Donnerstag, Januar 18, 2007

چارپارالار ، روباعی لر - ملا محمد فضولی


یوخ دهرده بیر موافق طبع حریف
کیم صحبتی دلگشا اولا ، طبعی ظریف
فریاد کی ناجنس مصاحب لر ایله
بی فایده ضایع اولدو اوقات شریف
*
بیز عالم عشق عالم آرالاری ییز
میخانه درد ، درد پیمالاری ییز
گلبرگ ندامت چمنی دیر عالم
بیز بو چمنین بلبل شیدالاری ییز
*
 قدینه دئدیم کی سرو بستان دیر بو
تند اولدو کی ای فقیر بهتان دیر بو
پا بسته و عور و بی زبان دیر دئدیگین
خندان و قباپوش و خرامان دیر بو
*
یاندیردی منی شوق جمالین ای ماه
هر لحظه دئیی عجب یئتیرسم گؤیه آه
زولفون گرهی چیخدی الیم دن ناگاه
گؤر کیم نه جفا قیلدی منه بخت سیاه
*
فریاد کی عشق بی قرار ائتدی منی
درد و غم ایله زار و نزار ائتدی منی
خاک سر کویوندا غبار ائتدی منی
سرگشته و خوار و خاکسار ائتدی منی
*
گؤردوم سنی الدن اختیاریم گئتدی
باخدیم اوزونه ، صبر و قراریم گئتدی
خاک اولدوم و هر یانا غباریم گئتدی
القصه قاپوندان اعتباریم گئتدی
*
خونابه تؤکوب دیده گریانیم دن
سن سیز بویادیم یئر اوزون اؤز قانیم دن
اؤز قانیم ایله اؤزوم ائیله رم دعوا
گئتمزسه الیم نولا گریبانیم دن
*
خوش اول کی دم چکیب باده ناب
سرمست یاتام قبرده تا روز حساب
غوغای قیامت ده دورام مست و خراب
نه فکر حساب اولا ، نه پروای عذاب
..

خیل غمین ائتدی نقد عمروم تاراج
صبر ایله میسر اولمادی درده علاج
رخساریمه تؤکدو مردم چشمیم قان
هندویی گؤزون ، لعل وئریر رومه خراج
*
کیم دیر کی غمین ده ناله زار ائتمز ؟
دردین سنه ناله ایله اظهار ائتمز ؟
فریادینا هیچ کیمسه نین یئتمزسن
فریاد کی ، فریاد سنه کار ائتمز
*
ای باد قیل احوالیمی جانانیما عرض
سرگشته لیگیم سرو خرامانیما عرض
اؤلدوردو کنایت ایله اغیار منی
بو ظلم صریحی ایله سلطانیما عرض
*
کویوندا سنین نه داشا کی ووردوم باش
قیلدیم اونو غرق خون تؤکوب گؤزدن یاش
گؤز یاشینا رحم ایله کی چوخ مدت دیر
بی دادینا صبر ائدیب باسار باغرینا داش
*
تهدید ایله کئچدی روزگار ای واعظ
فوت اولدو شراب وصل یار ای واعظ
گر کوثر و حور ایسه غرض ، وئرمه عذاب
نه ترک بویور ، نه انتظار ای واعظ
*
پروانه یه ظلم بی حساب ائیلر شمع
ظلم اودونا باغرینی کباب ائیلر شمع
گویا کی بیلیر ظلم سرانجامی نه دیر
بیوده دئییل کی اضطراب ائیلر شمع
*

Keine Kommentare: