تاپار منی - ایکرم علی اوف

مین نفره بیر درد اولسا
حکما گلیب تاپار منی
یئر اوزونده بیر ایت وارسا
گلیب تاپیب قاپار منی
آرزوم ایچیمده غریب دیر
سینه مده غم گؤیریبدیر
یوخوما ایلان گیریبدی
یقین چالار او مار منی
بیلینمیر هئچ اوزاق یاخین
چوخوم یوخدو آزا باخین
داماریمدا ناله آخیر
اؤلدوره ر بو دامار منی
سؤزدن سیردن اوسانمیشام
فیتنه گیردن اوسانمیشام
تانریم یئردن اوسانمیشام
اؤز یانینا آپار منی
خیاللاریم الک - فلک
یوخومدا مین فیتنه فلک
منیم منیم تک قالیب تک
اؤز – اؤزوندن اومار منی
بیلینمیر هئچ اوزاق یاخین
چوخوم یوخدو آزا باخین
داماریمدا ناله آخیر
اؤلدوره ر بو دامار منی

گلمز؟ - هوشنگ جعفری

فساد اولان یئره مین بیر بلا گلر، گلمز؟
همیشه زلزله، سیل و وبا گلر، گلمز؟
او یئر کی عالم اولا بی عمل فقط دانیشا
او یئرده بانکا نزول و ربا گلر، گلمز؟
او یئرده کی چاپاچاپ دوشدو چاپدیلار خلقی
او شهره خشم ائدر آللاه قضا گلر، گلمز؟
او یئر کی رحم اولونماز ناماز اولار الکی
گوناه ائدنلره البت جزا گلر، گلمز؟
من هئچ کیمه ناماز اوستونده مرگ بر دئمه رم
دئسم منیم ائلیمه کرونا گلر، گلمز؟
بو جان هاییندا، سن او احتکار ائدنلره باخ
گؤرن او اوزلره بیرده حیا گلر؟ گلمز
او یئرده کی ایشی خالقین فقط چپاول دور
اورا مرض ده گله بی صدا گلر، گلمز؟
او یئر کی خلقه حرام ائیلیر نه دور و بره
او شهره چینی گله مبتلا گلر، گلمز؟
منیم سؤزوم کرونادا دگیل، بلادی بلا
بلا بلانی گؤره آشنا گلر، گلمز؟
او یئرده کی بؤلونر اؤز ایچینده بیت المال
او قومون ای گونو گوندن قرا گلر، گلمز؟
او یئر کی فکر اولا فرعونو ظلم ائده خلقه
اورا عصا یئرینه اژدها گلر، گلمر؟

سنی اونوتماق اوچون گلمه میشم دنیایه - گولایه شینیخلی

بیر غملی بلبلم دنیا دار قفس

عشقین نغمه سی دی بو ناله بو سس

اولماسان کسیلر آلدیغیم نفس

اونوت منی داها اونوت دئییرسن

سنی اونوتماق اوچون سئومه میشم من

دوران خاطیریمه دیه یدی آغلادیم

عؤمور یئلکه نیمی ایدی آغلادیم

ال غمین باش منیم دؤیدو آغلادیم

تور قوروب گؤزونده گؤرورسم می من

سنی اونوتماق اوچون سئومه میشم من

گؤرنلر سوروشدو گؤرن نه ایزمیش

دئمه رم سینه می ستم لر ازمیش

حسرتین ده اؤزون قدر عزیزمیش

اوغروندا آغاردیب ساچیمی دن دن

سنی اونوتماق اوچون سئومه میشم من

گول چیچک آچمادی سن سیز باهاریم

سنین وارلیغین دی دنیادا واریم

سن سیز عؤمور دئییل یاشادیخلایم

او گونون او آنین اولوب عؤمرو کن

سنی اونوتماق اوچون سئومه میشم من

حاق دی کؤنوللرده محبت آندی

بو یولدا اصلی ده کرم ده یاندی

مقدس هر عشقین قربانی جان دی

منه خوش دو اؤلوم دئمه رم نه غم

سنی اونوتماق اوچون سئومه میشم من

ایستی اوجاغیندا کؤزون ابدی

گؤزومه کؤچوبدو گؤزون ابدی

اؤزونده عزیزیم اؤزون ابدی

ایستر یاخیندا اول یاد اولان گن من

سنی اونوتماق اوچون سئومه میشم من

گولایه قولون دو سن عشق آللاهیم

آیاغین ده ین یئر زیارتگاهیم

ای کؤنول سلطانیم ای کؤنول شاهیم

منه مندن یاخین بو عالم ده سن

سنی اونوتماق اوچون سئومه میشم من

*

وفاسیز فلک - غفّار حسین نژاد " رافغ "

وفا سیز فلک 
قان قـوساسان گـوروم ، وفاسیز فلک
هیچ قـویمـادیـن منـی قـاداسیـز فلک

یاندیـردی باغـریمی قانلی نیسکیل لر
جوشغون دردلـر اولدی ،ساناسیزفلک
مین دردی دولدوردین ،یالقوزکونلومه
دردین گوروم اولسون ، داواسیز فلک
آنـا محبّتیـن هیـچ نـه ، گـورمـه دیـم
اوشـاق کـن ائیلـه دیـن ، آنـاسیـز فلک
چولقـاتدین کـونلومـی ، درده ، مـاتمـه
گـونـلری قـویمـادیـن ، عـزاسیـز فلک
مجنون ائتدین سـالدین داغـا داشلارا
نه ده ن قـویدون منی ، لیلا سیز فلک
هاچاندیـر آختاریـر ، گوزوم داغلاری
جیران نه جوردوزسون ،قایاسیز فلک
بالیق تک چکمیشدیم ده نیز حسرتین
دنیـا می ائلـه دیـن ، دریـا سیـز فلک
گـوز یاشلاریم اولـدی ، آراز گئجـه لـر
هانسی گونوم اولـدی ، قـاراسیز فلک
یتیـم لیـق دردینـی سـالـدین جـانیمـا
اوغلون گوروم اولسون ، آتا سیز فلک
دیلک لـر سونـدی لـر ، حسرتلر بیتدی
درد لـریم اولــدولار ، داوا سیـز فلک
من جـوان اولار کـن قـوجاتدین منـی
"رافغی " اولـدوردین ، صداسیزفلک
غفّار حسین نژاد " رافغ "

شاهی اردبیلی - گؤر

شاهی اردبیلی - گؤر
عالم عشقه گل بشر، معجزه خدانی گؤر
قله ده خیمه لر ووران، یوخسولو بینوانی گؤر
دامجی دا تاپ دنیز گوجون، ذره ده کهکشانی گور
هر توک اوجوندا نطقه باخ نغمه یه باخ نوانی گؤر
هر طرفینده هر زمان مروه نی گؤر صفانی گؤر
*
تا گؤره سن حقیقتی گؤیلر اولوب یاریخ یاریخ
سن ده بو سینه اؤرتوگون عشق ایله سوی قابیخ قابیخ
گؤز یاشی توک قدح قدح حکمتی ایچ قاشیق قاشیق
داغلا او داغلی قلبیوی دیلبره وئر یانیخ یانیخ
دیلدن او حالتیله دوش حضرت دلبرانی گؤر
*
گل سر کوی یاریده، توپراغا دوش حصیر تک
باشدا بویوندا تا سنه، یئر وئره لر حریر تک
قوللاری باغلی عؤمرووی، ویر باشا بیر اسیر تک
لیک ال آشما مردمه، زور دئمه امیرتک
قصرلری قبور ائدن، ناجی آسمانی گؤر
*
سون نفسینده بیر نفر، سؤیله دی آشنا سینه
یاز کفنیم ده بیر دعا، اوچ منی حقر ذاتینه
خلقیوی سویدون اللی، ایل مردمی زر هواسینه
ایندی سنی پیامبرین، بوکسه اگر عباسینا
یانمالیسان ائشیت بونو، ائیله دیگون خطانی گؤر
*
ساپ ایکی قات اولان زمان، ایینه دن ائیله مز گذر
سن ده وار اللی قات هوس، کؤرپوده ایینه دن بئتر
باشدا وئریب هوایه یئر، عقلی آتیبسان ای بشر
ایسی دوشوبدو چوللره قصرده ایله شیب دی خار
هم اؤزووه هم اؤزگویه ائیله دیگین جفانی گؤر
*
باشدان اوکی هوالرین، لنگرائدیب چکیب آتار
غیب تاجین قویوب باشا، باشلار ایچینده باش قاتار
آیلا گونی آلیب اله، آلما کیمین آتیب توتار
بیر بالا کهنه دخمه ده، یئدی گؤیو آلیب ساتار
سینه دلگشانی گؤر
*
لهو و لعب دی یاوه دی، قوشماسا وحیه شعر اؤزون
قوشماسا وحیه شعر اؤزون، ویر سؤزووه فنا کوزون
اووماسا شیطانین گؤزون، آت چؤله شاهینین سؤزون
آت چؤله حرف ناحقی، حقی ده اعتلانی گؤر
*
شاهی بویورما بیلمه ییر، مرثیه انسجامینی
شیوه شعر نوحه نین، گؤزله میرر نظامینی
مرکز قتلگه ده گؤر، پیر مغان قیامینی
اوغلو اؤلوب ولی گئنه، ترک ائیله میر پیامینی
حجتینی تمام ائدن، حجت هل اتانی گؤر
*
شرع دن ای دئین قوشون، من شرف شریعتم
روح نمازه زینتم، منجی آدمیتم 
معنی معنویتم طنطنه هدایتم
کوکبه نهایتم فلسفه شفاعتم
هلهله قیامتم درد منم دوا منم جود منم عطا منم
خلقت اولاندا ابتدا من هله نور نابیدیم
پرده نشین عالم خلوت و احتجابیدیم
آدم اولاندا آب و گل من گولودوم گولابیدیم
ایندی ده کل عالمه سرور و مقتدا منم
آینه خدا منم مظهر کبریا منم سرور اطبیا منم
مفخر انبیا منم دلبر اولیا منم
شمس منم قمر منم نخل منم شجر منم
درّ منم گهر منم علم منم هنر منم
درد منم دوا منم اول و انتها منم
شمر گؤرون هارالیدی من گل باغ حیدرم
خارجی سعدین اوغلودور من نوه پیامبرم
ابطحی ام حجازی ام هاشمی یم دلاورم
شهپر جبرئیل ده، عرشه گئدن بالا منم

