یئنه بیر غریبلیک کؤچوب داغلارا
سؤزو بولاغیندا، گور چاییندادی
قارتال زیروه لریده اؤز هاراییندا
ککلیک قایالاردا اؤز هاییندادی
*
مئشه لر ساریدان بیچیب دونونو
آل – الوان گئیینیب چوللر تزه – تر
یوخسا طبیعتین بویون باغی می
داشلارین اوستونه سپه له نیب زر؟
*
گونئی لر ازل دن ناخیشلانیب دیر
نرگیز رنگی چؤکوب یاماجا – یالا
یئنی دن گؤیریر یایلاق یئرلری
باهارا بنزه ییر پاییز آز قالا
*
منده گلدیم بو عالمه
قوجاق آچدیم درده – غمه
یولچونون یول دردی دئمه
دومانلیق - چن لیک دئییلمیش
*
یئریدیم باخمادیم دالا
داغ دئدیم قالخدیغیم یالا
دئمه هر گول بیتن تالا
هله چمن لیک دئییلمیش
*
دئدیم باغ سالیم بئجریم
بار یئتیریم به هر دریم
گؤیرمه دی اکدیکلریم
بلکه ده دنلیک دئییلمیش
*
باخدیم سولا باخدیم ساغا
باخیرلار کئفه داماغا
من ده گیردیم اویناماغا
هئچ دئمه شن لیک دئییلمیش
*
ایچیمده هئی یاز ساواشیم
آییلدیم کی قاردی باشیم
آی توپوغا ده ین داشیم
او ساپاند، سن لیک دئییلمیش
*
گلدیم گؤردوم بو عالمی
بیر عؤمورلوک دردی – غمی
آغلا منی آی « کرمی»
بو دونیا من لیک دئییلمیش
بو دونیا من لیک دئییلمیش
*
قویونلاردا قورد دوغارلار
قورد ایله دولار ماغارلار
هر آن بیر – بیرین بوغارلار
شیطانین شیطانلیغینا
*
« قارا آت » اؤزون قامچی لار
قامچی سیندان قان دامجیلار
مین فیکیردوغار سانجی لار
شیطانین شیطانلیغینا
*
مینینی بیری بیلله لر
اؤلونو دیری بیلله لر
آچیلار قوشا گولله لر
شیطانین شیطانلیغینا
*
گوناهلار قات با قات قالار
گوناه دان مین – مین چات قالار
شیطان دای اؤزو مات قالار
شیطانین شیطانلیغینا
*
