی

فدای تو ببار باران ، ببار تا سپیده دم

بی وقفه از قلعه تا شهر ببار

ببار که بر تپه سبز گلهای تازه بروید

ببار شاید

از این ملک و دیار غم و رنج دور شود

ببار باران ، خبر ببر به دلدارم

زنهار که حال و روزم را به او نگوئی

پنجره اش را بزن و بگر که دلدارت آمده

* 

هئچ نه ایسته میرم آللاهدان داها

شاعر: یتیم عئیواض ( داغلی عئیواض )

بیر من اولوم بیر سن بیرده گؤیده آی

بیرده گوللو چمن ساکت آخان چای

حزین نغمه دئسین بلبل توراغای

هئچ نه ایسته میرم آللاهدان داها

یئرین اولسون منیم گؤزومون اوسته

شاعرم دورارام سؤزومون اوسته

نه اولار باشیمی قویوم دیزیوین اوسته

هئچ نه ایسته میرم آللاهدان داها

آتیب بیر کنارا فیکیری غمی

خیاللا سئیر ائدک گؤزل عالمی

دئییم گولوم سن له سحره کیمی 

هئچ نه ایسته میرم آللاهدان داها

داغلاری دومان سیز چن سیز اولماسین

زمی ده سنبل سوز دن سیز اولماسین

ائیوازین بیر گونو سن سیز اولماسین

هئچ نه ایسته میرم آللاهدان داها  

ای گؤزلیم گؤزله منی - وحید شکرزاده

ای گوزلیم گوزله منی

ای گوزلیم گوزله منی عشـق اودونا سالمییاسان

یا گئدسن بیر داحا بو عاشیقیوی سایمییاسان

هی قورخورام بی وفالیق رسمینی سن اورگشسن

گول اوزووه یئتیشممیش سنده منی تک قویاسان

اینانمیشام کی سن منی گورنده لیلا کیمی سن

گوزله کی سن مجنونوون قلبینی سیندیرمییاسان

قورخورام ای وای کی بوگون عاشیـق اولان کونلوموده
جییر کیمی شیشه چکیب عشقیده سن یاندیراسان

