Montag, Juni 29, 2009

چیچکلرین قیزیل قانی - نغمه ای برای ندا

چیچک لرین قیزیل قانی یوماقدادیر قارانلیغین قباحتین
هارایلارین حقلی سسی کسمه ده دیر شوم نفسین ولایتین
قودوز قودورقان جانی لر قانین توکور چلنگ چلنگ لاله لرین
گؤزو باغلی قوللوقچوولار آرتیرمادا استبدادین رذالتین
دینی اینانج اولسایدی دا زاهید لرین چال چاپینین اویونجاغی
چیرکین اوزو چیخدی اؤزه ایرتیجانین فاسد فوسیل حیکومتین
اسمه ده دیر ایلیق یئللر حسرت اولان آزادلیغین عطری گلیر
آچمادادادیر سئوگیلی یار نقابینی آی اوزوندن حورییتین
دالغالانان یاشیل لیغین قورخوسوندان دیشی دوشموش قاریمیش قیش
سون گوجیله یاساقلاییر عبث یئره قیزیل گولون طراوتین
آنلی آچیق باشی اوجا الی یالین کور قورشونلار قارشیسیندا
قورتولوشون وورغونلاری گؤسترمه ده شوجاعتین نهایتین
حق اؤزو امداد ائله سین حقلی اولان حق سؤیله ین عاشیقلره
قارانلیغین باتیشیندا گؤرسون ائللر ایشیق اوزون سعادتین
اسماعیل جمیلی 1-4-88
..
ترجمه به وسیله دوست عزیزی به نام آزاد در نظرات اینجا
خون سرخ جوانه ها قباحت تاریکی را میشوید/ صدای حق فریادها نفس شوم ولایت را میبرد / جانیان هارو وحشی خون لاله ها را قدح قدح میریزند / غلامهای چشم بسته رذالت استبداد را میافزاید / اگرچه دین زاهدان چپاولگررا باور کرده بودیم / چهره زشت حکومت فاسد ارتجاع برملا شد / وزش نسیم بوی عطر ازادی که در حسرتش بودیم را میاورد/ معشوق زیبا نقاب از روی آزادی ماه رو میگشاید / دندان زمستان پیر از هراس موج مواج سبز میافتد / طراوت گل سرخ را به عبث با آخرین قوایش ممنوع میکنند / با پیشانی گشاده و دست خالی و سر بلند مقابل سپاه کور چشم ایستاده ایم / عقابان رهایی نهایت شجاعت را نشان میدهند / حق به عاشقان حق دار و حق گو مدد برساند / تا در غروب تاریکی مردم روی نورانی سعادت را ببینند

Kommentare:

Anonym hat gesagt…

ایش یاشالیبدیر بیلیر آغلاماسین نئیله سین
سیلاحلی موزدورلاری یاغلاماسین نئیله سین

قورخورو اولسون تامام چال چاپینین فورصتی
اولکوب آشیرسین پالان جر جه نه وار اوممتی
خلق ائله سین سرنگون فاسید اولان دولتی
مین یالانی بیر بیره باغلاماسین نئیله سین
ایش یاشالیبدیر بیلیر آغلاماسین نئیله سین

یاخشی اؤزون کورلادی سالدی اؤزون ذیلله ته
گون کیمی اولدو عیان فیتنه فساد میلله ته
میللت مظلوم باسیر وار یوخونو لعنه ته
چاره قالیب منقله چاغلاماسین نئیله سین
ایش یاشالیبدیر بیلیر آغلاماسین نئیله سین

جهل وجفا خیمه سی سقف ولایت چؤکور
شمر دنی دسته سی هیئت دولت چؤکور
قورخو دوشوب جانینا باند رذالت چؤکور
کین کؤرویون پوفله ییب داغلاماسین نئیله سین
ایش یاشالیبدیر بیلیر آغلاماسین نئیله سین

سؤزلری سالمیر کسر بیرجه سیلاحدیر قالان
گؤز گؤره کی قان توکور گیزلیسی اولدو عیان
بیر نئچه گون وار هله گول له گوجیله تومان
گئتسه قالار لوت باشی آغلاماسین نئیله سین
سیلاحلی موزدورلاری یاغلاماسین نئیله سین

اسماعيل جميلي

Anonym hat gesagt…

آچیب آغزین بویورور ماللا یالان کیم کیمه دیر
بورا ایراندی اولار هر شئی اینان کیم کیمه دیر

یئخیب علمین ائوینی جهل سالیر گونده سارای
بسکی وار ظلم وخرافات اولوب علمین ایشی زای
هر ایشی ترسینه دیر یوخدو جهاندا بو را تای
قیللی قیلمانلار ائدیر ظولمو عیان کیم کیمه دیر
بورا ایراندی اولار هر شئی اینان کیم کیمه دیر

دینازورلار قویوب عممامه سالیب ترمه عبا
اؤلولر تخته چیخیب ایش گوجوموز یاسدی عزا
کوفردور گولسن اوره کدن گوله نه واردی جزا
باشی بوشلاردی توتان خلقه دیوان کیم کیمه دیر
بورا ایراندی اولار هر شئی اینان کیم کیمه دیر

دولتی دین داغیدیب مللتین ایمان اوجاغین
سؤندوروب جهل ایله علمین علمانین چراغین
اعتییاد- فقر- فساد هر یئره آچمیش ایاغین
دین آدیله اولونور خلق تالان کیم کیمه دیر
بورا ایراندی اولارهر شئی اینان کیم کیمه دیر

ماللا قویمور عوامین گؤز یاشی بیر آن قورویا
الینی گویدن اوزوب ائیلیر حواله قویویا
وار خرافات تیانیندا هله مینلرجه بویا
گونده بیر موددا چیخیر تازه پالان کیم کیمه دیر
بورا ایراندی اولارهر شئی اینان کیم کیمه دیر

قادینین اسسه تئلی سنگر ایمان سوکولر
نظامین نظمی مئزر قدده ولایت بوکولر
من وارام سؤیله سه کیم سقف حکومت توکولر
بوردا دونموش چوروموش سانکی زمان کیم کیمه دیر
بورا ایراندی اولار هر شئی اینان کیم کیمه دیر

دین دونوندا سوخولور ائولره سیما صداسی
ایش گوجو ایفترادیر چیخسا دا یوز یول باراسی
گزیر اسلام قئلیغیندا شووینیزمین بالاسی
خائن ایتلر ائله ییب قوردو چوبان کیم کیمه دیر
بورا ایراندی اولار هر شئی اینان کیم کیمه دیر

سوواشیبدیر گه نه تک مملکته جهل تامام
ظولم وتزویر و یالاندیر ائله ییر حفظ نیظام
قمه قداره لی اوباشلار ائدیب غصب مقام
عوامی نوختالاییب وئرمیرامان کیم کیمه دیر
بورا ایراندی اولار هر شئی اینان کیم کیمه دیر

بولاشیب مملکته اصل ولایت جوزامی
داراشیب چوخلارینا اسگی حماقت جوزامی
باش آچیب کوف قوخویان دینی جهالت جوزامی
دیغلاییر عقلی اولان دردی قانان کیم کیمه دیر
بورا ایراندی اولار هر شئی اینان کیم کیمه دیر

آیری بیر چاره سی یوخ خلق گرکدیر آییلا
یئنی دوراندا دوشه علم ایله عقل ایله یولا
یوخسا آد قویما ائدرلر یئنه زنجیره چولا
گئیینر کوهنه نظام تازه تومان کیم کیمه دیر
بورا ایراندی اولار هر شئی اینان کیم کیمه دیر

اسماعیل جمیلی

Anonym hat gesagt…

قوتسال قودوزلارین
تانک‌لاری اوچاقلاری
قان قوسدورور
آنالارا یئنی یئتمه فیدانلارا
سیغیناغین بوجاغیندا
چاره‌سیز‌لیک چمبرینده
الی یالین انسانلارا
گؤیرچین‌لر
کسیک‌قانلی قانادلارین
آخساق آخساق سورویورلر
آنا تورپاق امسین
سئوگیسینین دیرینه
ایرماق ایرماق آخان قانی
بورا غزه
ایل‌لر بویو قانلی کؤینک لاله‌لری
ائولری‌نین نیسگیل طاقچالارین بزه‌ین
یئرلی یئرسیز
سومورگه‌نین قول‌لارینا باش ایمه ین
اؤزگورلویون دایانیشین سیناغی
قیریق قورو نفسی دردلی سسی
سینیق قولو باغلی یولو
اولوب قالان اولاناغی
گؤز گؤز اولان سینه سی
یالانچی دوست‌لارین تاپداغی
بورا غزه
قاراباغ-ین قان داشی
سورگون چیچک‌لرین جان داشی
کلبه‌جرین سیرداشی
انسانلیغا اؤز قاراسی اوغورلانان اؤلکه سی
سؤزه سیغمایان درین دردی فاجعه سی
بورا غزه…..

اسماعیل جمیلی

Anonym hat gesagt…

نه ائلی ائلیم‌دیر نه دیلی دیلیم


نه آدی آدیم‌دیر نه سانی سانیم


ایران دوستاغیندا باغلانیب الیم


تالانیر بودانیر آذربایجانیم





چوخونلوق آدیلا آزمیش‌لاردی‌لار


کؤله‌‌لیک یاساسین یازمیش‌لاردی‌لار


آزادلیق مزارین قازمیش‌لاردی‌لار


پئرسیا قفسی پاس‌لی زیندانیم





مرکزین تورونا دوشمه آمان‌‌دیر


دوزاق‌دیر تله‌‌دیر شردیر زیان‌دیر


عالیمی جاهیلی راسیست قابان‌دیر


ساغینا سولونا یوخ‌دور گومانیم





بیله‌نه بیلمه‌زه بیر بئز قیراغی


یالتاقلیق سیرتیقلیق کولتور بویاغی


یابانجی گوجلرین اویون اویناغی


بون‌لارین خئیری‌دیر ضرر زیانیم





آریا زهری چیرکین فعلینده


ائلیمه بؤهتان‌لار سیرتیق دیلینده


توتساغیق دوستاغیق ائیری ائلینده


آییق اول ساییق اول قوچاق آسلانیم





بیز اولساق بیزلره یادلار باتانماز


مانقورت‌لار ساتغین‌لار آرا قاتانماز


ائیریلر دوزلره دوزده چاتانماز


یازی‌لار یئنی‌ده‌ن یئنی دستانیم


اؤز ائلیم اؤز باشیم جئنت مکانیم


اؤز ائلیم اؤز دیلیم آذربایجانیم


اسماعیل جمیلی

Anonym hat gesagt…

سانما یوخلاییبدیر سس سیز سمیرسیز
دئمه چؤکوب شهره اؤلوم قورخوسو
گئجه نی دالغا سیز یاشایان دنیز
سحره گؤرورو توفان یوخوسو

باخیشلار پایلاشیر مین بیر گیزلینی
دوداقلار سوسسادا کؤنوللر دویور
یوز ایللر بوکمه ییب ارکین بئلینی
هله ده وارلیغین ، ائلین قورویور

بوز گؤلون مورگولو گؤروب آلدانما
ساوالان کؤکسونده جوشان وولکاندیر
گؤردوگون قارا گون بو ائل بو تورپاق
ایگیردلر بئشیگی آذربایجان دیر

بو یئرده آرخانی گؤره ن گؤزلر وار
هامارلار اوچوروم دؤنوملر دوزدور
بو یئرده یایئنی چکن سازلارین
سنگری ماهنی لار اوخلاری سؤزدور

آتیلان قورشوندور هر بیر بایاتی
ستارخان توفنگی بو گون قلم دیر
بیلگی یاراقینا ساریلان اوزان
کؤکسونده قوپوزو قورقود ده د م دیر

بو یئرده بئشیکده ن باشلانیر دؤیوش
گئچیلمز یوللاری آشیر لایلالار
قارانلیق گئجه لر قودوراندا قیش
اومود باغچاسیندا گول له نیر باهار

آزادلیق هایقیران بابک قالاسی
چاغلا ایاقلاشان سینماز اوردودور
سوسماز نسیمی سی سویوللارسا دا
بورا آذربایجان اودلار یوردودور

اسماعیل جمیلی

Anonym hat gesagt…

یاشیل سئل
یوز ایللرین اسگی قیسیر قانونلاری پوزولماسا
گله نک لر ایلمک ایلمک سؤکولمه سه
اؤسه له نیب آرینماسا
بولانلیقلار دورولماسا
آدیم آدیم یئنی دوران قورولماسا
قاریش قاریش آنا وطن گوللنمه سه
اؤلکه بویدا دوستاق اولان پاسلی قفس قیریلماسا
آزاد ائللر دیللنمه سه
جهالتین جسارتی مزارینا تیخیلماسا
پالان اولان یالانلارین قوتساللیغی ییخیلماسا
نسگیل اولان اؤزگورلویون ماهنیلاری دوداق دوداق اوخونماسا
یاشام آدلی گؤزه للییین شن خالیسی ناخیش ناخیش توخونماسا
اولوب قالان اسگی حامام اسگی تاسدیر
قارا گوندور قارا یاسدیر
داملا داملا اریمک دیر
گئریلییه سورونمک دیر
گؤز اؤنونده قوتسالاشان
استبدادین قفسینده چورومک دیر
بو قورقودا بو قفسده بو دوستاقدا
یایقین اولان حماقته
عادی لاشان قباحته
گونلوک اولان جنایته
قیرخ حرامی قولدورلارین قورقوسونا
قودوز قودورقان دولته
ظالیمین ظولمون یاتاغی حکومته
ائل اینانجین ظولمه اویونجاق ائیله ین
عدالته آغیز ایین یالان یالان اوسته دئیین
فیتنه فسادین اوداغی ولایت وقاحته
باش ایمه ین سینه گره ن
یاشیل سئلین باغیردیغی آزادلیغا آلقیش آلقیش
آیدینلیغا یئنی لییه آبادلیغا آلقیش القیش
یاشیل سئلین قارشیسینی قیش آلانماز
دالغالانان دورو دنیز دای دایانماز بولانماز
گله جه یه آخمادادیر
دالغا دالغا استبدادین چؤر چؤپونو یومادادیر
قولدورلارین قورقوسونو یاخمادادیر
بو یاشیل سئل آزادلیغین اولدوزلارین
قارانلیغین کور کؤزونه سوخمادادیر
بو یاشیل سئل آیدینلیغا اؤزگورلویه اؤزون توتوب باخمادادیر
اسماعیل جمیلی

Anonym hat gesagt…

اسماعيل جميلي:
گئتمه ترسا بالاسی باخ دالینا سایه گلیر
ترک محراب ائله ییب ماللا کلیسایه گلیر
باخما وار ساققالی عمامه سی تيرمه عباسی
اوزده اسلام دئسه ده مئیلی مسیحایه گلیر
ختنه وغسل .وتیّممم دئییلی مسئله سی
دگیشیب نیّتینی غیر ایله سودایه گلیر

اولکودوب باده یه قدرت گؤتوروب بیعتینی
بوراخیب خیمه لری شیمره تمنّایه گلیر
حوکمونو سورماق اوچون لازیم اولان رنگه دوشور
شرّ ایله صلح ائله ییر خیریله دعوایه گلیر
نه حیا خلقدن ائیلیر نه خدادن اوتانیر
تخت فرعونا چیخیر سونرا مصّللایه گلیر
ائرمنی داشناق ایله قول بویون اولموش اؤپوشور
قان توکن قاتل ایله خلوتی ماوایه گلیر
ترس تفسیر اولونور سانکی شریعت دئدییی
هر فيریلداغی اوچون وحی اولونور آیه گلیر
شیعه نین عومرو بویو موسیقینی کفر سانان
تار ایله ضرب توتور سازیله آوایه گلیر
چوخ حرام اولدو حلال، جامی دولاندیر ساقی
بو گون اولمازسا صاباح فيتواسی ودکایه گلیر
یار حيجاب آتما دادیر حوسن جمیل اولسون عیان
بولبول ال گولدن اوزوب ذٶوق تماشایه گلیر

Anonym hat gesagt…

نظیره از اسماعيل جميلي:
گئتمه ترسا بالاسی باخ دالینا سایه گلیر
ترک محراب ائله ییب ماللا کلیسایه گلیر
باخما وار ساققالی عمامه سی تيرمه عباسی
اوزده اسلام دئسه ده مئیلی مسیحایه گلیر
ختنه وغسل .وتیّممم دئییلی مسئله سی
دگیشیب نیّتینی غیر ایله سودایه گلیر
اولکودوب باده یه قدرت گؤتوروب بیعتینی
بوراخیب خیمه لری شیمره تمنّایه گلیر
حوکمونو سورماق اوچون لازیم اولان رنگه دوشور
شرّ ایله صلح ائله ییر خیریله دعوایه گلیر
نه حیا خلقدن ائیلیر نه خدادن اوتانیر
تخت فرعونا چیخیر سونرا مصّللایه گلیر
ائرمنی داشناق ایله قول بویون اولموش اؤپوشور
قان توکن قاتل ایله خلوتی ماوایه گلیر
ترس تفسیر اولونور سانکی شریعت دئدییی
هر فيریلداغی اوچون وحی اولونور آیه گلیر
شیعه نین عومرو بویو موسیقینی کفر سانان
تار ایله ضرب توتور سازیله آوایه گلیر
چوخ حرام اولدو حلال، جامی دولاندیر ساقی
بو گون اولمازسا صاباح فيتواسی ودکایه گلیر
یار حيجاب آتما دادیر حوسن جمیل اولسون عیان
بولبول ال گولدن اوزوب ذٶوق تماشایه گلیر