رجب ابراهیمی ( فرهاد) - آیریلیق

آیریلیق

شاعر : رجب ابراهیمی ( فرهاد)

فیکریندن گئجه لر یاتابیلمیرم

بو فیکری باشیمدان آتابیلمیرم

نئینه ییم کی سنه چاتابیلمیرم

آیریلیق آیری لیق آمان آیری لیق

هر بیر درد دن اولاریامان آیری لیق
*

اوزوندور هیجریندن قارا گئجه لر

بیلمیرم من گئدیم هارا گئجه لر

ووروبدور قلبیمه یارا گئجه لر

آیری لیق آیری لیق آمان آیری لیق

هر بیر درددن اولار یامان آیری لیق
*

یادیما دوشنده آلا گؤزلرین

گؤیده اولدوزلاردان آلام خبرین

نئینه ییم کسیبدیر مندن نظرین

آیری لیق آیری لیق آمان آیری لیق

هر بیر درددن اولار یامان آیری لیق
*

آیری لیق دردینی چکمه ین بیلمز

یاردان آیری دوشن گؤز یاشین سیلمز

دئییرلر اینتیظار خسته سی اؤلمز

آیری لیق آیری لیق آمان آیری لیق

هر بیر دردن اولار یامان آیری لیق
*

نئجه کی ائلیمدن آیری دوشه ندن

سورار بیر - بیرینی گؤروم بیلندن

حسرتله سیزلاییر داییم بو غمدن

آیری لیق آیری لیق آمان آیری لیق

هر بیر درددن اولار یامان آیری لیق
*

ایللر دیر اوزاغام ارخام ائلیمدن

بولبولم دوشموشم آیری گولومدن

زور ایله آیریلیب شیرین دیلیمدن

آیری لیق آیری لیق آمان آیری لیق

هر بیر درددن اولار یامان آیری لیق
*

اولوبدور بیگانه یاریم یولداشیم

قریبه ساییلیر دوستوم - سیرداشیم

بو جاوان چاغیمدا آغاردیب باشیم

آیری لیق آیری لیق آمان آیری لیق

هر بیر درددن اولار یامان آیری لیق
*

منی آغلاداندان گولوش ایسته رم

آیری دوشمنیمله گؤروش ایسته رم

حاصاری ییخماغا یوروش ایسته رم

آیری لیق آیری لیق آمان آیری لیق

هر بیر درددن اولار یامان آیری لیق
*

سئوگیلیک اولوبدو شانی فرهادین

سئوگی سی هاردادی ، هانی فرهادین؟

دئیه رک چیخاجاق جانی فرهادین

آیری لیق آیری لیق آمان آیری لیق

هر بیر درددن اولار یامان آیری لیق
*

قایاقیزی - مرحوم میر باقر موسوی قره تپه

سن ده یانارسان – روسلان صفر اوغلو

سن ده یانارسان
حیاتیمی قاراتدین، هر یئرده سن آغلاتدین
سنی اینسان ساندیم، یاندیم ائله یاندیم
واخت گلر بیر گون ، سن ده یانارسان
منیم کیمی سن ده ، هؤنکوروب آغلارسان
ایلک دفعه سنی گؤرنده
سنه ائله اینانمیشدیم
گرک سنه آلدانمازدیم
بو قدر باغلانمازدیم
سنی غرورلو بیری بیلدیم
سنی مرد بیری بیلدیم
سونوندا نه لر اولدو، یاریم
هر سؤزون یالان اولدو
حیاتیمی قاراتدین، هر یئرده سن آغلاتدین
سنی اینسان ساندیم، یاندیم ائله یاندیم
واخت گلر بیر گون ، سن ده یانارسان
منیم کیمی سن ده هؤنکوروب آغلارسان