هامّی بیلیر کی من سنه عاشیق اولوب آلیشمیشام

بیـــر نه اولار سن ده منی اوز وصلیـوه چاتدیراسان

گور کی اگر ایمکانی وار اوز او شیرین دوداخلارون

طعمینیده بــو کونلومه من اولممیش دادّیراسان

*

ایسته میرم - وحید شکرزاده

ایسته میرم

گئت گولوم، گئت منه سن جان اولاسان، ایسته میرم

عشوه لی، سویگلی جانان اولاسان، ایسته میرم

بیرده گؤز یاشی تؤکوپ کویووا  گلمه م گؤزه لیم

گؤروب احوالیمی خندان اولاسان، ایسته میرم

بی وفالیقدا بوتون عالمه مشهور اولدون

سن اگر حوری قیلمان اولاسان، ایسته میرم

وورمیسان سینه مه مین یاره کفایتدی منه

بو سینیق قلبیمه درمان اولاسان، ایسته میرم

بی وفاسان دگیلم راضی اؤلندن سورادا

قبریمین اوسته نگهبان اولاسان، ایسته میرم

پیس گونومده منی سالدون نظریندن گئتدون

یاخشی گونده منه مهمان اولاسان، ایسته میرم

 *

نمی خواهم

برو گلم ، برو ، اگر بخواهی جان من بشوی ، نمی خواهم

با عشوه ، جانان سوگلی من باشی ، نمی خواهم

عزیز من دیگر با اشک چشم سر کویت نمی آیم

حالم را ببینی و خوشحال شوی ، نمی خواهم

در بی وفائی مشهور عالم شدی

اگر حوری و قلمان بشوی ، نمی خواهم

بر دلم هزار زخم زدی برایم کافیست

بر این قلب شکسته ام درمان بشوی ، نمی خواهم

بی وفائی راضی نیستم بعد از مرگم نیز

سر قبرم نگهبانی کنی ، نمی خواهم

در روزهای بدم مرا رها کردی و رفتی

در روزهای خوشم مهمانم شوی ، نمی خواهم

*

گول سنین نه یینه گرک دیر گولوم - زلیم خان یعقوب

گول سنین نه یینه گرک

گول سنین نه یینه گرک دیر گولوم

اؤپن دوداغی یوخ ، اوخشایان الی

گل گول ده چیچک ده اؤزوموز اولاق

سن بیرآز عاغیللی ، من بیر آز دلی

گول سنین نه یینه گرک دیر گولوم

سنین گولون ده من چیچکین ده من

گوللو ناغیللارا گئتمه سین عاغلین

سنین حقیقتین گئرچه یین ده من

گول سنین نه یینه گرک دیر گولوم

حسنون گؤزللیگین دونیادا تک دیر

اگر سن وارسان سا بو یئر اوزونده

دونیا باش دان باشا گول دور چیچک دیر

گول سنین نه یینه گرک دیر گولوم

قوخلا نفسیمی چیچه یه دؤنده ر

زلیم خان سؤزونه یالاندیر دئمه

بوتون یالانلاری گئرچه یه دؤنده ر

*

بئله سینه - زلیم خان یعقوب

بئله سینه

فره کهلیک کیمی سکیر

اووچو قییما بئله سینه

خائین گؤزه او میل چکیر

رحم ائیله گل بئله سینه

تئلی تؤکوب قاش اوسته

آغیز نازیک دوداق پسته

اود وورسادا سینم اوسته

اوف دئمه رم بئله سینه

قوی زلیم خان ساز گؤتورسون

سؤز اینجیسین تئله دوزسون

یا بیر یوللوق الین چکسین

داستان یازیم بئله سین

*

آللاه گؤزلره باخ نه گؤزل باخیر - زلیم خان یعقوب

آللاه گؤزلره باخ 

بئله آتش اولماز ، بئله کؤز اولماز

آللاه گؤلره باخ نه گؤزل باخیر

بئله آلاو اولماز ، بئله اود اولماز

آللاه گؤزلره باخ نه گؤزل باخیر

حاققین درگاهیندان ائنن ایشیق دی

عؤمره ناخیش ووران بیر یاراشیق دی

من گول آغاجییام او سارماشیق دی

آللاه گؤزلره باخ نه گؤزل باخیر

بیلمیرم نه زامان قارشیما چیخدی

قاریمی اریتدی ، داغیمی ییخدی

عاشقین جانی جهنم ، ملت یازیق دی

آللاه گؤزلره باخ نه گؤزل باخیر

سزایام داشلاریم تؤکولوب گئدیر

جیگریم جانیمدان سؤکولوب گئدیر

من آغلار قالمیشام او گولوب گئدیر

آللاه گؤزلره باخ نه گؤزل باخیر

اوره ک یوز پارچادیر ، کؤنول مین پارا

بیر گؤزل گؤزونده چکیلدیم دارا

زلیم خان اؤلمدی جانی قورتارا

آللاه گؤزلره باخ نه گؤزل باخیر

*

گؤزل سن - زلیم خان یعقوب

گؤزل سن

قوشا خلق ائیله ییب یارادان سیزی

دونیادا گؤزل دی سن ده گؤزل سن

ای دریا گؤزلی ، ای سو پری سی

دریادا گؤزل دی سن ده گؤزل سن

هر اینجه یئریشین بیر ناز هاواسی

هر اینجه گولوشون بیر ساز هاواسی

هر ایستی نفسین بیر یاز هاواسی 

هاوادا گؤزل دی سن ده گؤزل سن

ته زه جه آچیلمیش لالادی دونیا

آتادی ، آنادی ، بابادی دونیا

زلیم خان گؤزوند اعلادی دونیا

اعلادا گؤزل دی سن ده گؤزل سن

*

دینمیرم

شاعر: آیریلماز
دانیشیق عصرینده بیلمیرم ندن
اوره ییم دولوسو، سؤز دینمریم
بعضا عصیان ائدیر سؤز، یازیر قلم
نئیله مک قلمه دوز دینمیرم
*
آیریلدیم ائلیمدن دوشدوم یاد ائله
اوزولدوم سئوگیمدن من بیله – بیله
گودوکجو اولوبدور دوداغیم دیله
یازدیغیم سؤزوده دوز دینمیرم
*
اود توتوب غصه دن اوره ییم یانیر
داغ دئییب داغ اوستن سینم اودلانیر
او منیم ائلیمین گونشین دانیر
من اونون اودونا کؤز دینمیرم
*
آیریلماز باش قوشما آننامازلارا
شرف دن دانیشما اوتانمازلارا
بیلمیرم ندن سه او قانمازلارا
الیزی یاخامدان اوز دینمیرم
*

دئمک اولماز

شاعر: ایریلماز
دیلینی اؤرگتمه یالانا اوغلوم
دوز سؤزون قارشیندا سؤز دئمک اولماز
بلبوله قورباغا، سئرچه یه قارتال
ایشیغلی گونشه، کؤز دئمک اولماز
*
یالاندیر اینسانی بلایا سالان
شالاری تختیندن، سالیبدیر یالان
چالیش ائل آراسی، حیالی دولان
حیاسیز یاناغا، اوز دئمک اولماز
*
اینسان وار، دیندیرسن یاناغی سولار
بهتان سؤز ائشیتسه، بولود تک سولار
وقارلی اینسانی، اؤلدورمک اولار
آنجاق فکریندن، ال اوز دئمک اولماز
*
وار دولت بیر یانا، ویجدان بیر یانا
محبت ائیله ییر اینسان اینسانا
او گؤز کی گؤردویون کؤکوندن دانا
کور اولسون، او گؤزه، گؤز دئمک اولماز
*
وفاسیز دنیایه، ائتمه اعتبار
نه اکسن توپراغا، اکدیغین چیخار
آیریلماز چوخ سؤزو ائیلمه آشکار
یئر وار حاق سؤزوده، دوز دئمک اولماز
*

آی اوغلان - شاعر: آیریلماز

چوخ ییرغالانیب قاش گؤزونو آتما، آی اوغلان
تورکم منه چوخ فارسجا قیریلداتما، آی اوغلان
علم اولماسا مشکول دؤنوب آسان اولابیلمز
ائللر سؤزودور، تولکودن آسلان اولابیلمز
هرزه گولو ائل گوللرینه قاتما آی اوغلان
تورکم منه چوخ فارسجا قیریلداتما، آی اوغلان
*
آرتیق چالیشیب دوزلره اوخشاتما یالانی
تورکون آتیینا تیکمه ، یاراشدیرما، پالانی
آز بیلمه دوماوندیدن اوغلان، ساوالانی
ائل قارقیش ائدربوغدا وئریب ساققیز آلانی
میس دن اؤتری، آغ قیزیلی ساتما آی اوغلان
تورکم منه چوخ فارسجا قیریلداتما، آی اوغلان
*
باخ تاریخه گؤر کیم ده ده وه خ.ر باخیب اوغلان
اینسان آدینی دفتره کیم یازدیریب اوغلان
کیم بابکی ساتدی عربه، خانه سی ویران
کیم ائتدی خیانت، بؤلونوب آذربایجان
غفلت یوخوسوندا، بو قدر یاتما آی اوغلان
تورکم منه چوخ فارسجا قیریلداتما، آی اوغلان
*
مشروطه لیگی کیم گتیریب ایرانا اوغلان
ستار خانی کیملر چاغیریب تهرانا اوغلان
دالدان کیم آتیب گلوله نی ستارخانا اوغلان
کیم قاره باغی هدیه وئریب ایروانا اوغلان
بسدیر باشادوش، باغریمی چاتداتما آی اوغلان
تورکم منه چوخ فارسجا قیریلداتما، آی اوغلان
*
بیز یاندیران اودلاردا، بوگون یاندی اوشاقلار
پیس گونده، یامان گونده آیاقلاندی اوشاقلار
داندیق دیلی بیز، ریشه سینی داندی اوشاقلار
ایندی بیزه یوخ، یادلارا قرباندی اوشاقلار
بوش- بوش دانیشیب بئینیمی لاخلاتما آی اوغلان
تورکم منه چوخ فارسجا قیریلداتما، آی اوغلان
*
من سؤیله میرم دیللری اورگنمه دانیشما
یانسین اوره ییم باشی، دئسم فارسا قاریشما
آنجاخ دئییرم، یادلارا چوخ یانما آلیشما
هرکیم ائلینی دانسا، کوسوب اونلا باریشما
گولسن، خار اولوب، ائل گؤزینه باتما آی اوغلان
تورکم منه چوخ فارسجا قیریلداتما، آی اوغلان
*
دوشمان اوزووه گولسه، اینان تازه کلک دی
پروانه ده ییر شمع لره، اوغلان کپنک دی
آیریلمازا واجب سؤزون آشکارا دئمک دی
تورکون دیلینین استادی آللاه دی دئمک دی
شیطانی اهورا بئلینه چاتما آی اوغلان
تورکم منه چوخ فارسجا قیریلداتما، آی اوغلان